SLRA 12 - Bible en langue guiziga

Mikiɗaka Zak vagay, yo migicaka Piyer

¹ Hirak ti nah na, buy Herodo, a zla a guzuvra mizli mekelemey a wuzla Cikil ngi misikristuhoyo.

² A kiɗa Zak, sukum ngi Zaŋ vagay ti maslalam.

³ A dirba naŋ mupura Yudehey a hĩyãka ɓi nah le na, a ja Piyere ma, tapas hin ngi zuma ɗaf manja ˀis ara.

⁴ A dirba naŋ mija na, a caŋ ar dangay, a pula asi haŋ ngi gojehey mufaɗ mufaɗ taˀ taˀ mufaɗ, ɓa a jiginakaŋ. A wuluk na, a a dirba muguzlum ngi Paka, a sa gaŋ kiita a wuzla zigiduw.

⁵ Piyere, naŋ a ro ar dangay, amma Cikil ngi misikristuhoyo, a pulaka tumbulo Buymisemuŋ aseˀe mbak le ta wãˀ.

Piyer milih tir dangay

⁶ Duvuɗ ɓa li mara wun, Herod masa ga kiita da Piyer tuwa na, Piyer ara hinje ar wala ngi sojehey cuw, mujuwa le kaˀ kaˀ ti celeluhoy cuw, yo sojehey ada sek ar li ngi slra taŋ a mizlingre ma.

⁷ Amma gurjik si na, modro ngi Bumbulvuŋ a ndilawa, li taŋ majuwakaŋ anga tuwa, a pusluɗ njah. Modro tuwa, a vurka Piyere vrek vrek angi giliw, a puɗukoŋ, a ɓaŋ: «Slikiɗ kutum!» Celeluhoy a pam kwalal tivi haŋ ngi Piyere.

⁸ Dar modro tuwa a ɓaŋ ma: «Juwa kanda ɗike, ca taraka, juwa zeweɗ naŋhaya.» Piyer a ga kaɓa modro miɓaŋ di tuwa. Modro a ɓaŋ ma: «Gujuwa godo ɗike, sipiy.»

⁹ Piyer a bi aseˀeŋ. Gwat modro ngi Bumbulvuŋ maga na, Piyer a wa kaɓa i gisiŋ gisiŋ zleˀe ta, amma a wa kaɓa a pur di i gwat ti kleŋ.

¹⁰ A tuwuɗaka li gi slra ngi soje mudumbuŋhoyo, waɗ mucuw naŋ ma. Joˀ a ndilam a mizlingre ngi ɓiri mikini ng'ar walahaya. Mizlingre tuwa, a wun pikat pal naŋ a mbuŋ taŋ. A dirba taŋ mubam, a slaka boholo na, modro tuwa, a pula Piyere kutumo si.

¹¹ Dar lesl ngi Piyer a mo a muŋ so, a ɓi ti kwacay naŋ na: «Wurenna, i sla wala nah le muduba, i Bumbulvuŋ mislino modro naŋ gisiŋ, yo a lihiy le tisi haŋ ngi Herod waɗ tir gwat Yudehey makutukom ngi giy di gar na.»

¹² A dirba lesl naŋ mumo muduba na, aru ngi hay Mariya, mumuŋ ngi Zaŋ, Zaŋ micakaŋ slimiɗ ti migal Marke. Mizli a kusom le a diga haɗi, ara diram dibiɗ.

¹³ Ti naŋ mikiɗa palalam ngi mizlingre na, zuŋ diili migi slra ngi hay ada akẽh, a zilaka Rode, a so cinaŋ.

¹⁴ Rode a si na le, i ˀay ngi Piyer, a mumul haɗi, ɓa ngi wuna mizlingre jak na, a wuna ta. A mi ti kil, ara ɓa da mizli: «I Piyer misi a mizlingre!»

¹⁵ Mizli a ɓakaŋ: «Mibirngaŋ! «Amma naŋ, ara ɓa taŋ di na si, gisiŋ i slir ta. Dar a ɓam: «Arona i modro mijigin naŋ kwani.»

¹⁶ Amma Piyer ara kiɗa mizlingre na si. A wunaka mizlingre muduba so, a puraka na, i naŋ. A zuma taŋ hirnga le teˀe.

¹⁷ Piyer a guvuca taŋ haŋ ɓa a cifam teˀteˀe, dar a zla slufa taŋ ɓi Bumbulvuŋ mubo di tir dangaya. A kiɗa mi naŋ, a ɓa taŋ: «A ram, ɓaka ɓi naŋ da Zak ati sukum ndra mekelemey.» Dar a cuh, a zuɓ jiviɗ ng'ar li mekelem.

¹⁸ Li naŋ muwun na, sojehey a wusam haɓar haɓar, a ɓam: «Piyer na, a tiri mi ɗerre ka?»

¹⁹ Herod a ɓi ɓa ara supoko di, amma ko a lumaka ta. A cufuɗa ɓi naŋ avu soje mijigin naŋhaya, yo a ɓi ɓa a ram ti taŋ nga kiɗ vagay vagay. Dar Herod a slikiɗ baɗ a Yude, aru nga buy mimadiɗa, a zik a diga neˀe.

Muc ngi Herod

²⁰ Herod a ji mevel le haɗi teˀe, angi mizli ngi Tir ati ngi Sidoŋhoyo. Amma taŋ a ngiɓam ˀay, ɓa a soko nga mbuŋ naŋ. Joˀ a rucoko mi da Blastus, mbur madiɗa mijigina hay ngi buyo. A jina taŋ ngi ci ng'avi Herodo. A cufuɗaka Herodo ɓa a ndiram jam jam, asi hirwuy taŋ a lumo gwat ngi zumo ti ngi hirwuy ngi Herod vuna.

²¹ Hin ngi Herod muɗuva na, a ndila le. A ka zana naŋ ngi buyo, a cifi le ar janga naŋ, a sipa ɓi kwiliŋ kwiliŋ da mizli.

²² Mizli a wudam cəirəw cərəw, a ɓam: «Maɓi hana i Buymisemuŋ ta na, i mbur titra ta!»

²³ Amma angi nah vuna si na, modro ngi Bumbulvuŋ, a kiɗa Herodo, asi a ɗuva hirnga da Buymisemuŋ ta. Mumuyuŋ a zumaŋ, a mucu.

²⁴ Amma mingiɓi ngi Buymisemuŋ, ara ndaha li nga mbuŋ nga mbuŋ, ara sik.

²⁵ Barnabas ati Sawulo, ti taŋ mikiɗaka mi ngi slra taŋ a Zerusaleme na, a mam a muŋ, a ram ti Zaŋ micakaŋ slimiɗ ti migal Marke tuwa a haŋ.