SLRA 21 - Bible en langue guiziga

Pol muru nga Zeruzalem

¹ A dirba ndra muwunkam ati taŋ na, i cam palalam, i ram deŋŋe nga Kos. Li naŋ muwun na, i ram nga Rodes, i slikiɗam baɗ a diga, i ram nga Patara.

² I lumam palalam maru nga Fenisi, i cam, dar i ram.

³ I ndilam gweˀ avu Sipre. I sa kam ɓaˀ murciki naŋ, i pulaka matura tir vay muŋ naŋ, i ram kini nga Siri, i ra pam sar a Tir, asi palalam a sa pi sar ti gwataya a diga.

⁴ I lumam mitiɓihey a diga, i gam hin tarnaˀ ati taŋ. ˀUf Mipal a ga ɓa mitiɓihey a ɓaka Polo, anja aru nga Zerusaleme ta.

⁵ Amma a dirba ndra mikiɗaka mi ngi hin tarnaˀ na, i zuɓam jiviɗ, i ra ram. Taŋ tuwa gar, ngwas taŋhay ati ziri taŋhay gar, a kisam ndra sesẽŋ a duba gala. I dilkam a mi yam a diga, dar i diram dibiɗi.

⁶ A dirba ndra mimbiɗam mi ati taŋ na, ndr'i cam palalam, joˀ taŋ kwana a mam ngi hay taŋhay a muŋ.

⁷ Ndra kwana, a dirba ndra munguroko baɗ a Tire na, i kiɗaka mi ngi ru ti palalama a Potolomayis. A dirba ndra mijaka haŋ da sukum ndra mitiɓiheye na, i vam hiipas bumoˀ.

⁸ Li naŋ muwun na, i slikiɗam, i ra ndilam a buy mimadiɗa, i ram ngi hay Filip, mbur maliˀi ti tila mi ti Ɓimezle, mbur ngi wuzla mizli mitarnaˀhay muwunaka taŋ a Zeruzalem tuwa, i pam sar a hay naŋ.

⁹ Filipe naŋ da ti ziri diili mungbuˀ ngbuˀhoy mufaɗ, maɓam ɓi ngi gwat masa gi tumbuŋ.

¹⁰ Ndr'ada, i gam le a diga hin mbeˀ mbeˀe, mijiviɗ ngi Buymisemuŋ a ndilo baɗ angi hirwuy Yude, a zilaka Agabus.

¹¹ A so luuma ndra, a zuɓa kanda ngi Polo, a juwa saray ati haŋ naŋhaya, dar a ɓi: «Cinaka, ˀUf Mipal maɓi: ‹Mbur misi kanda hana na, Yudehey a sa juwaka a Zerusaleme kahana ya, a sa vulakaŋ asi haŋ ngi mizli Yudehey ta.›»

¹² Ti ndra micinaka mingiɓi hana na, ndra ati sukum ndra mitiɓi ngir walahaya, i tumbuloko Polo, ɓa anja aru nga Zerusaleme ta.

¹³ Dar a mbiɗa ndra di: «Ki tuwam, yo ki slikiy mevel vur mike? I juw vu le, ɓa a juwikiy ti juw tew ta ma, amma ɓa yi muc a Zeruzalem asi slimiɗ ngi Buy Yesu.»

¹⁴ N'anta ngum tiɓa mi ndra ta, ndr'i hurdumom ti ɓi nah mata, i ɓam: «Anja a gi ka Bumbulvuŋ mawuɗ si.»

¹⁵ A dirba hin tayna na, ndr'i juwam vu, a kiɗ mi le si, i ram kini nga Zerusaleme.

¹⁶ Mitiɓi ngi buy mimadiɗahay makisam ndra na, ara pam sar ti ndra a hay Manasoŋ, mbur Sipre, i mbur mitiɓi misi zle nga dana ta.

Pol muru nga pura Zak

¹⁷ Ti ndra mindilam a Zerusaleme na, sukum ndra mitiɓiheye, a tiɓam ndra ti mumul.

¹⁸ Li naŋ muwun na, Pol aru ti ndra ngi hay Zak, micawwa ngi wuzla misikristuhoy gar a kusom le a diga ya.

¹⁹ Pol a ja taŋ haŋ, gwat Buymisemuŋ miga gar a wuzla mizli Yudehey ta, asi slra naŋ gar na, Pol a slufa taŋ di pislek pislek.

²⁰ Micin naŋhay gar na, a hunumaka Buymisemuŋ, a ɓaka Polo: «Sukum ndra, pura aka na, Yudehey gwat ngi durmuk mbeˀ mbeˀ mitiɓaka ɓi misenna, ɓimujuwa na, ara jaka ɓi nah a hirnga ti gidaŋ na si.

²¹ Ka madubuna gwat da Yude ngi wuzla sukwi mekelemey gar, ɓa a pulaka ɓimujuwa ngi Moyise, ɓa a caka ziri taŋhay a mizawa ta, yo ɓa a sipaka ɓi ngi mezegweley mata na, taŋ a cinaka le.

²² Ani mbri ska? Ko mbri na, a sa sinaka, k'ada aka zleˀe si.

²³ Ɓi ndra mawuɗam i ɓukuw di na, ga so. Ndr'ada ti mizli mufaɗ aka, a jaka mi ngi Buymisemuŋ t'aruŋ.

