SLRA 25 - Bible en langue guiziga

Pol mucufuɗ ɓa sey magaŋ kiita i buy mimadiɗa ngi Roma

¹ Festus a ndilo le angi hirwuy naŋ miwaŋ, hin makir a dirba nah na, a slikiɗ ti buy mimadiɗa, aru nga Zeruzalem.

² Masay madiɗahay ati madiɗa ngi wuzla Yudeheye, a soko nga mbuŋ naŋ ɓa a wudam ti Polo. A hurdumom hirdam,

³ a tumbuloko Festuso, ɓa a jina taŋ, a mi ti Polo nga Zeruzalem. Wãˀ naŋ na, a wuɗam ɓa ara pakaŋ hiri a jiviɗ, ɓa a kiɗaka vagay.

⁴ Festus a mbiɗa taŋ di: «Polo, naŋ ar dangay a buy mimadiɗa, yo neˀ ng'aka na, ya vuna, i ra mi le.»

⁵ A ɓa taŋ ma: «Anja i ram bumoˀ ati mizli madiɗa kumoyo nga buy mimadiɗa, yo da a gi gwat mizlir ta le na, a wudam di so.»

⁶ Festus a cifi a hay taŋ, a fina hin dangafaɗ malla kuruˀo ta. A dirba naŋ mindil ndil a buy mimadiɗa, li naŋ muwun si na, a cifi ar kiita, a ɓi ɓa a soko ti Polo.

⁷ Ti Pol mindilo akẽh na, Yudehey musoko baɗ a Zerusaleme, a gunoko hirnga naŋ gun, a kupakaŋ ɓi malambaˀ madiɗahay haɗi wãˀ. Amma a ndilaka ngi biga wala nah kahana kahana gu ta ma.

⁸ Pol a ɓa ɓi ngi laha hirnga naŋ tuwa ma ni, a ɓi: «Yi gi malambaˀ ko neˀ ɗaˀ ar ɓimujuwa ngi Yudeheye ta, ko vur hay ngi Bumbulvuŋ, ko vur buy mimadiɗa ngi Roma kwana, yi gi ta.»

⁹ Festus a wuɗ ɓa a gi gwat ngi cira hiri da Yudeheye, vurˀe, a cufuɗa Polo: «Ki tiɓa le ngi ru nga Zerusaleme, ɓa ara gaka kiita ngi ɓi ɗik a mbuŋ ɗu a diga kwa?»

¹⁰ Amma Pol a ɓi: «Ya mideŋ hana a mbuŋ kiita ngi buy mimadiɗa ta kwa? Yi wuɗ sey a gikiy kiita ɗu aka cummo. Yi zluɓ ɓi ko neˀ avu Yudeheye ta. Ka ti hirnga ɗik vuna, ki si na le kuy kuy ta kwa?

¹¹ Da kaɓa i gi gwat le gisiŋ, yo da yi gi malambaˀ madiɗa, mindila le zliv ɓa a kiɗikiy vagay na, y'anta zluwun ti muco ta. Amma da ɓi taŋ makupikiy di na, da ɓi midar anta anga ta na, mbur misi ti jiviɗ ɓa a vuliy asi haŋ taŋ gu anta. Yi cufuɗ ɓa a slinikiy ng'avu buy mimadiɗa ngi Roma.»

¹² A dirba Festus mingilam wuy ati mizli ngi mamay naŋhay na, a mbiɗa da Polo: «Ka mucufuɗ ɓa a slinukuw ng'avu buy mimadiɗa na, kisa ru so.»

Pol a mbuŋ buy Agripa ati Berenic

¹³ A gam hin neˀ, a dirba nah, buy Agripa ati Berenis a ndiloko a buy mimadiɗa, ɓa a jaka haŋ da Festuso.

¹⁴ Ti taŋ mizikam a diga hin neˀ na, Festus a fa ɓi ngi Polo fet da buyo, a ɓaŋ: «Mbur mekelem ada aka, buy Felikse mupula ar dangay zleˀe.

¹⁵ Ti ya muru a Zeruzalem na, masay madiɗahay ati micawwa ngi wuzla Yudeheye, a soko wudam di, a cufuɗikiy ɓa yi gaŋ ti kiita.

¹⁶ Yi mbiɗa taŋ di: ‹Da a jaka ɓi le da mburo, a zliraka taŋ mi ati mizli mijakaŋ ɓi vuna ta, yo a pulakaŋ jiviɗ ɓa a ɓa ɓi ngi laha hirnga naŋ tir ɓi mijakaŋ di vuna ta si na, ɓa a vulaka mbur nah, a gakaŋ kiita na, jiviɗ naŋ anta avu Romahaya ta.›

¹⁷ A dirba nah, a soko ng'aka, ko a pulikiy i hin neˀ kwaɗay ta, amma li naŋ muwun si na, yi cifi ar li gi kiita, i ɓi ɓa a soko ti Polo.

¹⁸ Mizli mukupakaŋ ɓi tuwa, mukusom gun hirnga naŋ na, ɓi malambaˀ midar, naŋ miga kaɓa ya mawulka zleˀe na, ko a ɓam ta.

¹⁹ Sey taŋ mitiram asi ɓi ngi sipi jiviɗ nga taŋ pal taŋ, yo asi ɓi ngi mbur mazilaka Yesu, a muc le, amma Pol a ɓi na, naŋ da ti siifa.

²⁰ Yi si na pulaˀavra naŋ, ɓa yi ɓi kini ta, dar yi cufuɗaŋ: ‹Ki wuɗ ru le nga Zerusaleme, ɓa ara gukuw kiita ɗik a diga kwa?›

²¹ Amma Pol a cufuɗ ɓa sey i buy mimadiɗa masa slaŋ kiita naŋ. Dar yi ɓi ɓa a jiginakaŋ ar dangaya, hã ti ya masa slin di nga mbuŋ buy mimadiɗa.»

²² Ar nah na, Agripa a ɓa Festuso: «Ya kwana, yi wuɗ cine mingiɓi ngi mbur nah vuna ya.» Festus a mbiɗaŋ di: «Ti prik ti prike, kisa cinaŋ.»

²³ Li naŋ muwun na, Agripa ati Berenis a soko ti dudok haɗi. A cam ng'ar hay ngi kiita. Buy ngi sojehey waɗ mizli madiɗa ngir walahaya sek asi taŋ. Festus a ɓi ɓa a soko ti Polo.

²⁴ Joˀ Festus a zla ɓi: «Buy Agripa, ati kum misi ati ndra aka gar, ki ra puraka mbur misenna. Mizli Yudehey keɗeɗe, a soko lumikiy ti ɓi naŋ a Zerusaleme, yo a ndiloko hã aka, a tilam mi: ‹Anja a pulakaŋ ti siifa mata.›

²⁵ Ti vi ya na, yi lum gwat naŋ miga, ɓa a kiɗakaŋ vagaya ta. Ani naŋ vuna, a cufuɗ le ɓa slinakaŋ da buy mimadiɗa ngi Roma, i juwa le a mevel ɗu ɓa i slinaŋ di.

²⁶ Yi lum ɓi midar vurˀe, ɓa yi toho da buyo a haŋ ta. Ya muso di deŋ a mbuŋ kum na vurˀe, wãˀ naŋ na, a mbuŋ ɗik, ka buy Agripa, ɓa a dirba kiita misenna na, i sa lum ɓi ngi tuh neˀ vur naŋ kwani.

²⁷ Asi mike na, mbur dangay misinaka a wudam di hĩˀĩ asi ɓi hana ta si na, naŋ jeŋ avu ya ɓa yi slin di ta.»