SLRA 5 - Bible en langue guiziga

Ananiyas ati Safira

¹ Mbur mekelem ada, a zilaka Ananiyas, a ngiɓamˀay ati ngwas naŋ Safira, a hiɗika guva naŋ avra.

² A ngica dala nah ngac, ngwas naŋ kwana, a si na le. Joˀ aru ti is naŋ, ara pa a mbuŋ misliney.

³ Dar Piyer a ɓaŋ: «Ananiyas, Satan a tiɓa mevel ɗike wãˀ vur mike? Ki ga slir da ˀUf Mipala, joˀ ki ngic dala ngi guva ngac da ka.

⁴ Da ki pula le, ki hiɗika zleˀe ta na, zuy ta kwa? Malla ka mihiɗika vuna, dala nah i ngi ɗik ta kwa? Wuluk misi kahana, a so a mevel ɗike mbri mbrike? Ki gi di i slir da mizli ta, amma da Buymisemuŋ.»

⁵ Ananiyas micina mingiɓi hana na, a diɗ simtraˀ, a mucu. Mizli micinaka ɓi nah gar na, a ga taŋ zluwun haɗi teˀe.

⁶ Dar gawlahay a soko, a mbizaka vagay naŋ ti gabaga, a ram di nga diki.

⁷ A dirba nah, gwat ngi ler makir a cuh le, ngwas naŋ a cawa, ko a si na gwat migi na ta.

⁸ Piyer a cufuɗaŋ: «Kum mihiɗikaka guva na, dala naŋ kahana gisiŋ kwa? Inga ɓiy di.» Ngwas a ɓaŋ: «Hĩ, naŋ kahana gisiŋ.»

⁹ Dar Piyer a slaŋ di: «Ki ngiɓamˀay mbri, ɓa ki jiginam mi avu ˀUf ngi Bumbulvuŋ ka? Mizli miram nga dika zil ɗike, ara moko, cine sar t'ani avu miviŋ. A sa ram ti ka ya.»

¹⁰ Angi nah si na, a diɗ simtra a mbuŋ Piyere, a mucu. Ti gawlahay mucoko na, a lumaka a muc le, a zuɓaka, ara dikaka aciki zile.

¹¹ Cikil ngi misikristuhoy ati mizli micinaka ɓi nah gar na, zluwun a ga taŋ haɗa.

Misliney migam cekenehey haɗi

¹² Misliney ara gam gwat ngi zuma hirngahay ati gwat migam ɗaˀ tahay haɗi a wuzla mizli. Mitiɓihey a kusom arleˀe gar asi palak ngi Salomoŋ.

¹³ Mizli ara ngilam wuy ti mislineye haɗi ngbaŋ. Amma ko mbur mazli ɓi ngi jum ng'avi taŋ, anta.

¹⁴ Zigiduw ara joˀ kaw kaw haɗi, ziley ati ngwasay, ara tiɓaka Bumbuluŋ, yo ara jumom ng'avaŋ.

¹⁵ Vurˀe, ara boko ti misi jijihey nga ciki jiviɗi, a hinaka taŋ angi arngawo ati kitihiney, ɓa Piyer masa cuh na, ko susuɗuk naŋ a sa ru zuwun zuwun angi mekelemey a wuzla taŋ.

¹⁶ Zigiduw haɗi a kiloko ti ka ti ka, tir prok migweˀ gweˀhey avu Zerusaleme. A zuɓoko misi jijihey ati misi setene makicuwuraka taŋ, taŋ gar a ɗiyam le.

Misipaka mislineye nder nder

¹⁷ Angi nah na, masay madiɗa ati mizli ngi ciki naŋhay gar, i Sadukihey, a jam mevel haɗi ar mislineye,

¹⁸ a ɓam ɓa a jaka taŋ, a paka taŋ ar dangay a mihiri ngi mizli gar.

¹⁹ Amma ngi duvuɗo, modro ngi Bumbulvuŋ a sawa, a wuna miviŋ ngi dangaya, a bo taŋ, a ɓa taŋ:

²⁰ «A ram dedeŋ ar hay ngi Bumbulvuŋ, yo ɓi ngi vula siifa hana gar na, tilam di mi da mizli.»

²¹ Misliney a cinakaŋ mi, cẽẽt ngi miprik naŋ na, a ram ng'ar hay ngi Bumbulvuŋ, ara dubunam gwat da mizli a diga. Ar nah si na, masay madiɗa ati mizli ngi cikeˀeheye, a ziloko mizli ngir ngila wuy madiɗa ng'ar kus ngi Yudeheye, dar a slinam nga zilo misliney tuwa ar dangaya.

²² Amma gawla tuwa mindilam a diga na, a lumaka taŋ ar dangaya ta. A dirba nah, a moko, a mbiɗaka mingiɓi taŋ, a ɓam:

²³ «I lumaka miviŋ ngi dangaya, i migica le kap kuy kuy, yo mijigina dangayaya, t'ada a miviŋ, amma ndra muwunaka wun na, i lumam mbur purla a huroˀo ta.»