²⁴ A ram bumoˀ, kiɗaka mi ngi gi mezegwel ngi buna vu kumo bumoˀ ati taŋ. Vula gwat ngi ɗuva sliwiɗ avu hirnga taŋ. Kanah na, ɓa a sa hijaka hirnga zuy muduba, ɓa mizli gar a sa sinaka ɓi taŋ micinaka vur ka gar na, i slir, amma ka vuna kwana, ɓimujuwa kwana na, kite ki ra ja a hirnga ya.

²⁵ Amma mizli Yudehey ta mitiram misikristuhoy na, gwat ndra mawuɗam ngi gi ngi gi gar na, i tohoko taŋ ɓi nah le: Gwat mislaka ˀay naŋ ngi gi kuli, pumbus malla gwat muɓuto ti ɓut na, anja a zumam ta. Yo anja a gam sulome ta.»

²⁶ Li naŋ muwun na, Pol a hila mizli mumufaɗ tayna tuwa, a zla gi mezegwel ngi buna vu ar li purla ati taŋ tuwa. Joˀ aru ng'ar hay ngi Bumbulvuŋ, ɓa ngi ɗuva hin ngi mezegwel ngi buna vu masa kiɗ mi, yo i naŋ masa vula gwat ngi gi mikuli a hirnga taŋ pal pal gar.

Mijaka Pol ar hay ngi Bumbulvuŋ

²⁷ Angi kiɗa mi ngi hin mitarnaˀ naŋ na, Yude ngi Azihey a puraka Polo le ar hay ngi Bumbulvuŋ, a slikiɗaka mevel da zigiduwo gar, dar a jaka Polo.

²⁸ A tilam mi: «Israyeley, gawla kilawa! Mbur maɓi ɓi malambaˀ ar mizli Israyeley, ar Ɓimujuwawaɗ waɗ ar hay ngi Bumbulvuŋ tuwa, n'ani. Ko amaka gar, yo ko da waka gar na, ara til di mi, hã ani a co ti Grekey ng'ar Hay ngi Bumbulvuŋ aka. Naŋ kine, ara hirya li Mipal hana.»

²⁹ Asi a puraka Trofim ngi Efeze le ati Pol ar walahaya, taŋ a waka na, kaɓa Pol a ci di le ng'ar Hay ngi Bumbulvuŋ.

³⁰ Mizli a wusam haɓar haɓar ar walahaya gar, joˀ zigiduw a jo hirbis hirbis. A jaka Polo, a ɗiɗaka, a bam di tir Hay ngi Bumbulvuŋ. Dar a gicaka mizlingreheye kutum si.

³¹ A wuɗam kiɗa Polo zleˀe vagay, amma ɓi naŋ a ndil kutum avu buy ngi soje ngi Romahaya, a ɓam: «Mizli Zerusalemey keɗeɗe gar ara wusam haɓar haɓar.»

³² Buy ngi sojehey tuwa, a hil sojehey ati madiɗa taŋhay kutum si, a kilam ng'avi zigiduwo. Taŋ mupuraka buy ngi sojehey ati sojeheye keɗ na, a pulaka kiɗa Polo.

³³ Dar buy ngi sojehey tuwa a ru, a ja Polo, a ɓi ɓa a juwaka ti celeluhoy cuw. A dirba nah, a wuɗ ɓa a si na Pol vuna i waka, yo a gi mike?

³⁴ Amma mbur gar a tilo mi ti a wuzla mizli, a ɓi pal avu ngi cala pal avu ngi cala. Buy ngi sojehey a lum ɓi mikaslsla ta, asi mi muwuwwo tuwa, a ɓi ɓa sojehey a ram ti Polo ng'ar hay ngi sojehey.

³⁵ Hirak ti Pol mindil ar li ngi jiɗ ngi haya na, hã sojehey a zuɓaka nga muŋ, asi mevel ngi mizli a slikiɗ le haɗi wãˀ.

³⁶ Asi mizli keɗeɗe ara wudam aseˀe, a ɓam: «Kiɗaka vagay!»

Polo miɓi ɓi ngi laha hirnga naŋ

³⁷ Hirak ti taŋ mawuɗam a cam di ng'ar hay ngi sojehey tuwa na, Polo ɓa buy ngi sojeheye: «Ani yi ɓuw ɓi purla gu kwa?» Buy ngi sojehey a mbiɗaŋ di: «Ki si na mi Greke le kwa?

³⁸ Ki mbur Ezipte mislikiɗa mevel da mufuyovuhoy durmuk mufaɗ wureˀ ani, ki bi taŋ nga ɓuh tuwa ta kwa?»

³⁹ Polo maŋ di: «Yi mbur Yude. A yikiy a Tarse, hirwuy Silisi. Yi mangal ngir walahay micawwa. Ambuh, puliy jiviɗ ɓa yi ɓa mizli ta kwa.»

⁴⁰ Buy ngi sojehey a pulaŋ jiviɗe. Polo deŋ ar li ngi jiɗ ngi haya, a guvuca haŋ da mizli ɓa a taˀaka mi. Taŋ miteteˀ teteˀ na, Pol a zla a ɓa taŋ ti mi Heber.