SLRA 18 - Bible en langue guiziga

Pol a Korenti

¹ A dirba Pol mupula Aten na, aru nga Korenti.

² A ji hirnga ti mbur Yude ada a diga, a zilaka Akilas, a ya ka a Pont. A soko ati ngwas naŋ Prisil wureˀe aruŋ ti Itali. Asi mike na, buy mazilaka Klod a juwa ɓi nah le, ɓa Yudehey gar, a pulaka hirwuy naŋ Roma. Pol aru nga pura ti Akilas ati ngwasa.

³ A cifi a hay taŋ, a gi slra, vur slra taŋ i misi purla ati taŋ vuna, i ji gabaga ngi ɗiya guɗuk.

⁴ Tapas sabat gar na, Pol a ɓi ɓi ar hay ngi diradibiɗ taŋ, a wuɗ ɓa Yudehey ati Grekey a tiɓaka ɓi naŋ.

⁵ Amma ti Silas ati Timote mindiloko ti Maseduwan na, Pol a vula vu naŋ wãˀ ngi tila mi tewle. A ɓa njah a mbuŋ Yudeheye: «Yesu i Mesi.»

⁶ Yudehey a tikakaŋ mi, yo a zakaŋ, dar Pol a hira lagwada ngi vu zana naŋ, a ɓa taŋ: «Anja pumbus kum a mbiɗi nga hirnga kum. Y'ara ta, zle wurenna, i sa ru sey ng'avi mizli Yudehey ta na.»

⁷ Naŋ mibi tir li nah na, aru ngi hay mbur mekelem ada, a zilaka Titiyus Yustus, i mbur mahuruk huruk a mbuŋ Buymisemuŋ, hay naŋ naŋ gweˀ aciki hay ngi diradibiɗ vuna si.

⁸ Krispus, buy ngi hay ngi diradibiɗe, naŋ ati hay naŋ gar, a tiɓaka ɓi ngi Buy Yesu le, yo mizli Korentihey haɗi, micinam ɓi ngi Pol na, a tiram mitiɓihey le, dar a caka taŋ ar yam.

⁹ Ngi duvuɗ mekelem ada na, Pol a pura Buymisemuŋ maɓaŋ ar kleŋ: «Anja ko ki zluwun ta, ka ɓi ka ɓi si, ki taˀa mi ta.

¹⁰ Asi y'ada ati ka, asi mizli ɗuwoy ada haɗi ar walahay hana, ko mbur masa zluw ngi guw malambaˀ anta.»

¹¹ Pol a cifi a diga, a gi vi pal ti reta, ara dubuna ɓi ngi Buymisemuŋ da mizli.

¹² Ti hin ngi Galiyoŋ mazum buy angi hirwuy Akaya na, Yudehey a jumom ˀay vur Polo, a ram di ng'ar li gi kiita.

¹³ A ɓaka buyo: «Mbur misenna a pa mi da mizli ɓa a dilkam a mbuŋ Buymisemuŋ ti jiviɗ mizlir avu ɓimujuwa ta.»

¹⁴ Pol a wuɗ a wuna mi ɓa a ɓi zleˀe, amma Galiyoŋ a mbiɗa da Yudeheye: «Kayya, Yudehey! Da ani i slra malambaˀ mihaɗi wãˀ, malla i mungra mekelem pal zleˀe na, anja ani i tiɓa widi kumo kaɓa naŋ kaslsla so.

¹⁵ Amma ani, tiri kumo, naŋ asi ɓi ngi dubun, ɓi ngi slimiɗey, yo asi ɓimujuwa ngi kum pal kum, hana i ɓi kum. Ya, y'anta ngum gi kiita misi kahana ta.»

¹⁶ Joˀ a ɓula taŋ tir li gi kiita avra.

¹⁷ Akẽh na, taŋ gar a jaka Sosten, buy ngi hay ngi diradibiɗe, a mbakaŋ ti kiɗ daˀ ar li gi kiita vuna si, amma Gliyoŋ a pura taŋ kinihhe.

Pol mimi nga Antiyos

¹⁸ Pol a cifi a Korenti, a zik haɗi ava ma. Dar a mbiɗa mi da sukum naŋ mitiɓiheye, a ci palalam nga Siri. Prisil ati Akilas a ki sakaŋ. Dumbuŋ na, a hica hirnga a Kaŋkere, asi jimi naŋ a mbuŋ Buymisemuŋ.

¹⁹ A ndilam a Efez, Pol a wunkam ati Akilas waɗ Prisil a diga. Naŋ aru ng'ar hay ngi diradibiɗi, a ɓa ɓi da Yudehey.

²⁰ Yudehey a cufuɗakaŋ ɓa a zik haɗi ati taŋ, amma naŋ a ngum ta.

²¹ Ti naŋ mira cuh so na, a ɓa taŋ na: «Da Buymisemuŋ a tiɓa le na, yi sa mo ngi hay kumo pas mekelem aruŋ.» A ci palalam a Efeze, a cuh.

²² Ti naŋ mindil a buy mimadiɗa na, aru gbaˀ a ja haŋ da Cikil ngi misikristuhoy a Zeruzaleme. Dar a cuh nga Antiyos.

²³ A zik hin neˀ a diga. A dirba nah, a mi aseˀeŋ aseˀeŋ, nga hirwuy Galat ati hirwuy Firigi, a vula gidaŋ da mitiɓihey gar.

Apolos mitil mi ti Ɓimezle a Efez waɗ a Korenti

²⁴ Mbur Yude mekelem ada, a zilaka Apolos, a ya ka a Alekzandri, a ndilawa a Efez. I mbur misina mingiɓi le ti jiviɗ naŋ ɗalla, a si na Ɓimutoho le kuy kuy wãˀ.

²⁵ A dubunakaŋ jiviɗ ngi Buymisemuŋ le kuy kuy. Naŋ ti lesl miwirwir haɗi. A tila mi, yo a dubuna ɓi ngi Yesu da mizli ti jiviɗ naŋ kaslsla. Amma a sin di i ɓi ngi ci ar yam ngi Zaŋ tewle si.

²⁶ A zla a ɓi ɓi manja zluwun ar hay ngi diradibiɗ ngi Yudeheye. Amma Akilas ati Prisil micinaka mingiɓi naŋ na, a zuɓakaŋ ngi hay taŋ, dar a bigakaŋ jiviɗ ngi Buymisemuŋ kuy kuy ava ma.

²⁷ Angi nah na, Apoloso naŋ ti may ngi cuh nga Akaya, mitiɓihey a hĩyãka le, a tohom ɗerewol da mitiɓi ngi digahaya, ɓa a tiɓakaŋ kuy kuy. Ti naŋ mindil a diga na, Buymisemuŋ a gaŋ mezle, a jina mitiɓiheye haɗi teˀe.

²⁸ Asi a cici le solok ti mingiɓi naŋ a mbuŋ Yudeheye, a ɓa taŋ njah njah a mbuŋ mizli gar, a zluɓaka le. A biga taŋ di ar Ɓimutoho na, Yesu i Mesi.