SLUFA VU 10 - Bible en langue guiziga

Fugum ngi ɓiri bara

¹ Bumbulvuŋ a ɓa Moyise na:

² «Ɓi ɓa a vuɗukuw fugum ngi ɓiri barahay cuw. Ki sa fa ngi zila mizli malla ɓa mizli ngir walahay miwal wala, a slikiɗam.

³ Da taŋ misa faka fugum tayna le cuw taŋ na, mizli a sa kusom cek cek a ciki ɗik, a mizlingre guɗuk ngi zlir ti ya Buymisemuŋ.

⁴ Da a fam fugum purla na, sey buyɓihey ati buy ngi sukwi Israyeley makusom nga ciki ɗike.

⁵ Da a faka fugumo le sar mudumbuŋ ti widi kaˀ aseˀe na, i sukwi misi ar walahay guɗuk misi tisi pas ngi miprik ngi guɗuk macohomo.

⁶ Da a faka le sar mucuw naŋ ti widi kaˀ aseˀe ma na, i sukwi misi ar walahay guɗuk, misi tir vay ruwuy ngi guɗuk masa cohomo. Ɓa mizli gar a cohom na, a fam fugum feˀ le ti widi kaˀ aseˀe kwaɗay.

⁷ Amma ngi zila mizli ɓa a kusom na, a sa fakaŋ a fakaŋ, widi anta kaˀ aseˀe ta.

⁸ Masa faka fugum tayna, i ziri mizile ngi Aroŋhoy, masayay. I ɓi micica masa kiɗ mi ta, vur kum ati dideˀ kumoy nga mbuŋ nga mbuŋ.

⁹ A ruwuy kumo, da mesenehey a zlukum le, ki ra ram nga gi vurum ati taŋ na, kisa faka fugum tayna cuw taŋ ti widi kaˀ aseˀe, ɓa a siy ti wuluk kumo keŋ a hirnga, dar ya Bumbulvuŋ, Buymisemuŋ kumo, i sa luhukum tisi haŋ ngi mesene kumoyo.

¹⁰ Da kum misa lumam hin ngi cira hiri le, hin ngi muguzlum, hin mudumbuŋ ngi kiya na, kisa faka fugum tayna ar li gi mikuli mizlam zlam wãˀa, waɗ ar li gi mikuli ngi luuma zuyo, i sa wulukukum keŋ a hirnga. I ya Bumbulvuŋ Buymisemuŋ kum.»

ZLE A SINAY HÃ AR MAAKWAY NGI MOˀAP ( 10.11—21.35 ) Israyeley muzuɓam jiviɗi

¹¹ Vi mucuw naŋ, a dirba Israyeley muboko ti ruwuy Ezipte, hin kukur cuw ngi kiya mucuw naŋ na, gazlavay a slikiɗ baɗ a hirnga guɗuk misi beleler ngi jumoˀay anga.

¹² Israyeley a ram baɗ ti wuzlaɓuh mikirɗak kirɗak ngi Sinaya, gazlavay ara pi sar a wuzlaɓuh mikirɗak kirɗak ngi Paraŋ.

¹³ Israyeley a slikiɗam kaɓa Bumbulvuŋ mupula taŋ jiviɗ naŋ na, i sar mudumbuŋ naŋ aruŋ.

¹⁴ Mikaka mbuŋ, i ngay ngir walahay guɗuk, ziri ngi Zudahay ati soje taŋhaya. I Nasoŋ mangal ngi Aminadap miwa soje ngi ziri ngi Zudahaya.

¹⁵ Natanayel, mangal ngi Suwara, a wi soje ngir sukwi ngi Isakar.

¹⁶ Eliyap mangal ngi Heloŋ, a wi soje ngir sukwi Zabuloŋ.

¹⁷ A puwaka guɗuk ngi Buymisemuŋ, ngi huroˀo. Dideˀ ngi Gersoŋhoy ati ngi Merariheye, taŋ macohom na, a ram di a haŋ.

