SLRA 15 - Bible en langue guiziga

Cikil madiɗa a Zeruzalem

¹ Mizli mekelemey a soko zle a Yude nga Antiyos. A zlaka a dubunaka gwat da mitiɓiheye, a ɓaka taŋ na: «Da ki cam mizaw kaɓa Moyis muɗuva ɓi naŋ na ta na, ki laham gu ta.»

² Pol ati Barnabasa, a tiram, a gam mi haɗi ati mizli tayna asi ɓi nah. Dar mitiɓihey a wulkam, ɓa Pol ati Barnabas waɗ mizli mekelemey avu taŋ, ara lumaka misliney ati mizli madiɗahay a Zerusaleme vur ɓi nah.

³ Cikil ngi misikristu ngi Antiyosoyo, a jinaka taŋ ti gwat ngi zuɓa mulaka. Ti taŋ macohom bal ti hirwuy Fenisi ati Samari na, a slufaka taŋ ɓi ngi mitiɓi ngi Derbeheye, a ɓaka taŋ: «Mizli Yudehey ta ngi digahaya, a mbuɗoko le ng'avi Buymisemuŋ.» Ɓi nah a vula taŋ mumul haɗi gar taŋ.

⁴ Ti taŋ mindilam a Zerusaleme na, i cikil ngi misikristu ngi digahay ati misliney waɗ mizli madiɗahay mitiɓaka taŋ mulaka. Dar a slufaka taŋ ɓi ngi gwat Buymisemuŋ miga gar tisi taŋ.

⁵ A dirba nah, Farisa mekelemey mitiram mitiɓiheye, a slikiɗam ɓa a jihiraka ɓi nah, a ɓam: «Sey a caka mizli Yudehey ta na a mizaw, yo a ɓaka taŋ, ɓa a sipaka ɓimuɗuva ngi Moyise ma kini.»

⁶ Dar misliney ati mizli madiɗahay a kusom ɓa a puraka ɓi nah.

⁷ Mizli ara ngilam mi haɗa haɗa, Piyer a slikiɗ, a ɓi: «Sukum ɗuwoy, ki sinaka le, Buymisemuŋ a winiy ya le, a wuzla kumo, zle nga dana ta, ɓa yi til mi ti Ɓimezle da mizli Yudehey ta na, yo a tiram mitiɓihey le.

⁸ Buymisemuŋ, misina mevel ngi mizli, a ga sedewo naŋ le, ti naŋ mislino taŋ ˀUf naŋ Mipala, kaɓa naŋ mislino ndra di na ya.

⁹ Gwat miwal wal anta ar wala ndra ati taŋ ko neˀ ta wãˀ. A buna taŋ mevele asi taŋ matuɓam.

¹⁰ Wurenna so na, ki wuɗam ki tikaka ˀay da mitiɓiheye ti galalaŋ mududok, ko dideˀ ndrahay, ko ndra vuna, i zuɓaka gu ɗaˀ ta. Na, Ki wuɗam jigina mi avu Buymisemuŋ ti gi kanah vur mike?

¹¹ I mukum hiri naŋ ava ma: i tiɓaka le, ndra milaham na, mbele mezle ngi Buy Yesu miga ndra di, misi purla ati taŋ na.»

¹² Dar zigiduw gar a cifi siriw. A dirba nah, mizli a cinaka ɓi ngi Barnabas ati Pol maslufaka ɓi ngi cekenehey ati gwat migam ɗaˀ tahay gar, Buymisemuŋ miga tisi taŋ a wuzla mizli Yudehey ta na.

¹³ A dirba taŋ mitikaka mingiɓi taŋ na, Zaka kwana, a sla ya, a ɓi: «Sukum ɗuwoy, cinaka mingiɓi ɗu!

¹⁴ Simoŋ a slufo ndra di le ani: Buymisemuŋ a ki slimiɗ le diga ar zli virzi naŋ, ɓa a wini mekelemey a wuzla taŋ da naŋ.

¹⁵ Na zle, gwat migi hana, a jam haŋ le ati mingiɓi ngi mijiviɗeye, asi Ɓimutoho a ɓi na:

¹⁶ ‹A dirba nah, yi sa mawa, yo hay ngi Davit mimbizli na, i sa ndira hiri naŋ a muŋ. Diŋhey na, i sa slikiɗa taŋ, i sa cica deŋ a muŋ.

¹⁷ Zle tapasa, mizli mindirama, a sa ram ti sipiy ya Bumbulvuŋ, jom ati sukwi ngi mizli gar mazilaka taŋ ti slimiɗ ɗu na. Hana i ɓi ngi Bumbulvuŋ miɓa, a gi di i gwat naŋ mutoho ɓi naŋ diga zlezle si.

¹⁸ A biga gwat tayna diga nga dana ta.›

¹⁹ «Avi ya na, mizli Yudehey ta mambuɗoko ng'avi Buymisemuŋ na, anja i vulaka taŋ gir mata.

