SLRA 19 - Bible en langue guiziga

Pol a Efez

¹ Ti Apolos muro a Korenti na, Pol a cuh ti hirwuy muwãhaya, hã ara ndil a Efez. A lum mitiɓiheye le a diga neˀe.

² Joˀ a cufuɗa taŋ: «Ti kum mitiram mitiɓihey na, ki lumam ˀUf Mipala le kwa mbrike?» Taŋ a mbiɗakaŋ di: «ˀUf Mipal ada na, ko i cinam ɓi nah ɗaˀ ta wãˀ.»

³ Dar Pol a cufuɗa taŋ ma: «Na, ki lumam di i ci ar yam wana ska?» A mbiɗakaŋ di: «Ci ar yam ngi Zaŋ.»

⁴ Pol a ɓa taŋ ma: «Zaŋ a ci ar yama, i mizli mawuɗam mbiɗa mevel taŋ, a ɓa mizli ɓa a tiɓaka mbur masa sawa a dirba naŋ na, mbiɗeˀvra Yesu.»

⁵ A dirba taŋ micinaka na, a caka taŋ ar yam ti slimiɗ ngi Buy Yesu.

⁶ Pol a buca taŋ haŋ a hirnga, dar ˀUf Mipal a so ar taŋ. A zlaka a ɓam ti mi manja sin, yo a ɓam ɓi ngi gwat masa gi tumbuŋ.

⁷ Taŋ gar a gam gwat ngi mizli kuruˀ nga cuw.

⁸ Pol aru ng'ar hay ngi diradibiɗ ngi Yudehey, a gi kiya makir ar li tila mi ti Ɓimezle ngi Zumabuy ngi Buymisemuŋ, ko a zluwun ta. A hurdum hirdam ɓa mizli a tiɓakaŋ.

⁹ Amma mizli mekelemey a ngumam cin ta, hirnga taŋ gidaŋ, a ɓam ɓi malambaˀ njah njah a mbuŋ mizli gar vur jiviɗ ngi Buymisemuŋ. Dar Pol a wunkam ati taŋ, a hila mitiɓiheye pal taŋ, a dubuna taŋ gwat vur hin gar ar hay ngi lekol ngi Tiranus.

¹⁰ Pol a zik di vi cuw, hã Yudehey ati Grek ngi hirwuy Azi gar, a cinam ɓi ngi Bumbulvuŋ.

Ziri mizile ngi Sevahay

¹¹ Buymisemuŋ a gi cekene madiɗahay haɗi teˀ ti haŋ Polo,

¹² hã mizli a zuɓaka kecekece ngi puya liriɓi, malla zana muwusa Pol le duk gar, ɓa a soŋhoko taŋ da misi jijiheye. Dar jiji a muɗ mi tivi taŋ, yo setenehey a bam tivi taŋ.

¹³ Yudehey ada, maram ti liˀi ngi ɓula setenehey. A tutumaka ngi gi kanah ti zila slimiɗ ngi Buy Yesu ya, a ɓaka taŋ: «Yi ɓukum ti slimiɗ ngi Yesu, Pol matil di mi hana, bam.»

¹⁴ Mututumaka gi naŋ kahana, i ziri ngi Sevahay tarnaˀ, masay madiɗa ngi Yudehey.

¹⁵ Amma setene a mbiɗa taŋ di: «Yi si na Yesu le, yo yi si na Polo le. Na kumo, kum i waniyka?»

¹⁶ Dar mbur misi setene a hirnga tuwa, a jiɗ bir ti gidaŋ ng'ar taŋ gar, a zliɗa taŋ hirnga mber mber, hã a kilam ti haya kwacay ɓaˀɓaˀ ti mi, vu plot plot ti waˀa.

¹⁷ Yudehey ati Grekey ngir walahay Efez gar a cinaka labara misenna le. Zluwun a ga taŋ le gar, joˀ mizli a ɗuvaka hirnga da slimiɗ ngi Buy Yesu.

¹⁸ Mizli miteŋteŋhey zigiduw taˀ, a soko njikaka gwat ngi gi taŋ misi zleˀe, ˀay paɗ a muŋ.

¹⁹ Mizli haɗi a wuzla misi keteleheye, a soko ti ɗerewol taŋhaya, a cikilaka taŋ zit ar leˀe, a wuraka taŋ a mihiri ngi mizli gar. Cikili taŋ jommo na, a gi gwat gabal kukur zlum.

²⁰ Naŋ kine, mingiɓi ngi Bumbulvuŋ ara njih ti gidaŋ, ko amaka gar, ara biga naŋ ti gidaŋ.

Mizli mislikiɗam ɓi a Efez

²¹ A dirba ɓi migi hana na, Pol a juwa le a mevele, ɓa aru nga Zeruzalem, a sa cuh bal ti Maseduwan waɗ ti Akay, a ɓi: «Da ya misa ndil le a diga na, i sa ru gbaˀ a Roma.»