¹⁸ Mizli ngi Rubeney a ram ati soje taŋhaya. I Elisur, mangal ngi Sedewur miwa sojehey ngir sukwi ngi Rubene.

¹⁹ Selumiyel, mangal ngi Surisaday, a wi soje ngir sukwi Simeyoŋ.

²⁰ Eliyasaf, mangal ngi Dewuyel, a wi soje ngir sukwi Gat.

²¹ A dirba nah kwana, Levi dideˀ ngi Kehatay majijiraka li mihĩˀĩ ngi Bumbulvuŋ, a sipaka taŋ, ɓa dideˀ ngi Kehatay ara ndilam tikeˀe na, naɓa levi mekelemey a ng'aka guɗuk ngi Bumbulvuŋ le.

²² Akẽh na, ngay ngi sojehey micikilam a ciki Efrayime, a ram aya. I Elisama, mangal ngi Amihuɗ miwa sojehey ngir sukwi ngi Efrayime.

²³ Gamliyel, mangal ngi Pedasur, a wi soje ngir sukwi ngi Manase.

²⁴ Abidaŋ mangal ngi Gidoni, a wi soje ngir sukwi ngi Benjameŋ.

²⁵ A dirba wãˀ na, ngay ngi soje ngi Daŋhay micikilama, a zuɓam jiviɗi. Taŋ i ngi dirbahay wãˀ, mikiɗa mi ndok. I Ahiyezer, mangal ngi Amisaday miwa sojehey ngir sukwi ngi Daŋ.

²⁶ Pagiyel mangal ngi Okraŋ, a wi soje ngir sukwi ngi Aser.

²⁷ Ahira, mangal ngi Enaŋ, a wi soje ngir sukwi ngi Neftali.

²⁸ Israyeley a ram ati soje taŋhaya ti sila ti sila kahana so.

Moyis misipi mbur ngi kisa taŋ ar zuɓa mulaka

²⁹ Moyis a ɓa Hobap, mangal ngi jomo naŋ Rewel, mbur Madiyan: «Ndra maram na, nga ruwuy Bumbulvuŋ miɓi ɗaˀ le, a sa vula ndra di na. Sawa ati ndra, i sa vulukuw gwat mezlehey, Bumbulvuŋ miɓi ɗaˀ le, a sa vula da Israyeley na ya.»

³⁰ Hobap a mbiɗaŋ di: «y'anta ru ta, zuwen ya mami nga ruwuy ɗu, nga wuzla muy ɗuwoy.»

³¹ Moyis a ɓaŋ: «Ambuh, ki pula ndra ta. Ani a wuzlaɓuh, li zliv i pam anga gu na, ka ki si na le, kisa kisa ndra.

³² Da ki so le asi ndra na, gwat mezlehey, Bumbulvuŋ masa ga ndra di na, kisa lum aya.»

³³ Israyeley a pulaka muwã ngi Bumbulvuŋ tuwa, a zuɓam jiviɗe, a gam hin makir ar li ru. Levihey majijiraka akoti ngi jumoˀaya, a ram di a mbuŋ, ɓa a luuma taŋ li ngi pi sara.

³⁴ Ti papasa, da ara slikiɗam na, gazlavay ngi Bumbulvuŋ a sirta taŋ sirit.

³⁵ Da levihey a zuɓaka akoti le ngi cuh na, Moyis a ɓi: «Bumbulvuŋ, slikiɗi, ɓa mesene ɗikey a zliɗam hirnga, yo ɓa mizli mazliram ti ka tahay a kilam a mbuŋ ɗike!»

³⁶ Da levihey ara cicam ti akoti na, Moyis a ɓi: «Mawa, Bumbulvuŋ! So cifi a wuzla Israyeley misirgiɗim durmuk mbeˀ mbeˀ na.»