RUTH 1 - Bible en langue guiziga

Bonoy a hay Elimelek

¹ Hirak ti migi kiytahay miwaka Israyel na, may a gi asi ruwuyo. Mbur Beteleyem ada a ruwuy Zuda, a slikiɗ kutum ng'ar prok ngi Moˀap ati ngwas naŋ waɗ ziri naŋ mizilehey cuw.

² A zilaka mbur vuna Elimelek, ngwas naŋ i Noˀemi waɗ ziri naŋ mizilehey cuw, i ti: Maloŋ ati Kiliyoŋ, i mizli Efrata ngi Beteleyem hirwuy Zuda. A ndilam ar prok ngi Moˀapa, a cifam a diga so.

³ Elimelek zil ngi Noˀemi tuwa, a mucu, Noˀemi a ndiram pal taŋ ati ziri naŋ mizilehey mucuw tuwa.

⁴ Ziri naŋhay tuwa, a zuɓam ngwasaya, i ziri Moˀapay, zuŋ numuŋ a zilaka Orpa, mucuw naŋ i Rut. A gam gwat ngi vi kuruˀ a diga.

⁵ A dirba nah, Maloŋ ati Kiliyoŋ tuwa, a micam cuw taŋ, Noˀemi a ndir pal naŋ, ziri naŋ mucuwoy ta, zil ta.

Rut mikisa Noˀemi nga Beteleyem

⁶ Akẽh na, Noˀemi a slikiɗam baɗ a Moˀapa ati ngwas ngi ziri naŋhay mucuwoy tuwa, asi ti naŋ misi ar Prok ngi Moˀapa, a cine na, Bumbulvuŋ ara ki slimiɗ ar mizli naŋhaya, ara vula taŋ gwat ngi mi gama kuy kuy.

⁷ A slikiɗam ati dideˀ naŋ mongosohoy mucuw tuwa, baɗ ar li taŋ misi anga. A mam nga ruwuy Zuda a muŋ.

⁸ Amma Noˀemi a ɓa dideˀ naŋhay mucuw tuwa: «Cohom, mbur gar aru ng'avu mumuŋ. Anja Bumbulvuŋ a gukum mezle, kaɓa kum migaka mezle da vagay ziri ɗuwoy waɗ da ya na ya.

⁹ Anja Bumbulvuŋ a ga, ki lumam zil mezlehey, mbur gar a cifi ar wuya a hay zil naŋ.» Dar a ja taŋ kuɓuy kuɓuy. Joˀ dideˀ naŋhay tuwa, a tuwam kaɗam kaɗam.

¹⁰ Akẽh na, a ɓakaŋ: «Ĩˀĩ! I mam bummoˀ nga wuzla mizli ɗikeye!»

¹¹ Amma Noˀemi a ɓa taŋ: «Mam ngi hay kumoy ziri ɗuwoy. Ki wuɗam ru asi ya vur mike? Y'ada i sa yi ziri mizileheye, ɓa a sa tiram zil kumoy aruŋ makwa?

¹² Mam ziri ɗuwoy, a ram, i gi gal le haɗi, i zuɓ zile gu mata. Na ko da yi ɓi le: Ko da ɗuva wuluk taˀ ngi luuma zuŋ ada aruŋ tekeɗe kwana, i lum zile duvuɗ dana dana gu, haˀaw i yi ziri mizileheye gu.

¹³ Na ki kutukoko taŋ ɓa a gilama gu kwa? Yo ki pulaka zuɓa zile vurˀe gu kwa? Kanah ta ziri ɗuwoy. I bonoy madiɗa wãˀ avu ya, fineˀ ngi kumo. Bumbulvuŋ a kiɗ di i ya a mi hutuŋ.»

¹⁴ Akẽh na, dideˀ naŋhay tuwa, a tuwam kaɗam kaɗam siima ni. A dirba nah, Orpa a ja dideˀ naŋ Noˀemi kuɓuy ngi mbiɗi mi. Amma Ruto, a ngum pulaŋ ta.

¹⁵ Noˀemi a ɓaŋ: «Pura gis ɗike, ara mi nga wuzla mizli naŋhay, ng'avu kuli naŋhay. Mi asi gis ɗik na ya.»

¹⁶ Amma Rut a ɓaŋ: «Ki hurdum ti ya hirdam, ɓa i puluw, i mi ngi hay ndra ta. Na, ar li ka masa ru, i ru ya, ar li ka masa cifi, i cifi ya. Mizli ɗikey a sa tiram mizli ɗuwoy. Bumbulvuŋ ɗike, a sa tiri Bumbulvuŋ ɗu.

¹⁷ Ar li ka masa muc a ra, ya kwana i sa muc a diga ya, a sa dikikiy a diga. Da i wunkam le ati ka, i muc muwunka ndra ta na, anja Bumbulvuŋ a kutiy ti bonoy mukuyta wãˀ.»

¹⁸ Noˀemi a pura keɗ keɗ na, Rut a hurdum di le ɓa aru aseˀeŋ. A pula ɓi nah teˀ muduba.

¹⁹ A ram zlaɓ zlaɓ cuw taŋ nga Beteleyeme. Ti taŋ mindilam a Beteleyeme na, ɓi taŋ a zuma hirnga le da mizli ngi walahaya gar. Ngwasay a ɓam: «I Noˀemi gisiŋ ya?»

²⁰ Amma naŋ a ɓa taŋ: «Ki zilikiy Noˀemi mata,, amma zilikiy Maara. Asi Buymisemuŋ misi gidaŋ wãˀ, a vuliy bonoy mukuyta wãˀ le.

²¹ Ti ya mucuh ti ka na, gwat a haŋ ndirvis. Na mana, Bumbulvuŋ a mo ti ya haŋ njoŋ ngataraŋ. Ki zilikiy Noˀemi na, ngi mi aruŋ maka? Asi Bumbulvuŋ a mbiɗi hirnga le avu ya, Buy misi gidaŋ wãˀa, a giy malambaˀ le.»

²² Noˀemi mumoko ti ruwuy Moˀap ati dideˀ naŋ Rut zuŋ ngir prok ngi Moˀap na, ɓi nah kahana so. A ndilam a Beteleyeme, hirak ti sifi ngi daw giziŋ.