²² A slin ti mijini naŋhay cuw nga Maseduwan, ti Timote ati Eraste, amma naŋ vuna, a hin neˀ a Azi ava.

²³ Ti hin nah na, ɓi a slikiɗ haɗi asi ɓi ngi sipa jiviɗ ngi Buymisemuŋ.

²⁴ Asi mike na, mbur ada, a zilaka Demetriyus, i muvuɗu. A vuɗ hay ngi kuli mazilaka Artemis, ti ɓiri baraŋ. Migi slra naŋhay ara lumam di zlili haɗi teˀe.

²⁵ A kuso migi slra naŋhay ati midigwi naŋ muvuɗ mekelemeye gar, a ɓa taŋ: «Ngama ɗuwoy, ki sinaka le, gwat ngi lum ndra gar a bo ti ngi slra misenna.

²⁶ Kum ada puraka, yo kum ada cinaka ta kwa? A Efez tew ta ma, amma kite zlar hirwuy Azi gar, mbur mazilaka Pol nah na a ɓi: ‹Kulihey kum mavuɗaka taŋ, ɓa ki dilkam a mbuŋ taŋ na, i gwat ngi huruk huruk a mbuŋ taŋ gisiŋ ta.› Ɓi nah a wusa zigiduwo le gar, ara tiɓakaŋ.

²⁷ Anta sa hĩhĩy di i slra ndra hana tew ta, amma ko hay ngi Artemis madiɗa na kwana, mizli a sa pulaka zila slimiɗ naŋ muduba, yo neˀ neˀ na, Artemise, mizli ngi Azihey ati duniya fuk gar madilkam a mbuŋ naŋ na, anta sa ɗuvakaŋ hirnga mata.»

²⁸ Naŋ miɓi kahana na, mizli micinaka, a jam mevel haɗi, a zlaka a tilam mi teˀ le ta, a ɓam: «Artemis ngi Efez i madiɗa!»

²⁹ Mizli ngir walahay gar ara wusam haɓar haɓar. A kusom tiŋ a diga tiŋ a diga, a jaka Maseduwanay mazuɓam mulak bumoˀ ati Polo ng'ar li gi dungur taŋ, i ti Gayus ati Aristarke.

³⁰ Pol a juwa le a mevele, ɓa aru nga wuzla zigiduwo.

³¹ Mizli mekelemey a wuzla mizli madiɗa ngi Aziheye, a slinoko ɓa a tumbulokoŋ: anja aru ng'ar li gi dunguro ta.

³² Mbur gar a widi, a ɓi pal avu ngi cil naŋ, pal avu ngi cil naŋ, a ga mizli le welele teˀe. A kusom hĩˀĩ asi ɓi mike na, vendeke ngi mizli a si na ka ta

³³ Mizli mekelemey a wuzla zigiduwo, a ɓaka ɓi nah da Alekzandir, mbur Yudehey macicaka a mbuŋ taŋ. Dar Alekzandir a zuɓa haŋ, ɓa a ɓi a mbuŋ zigiduwo.

³⁴ Ti taŋ misinaka sin i mbur Yude na, taŋ gar a wudam, a ɓam ˀay purla: «Artemis ngi Efez i madiɗa!» hã a zikam di gweˀ ng'avi ler cuw.

³⁵ Yawwa, mbur mutoho gwat ngir walahaya, a tisla mevel ngi zigiduwo le gu, a ɓa taŋ: «Hey, mizli Efezey, Efez walahay ngi Artemis madiɗa ati foto naŋ midiɗo paɗ ti muŋ na, mbur misina ta, ada kwa?

³⁶ Na zle, mbiɗi mi anta cuw cuw ta si, zuwen cifam teˀ teˀ, anja ki gam gwat manja wuluk ta.

³⁷ Mizli a hulom gwat ar hay kuli ndra ta, ko a zaka kuli ndra ta si na, ki soko taŋ ng'aka.

³⁸ Da Demetriyus ati migi slra naŋhaya, a wudam ti mbur le na, hin ngi gi kiita ada, mizli madiɗahay ada, anja zuwen a zilam vu ar kiita kasl ti nah so ayɗi.

³⁹ Yo da ki puram gwat mekelem le pal ma na, i cikil ngi mizli madiɗahay masa ɗiya ɓi nah muduba.

⁴⁰ I murom tak ta na, a sa kupam ndra ɓi vur cikil ndra hana, a sa ɓam ndra i slikiɗam ɓi le. Asi gwat mabiga cikil misi kahana, naŋ kaslsla na, anta.»

⁴¹ A dirba naŋ miɓi kanah na, a waha zigiduwo.