²⁴ Madiɗa ngi mijigina hay ngi Bumbulvuŋhoy ati masay madiɗahay micinaka na, ɓi ngi misliney a ga taŋ welele teˀ. Ɓi nah a cuh kahana kahana na, a si na ka ta

²⁵ Amma mbur a ndilawa, a ɓa taŋ: «Puraka mizli kum migicaka taŋ zleˀe ar dangay tuwa, t'ani dedeŋ ar hay ngi Bumbulvuŋ, ara dubunam gwat da mizli.»

²⁶ Dar madiɗa ngi sojeheye, a ram ati gawla naŋhaya, ɓa a moko ti misliney a muŋ, amma ti gidaŋ ta ɓula, asi ara zluwunam, vur mizli mahizigaka taŋ ti ɗugur.

²⁷ A dirba taŋ mindiloko taŋ ar kus ngi ngila wuy madiɗa na, masay madiɗa a cufuɗa taŋ:

²⁸ «I tikukum le zleˀe kaŋ kaŋ wãˀ ɓa ki dubunam gwat da mizli ti slimiɗ ngi mbur nah ta ta kwa? Ani ki zliraka Zerusaleme le ti dubun kum nah, ki wuɗam ki poko zayɓi ngi muc ngi mbur nah nga hirnga ndra sukwani?»

²⁹ Amma Piyer ati misliney a mbiɗaka taŋ di: «Anja sey i cinam mi da Buymisemuŋ, mbak da mizli le jaka.

³⁰ Yesu, kum mikiɗaka vagay ti kum midiraka avu dum na, Bumisemuŋ ngi dideˀ ndraˀahaya, a slikiɗa le a muŋ.

³¹ Bumisemuŋ a gaŋ le ɗongor tir vay hazum naŋ, i Buy, yo i Milahavu, ɓa a biga jiviɗ ngi mbiɗa mevel da Israyeleye, yo ɓa mungra taŋhay a susuymom avra.

³² Ndr'i sedewo ngi ɓi migi nah vuna, ndra ati ˀUf Mipal, Buymisemuŋ muvula da mizli macinakaŋ mi.»

³³ Mingiɓi hana, a ja mevel le haɗi da mizli ngir kus ngi ngila wuy madiɗa tuwa, hã a wuɗam ɓa a kiɗaka taŋ vagay vagay.

³⁴ Amma mbur Farisa mekelem ada, a zilaka Gamaliyel, i buy ngi Ɓi ngi Bumbulvuŋ, mizli gar ada ɗuvakaŋ hirngaŋ. A slikiɗ ar kus ngi ngila wuy madiɗa, a ɓi ɓa a bam ti mislineye ng'avra neˀ ɗagay.

³⁵ Dar a ɓi: «Kum Israyeley, jam lesl kuy kuy angi gwat kum masa gaka da mizli hanayna.

³⁶ Angi hin mucohomoy aka zleˀe na, Tewdas a ndilawa, a wa vu naŋ kaɓa i mbur muɗongor, a jumo mizli gwat ngi skat skat mufaɗ ng'avaŋ. Amma naŋ ti hirnga naŋ, a kiɗaka le, yo misipi naŋhay gar kwana, a zliɗam hirnga le, ko mindir loŋ anta.

³⁷ A dirba nah ma kwana, Yudas, mbur Galile, a ndilawa ar hin ngi slufavu. A ɗiɗi zigiduw haɗi aseˀeŋ. Naŋ vuna, a zizakaŋ le, joˀ misipi naŋhay gar a zliɗam hirnga.

³⁸ Ani wurenna, yi ɓukum so na, ki giram vu kum asi mizli hanayna mata, pulaka taŋ, a ram. Asi mike na, da wuluk taŋ ati slra taŋ, a bo tivi mizli na, a sa kiɗ mi pal naŋ si.

³⁹ Da a bo ti vu Buymisemuŋ na, ki susuyumoko ɓi nah gu ta. Ki murom tak ta na, ki gam di i gwat ngi gi vurum ati Buymisemuŋ!» Mizli ngir kus ngi ngila wuyo, a tiɓaka ɓi naŋ le.

⁴⁰ A ziloko misliney a muŋ, a sliɗaka taŋ ti laway, a tikaka taŋ kaŋ kaŋ, ɓa a zilaka slimiɗ ngi Yesu mata, a pulaka taŋ.

⁴¹ Dar misliney a bam ti mbuŋ mingila wuyoyo, a mumulom haɗi, asi Buymisemuŋ a pura taŋ a ndilaka le, ɓa a sam bonoy asi slimiɗ ngi Yesu.

⁴² Vur hin gar na, ara dubunam gwat da mizli ar hay ngi Bumbulvuŋ waɗ a hay taŋhay ma gar, ara tilam mi ti Ɓimezle ngi Yesu Mesi na, manja muskavu.