²⁰ Amma zuwen i tohoko taŋ ɗerewol toh toh tewle, ɓa a hiryaka vu taŋ ti useˀ ngi kuli ta, ti gi sulome ta, gwat muɓuto ti ɓut waɗ pumbuso, anja a zumaka ta.

²¹ Naŋ kine, mitila mi ti ɓi ngi Moyise, ada ar walahay gar. Asi tapas sabat gar na, ara slufaka ar hay ngi diradibiɗeye.»

Misliney mislinam ti ɗerewol da mitiɓihey misi i Yudehey ta

²² Misliney ati mizli micawwahay a ngiɓam ˀay ati Cikil ngi misikristu keɗeɗe gar, dar a wulkam ɓa a wunam mizli a wuzla taŋ, a slinaka taŋ nga Antiyos ati Pol waɗ Barnabas. A winam Yude mazilaka Barsabas waɗ Silas, i mizli mihimaˀ ngi wuzla sukum taŋ mitiɓiheye.

²³ A slinaka taŋ ti ɗerewol ani, a ɓam anga na: «Kum sukum ndra Yudehey ta misi a Antiyos, a Siri ati Silisi, ndra misliney ati mizli madiɗahay waɗ sukum kumoy na, i ra ju kum haŋ.

²⁴ I cinaka na, mizli mekelemey a wuzla ndra ara muɗukum didak le, ɓa a hiryukum lesl ti mingiɓi taŋ. Mislinaka taŋ i ndra ta ngbaŋ.

²⁵ Vurˀe, ndr'i ngiɓam ˀay, i winam mizli ɓa i slinukum taŋ ati Pol waɗ Barnabasa, i mizli miteŋteŋ ndrahay.

²⁶ Taŋ i mizli muvulaka hirnga taŋ le asi slra ngi Buy ndra Yesu Kristu.

²⁷ I ra slinukum Yude ati Silasa so. A sa ɓukum ɓi ndra mutuhukum di vuna ti haŋ taŋ.

²⁸ Asi mike na, ˀUf Mipal ati ndra vuna, i wulkam na, ndr'anta ɗuvukum jijir mekelem mata. Sey gwat ngi gi cummohoy na si.

²⁹ Useˀ ngi kuli, pumbus malla gwat muɓuto ti ɓut gar na, ki zumaka ta. Yo ki gam sulome ta. Da ki pulaka gwat tayna le gar na, naɓa ki gam gwat mezle le. Zikam zuy so!»

³⁰ Dar a pulaka misliney tuwa, a ram nga Antiyoso. A kusoko zigiduw a diga, a vulaka taŋ ɗerewol mutohoko taŋ di tuwa.

³¹ Taŋ muslufaka slaf slaf na, a mumulom haɗi, asi a vula taŋ gidaŋ le.

³² Yude ati Silas, taŋ mijiviɗey na kwana, a jinaka taŋ, a vulaka taŋ gidaŋ ti mingiɓi haɗi.

³³ A zikam le a diga cawwa neˀe, a dirba nah, mitiɓihey a ɗuwulaka taŋ mi waɗ a mbiɗaka taŋ mi, ɓa a mam ng'avi mizli mislinoko taŋ na a muŋ. [

³⁴ Amma Silas a ngum cuh ta.]

³⁵ Pol ati Barnabasa, taŋ a cifam a Antiyos. Taŋ jom ati mizli mekelemey haɗi ma, ara dubunaka gwat da mizli, yo ara tilam mi ti Ɓimezle ngi Bumbulvuŋ.

Pol ati Barnabas muwunkam

³⁶ Zik neˀ a dirba nah na, Pol a ɓa Barnabasa: «Mukum nga pura sukum ndrahay ar walahay wal wal, ndra mitilam mi ti Ɓimezle ngi Bumbulvuŋ a diga a diga na, ɓa i ra puraka taŋ, da a roko mbrike na.»

³⁷ Barnabas a wuɗ aru ti Zaŋ mazilaka Marke na, asi taŋ ya.

³⁸ Amma Polo, naŋ anta ti may ngi ru di mata, asi a pula taŋ le zleˀe ɗaˀ a Pamfili, a gi slra ati taŋ mata.

³⁹ Hiryaˀay a gi le ar wala taŋ haɗi, hã a wunkam, mbur aru pal naŋ pal naŋ. Barnabas a zuɓa Marke, a cam palalam nga Sipre.

⁴⁰ Polo kwana, naŋ a zuɓ Silas, a ram. Sukum taŋhaya, a pulaka taŋ asi haŋ ngi Bumbulvuŋ ɓa a ga taŋ mezle.

⁴¹ Pol a bula hirwuy Siri ati Silisi ti vula gidaŋ da cikil ngi misikristuhoyo.