ROMAHAY 9 - Bible en langue guiziga

Buymisemuŋ ati mizli naŋ muwuna taŋ

¹ Ya maɓi na, naŋ kaslsla, yi mbur ngi Kristu, y'anta gi slir ta. ˀUf Mipal ara bigiy di ar wuluk ngi mevel ɗu, i slir ta.

² I ra lik haɗi haɗi wãˀ a mevel ɗu, ara giriy, anta kiɗ mi ta.

³ Sukum ɗuwoy, muy ɗuwoy ngi pumbus ngi vu na, yi hĩyã le ɓa Buymisemuŋ a nisiy asi taŋ. Da ko yi tiri mbur ngi Kristu mata kwana, kal si.

⁴ Taŋ, i dideˀ ngi Israyeley, i ziri Buymisemuŋ migila taŋ. A vula taŋ dudok naŋ le, a jum ˀay le ati taŋ, a vula taŋ ɓimujuwa naŋ le, a biga taŋ jiviɗ ngi huruk huruk a mbuŋ naŋ le, a ɓa taŋ a sa vula taŋ gwatay.

⁵ Taŋ i ziri ngi dideˀ taŋ mudumbuŋhoy, yo Kristu mitiri mbur titra na kwana, a ya ka angi sukwi taŋ. Naŋ dum hirnga ngi gwatay gar, anja mizli a hunumaka Buymisemuŋ caˀa! Amin.

⁶ Dambalaka na, gwat Buymisemuŋ miɓa le ɗaˀ le na, ɓa a gi ta na anta. Asi mike na, tizer ngi Israyele, i Israyeley gar ta.

⁷ Yo dideˀ ngi Abrahamay kwana, i ziri ngi Abrahamay gar ta. Asi Buymisemuŋ a ɓa Abrahama: «A sa zilam tizer ɗik na, sey ti ziri ngi Izakay.»

⁸ Hana mbiɗeˀvra: ziri ngi Buymisemuŋhoy anta i ziri Abraham miya taŋ cummo ta. A sa zilam dideˀ ngi Abrahamay na, sey ziri Buymisemuŋ miɓaŋ di ɗaˀ le na tewle.

⁹ Asi Buymisemuŋ a ɓaŋ le ɗaˀ le ani: «Ya masa mawa li kahana didirba na, naɓa Sara a lum mangal le.»

¹⁰ I nah tewle ta ma. Ziri ngi Rebekahay ada cuw ma, cine taŋ purla, i dideˀ ndra Izak.

¹¹ Dambalaka ti Rebeka miya ziri naŋhay taruŋ, yo taŋ misinaka gimezle ati malambaˀ taruŋ si na, naɓa Buymisemuŋ a ɗiya jiviɗ naŋ mawuna mizli ka naŋ mawuɗo le si.

¹² Yo anta asi gwat ngi gi taŋ ta, amma a gi asi Buymisemuŋ mazila mizli na, a ɓa Rebeka: «Modogom a sa hin hirnga a mbuŋ meciɗeke.»

¹³ Naŋ kaɓa mutohoko ɓi naŋ miɓi: «Yi wuɗ di i Zakop, yi hirsa Esawa le.»

¹⁴ I sa ɓam mbri ska? Buymisemuŋ naŋ anta jeŋŋe ta kwa? Kanah ta wãˀ.

¹⁵ Asi mike na, a ɓa Moyise: «Mbur ya muwuɗ puraŋ ˀircece le na, i sa puraŋ ˀircece. Mbur ya muwuɗ gaŋ mezle le na, i sa gaŋ mezle.›

¹⁶ Nah so na, anta gi asi mbur muwuɗ le, malla asi gidaŋ ngi mbur ta, amma vur ˀircece ngi Buymisemuŋ.

¹⁷ Naŋ kine, Buymisemuŋ a ɓa Faraˀoŋ angi Ɓimutoho na: «Ya mucufuw ki buy na, hĩˀĩ ɓa yi biga gidaŋ ɗu ar ka, yo ɓa mizli ngi ruwuyoy kurzluˀ gar a zilaka slimiɗ ɗu.»

¹⁸ Naŋ kine, Buymisemuŋ a pur ˀircece da mbur naŋ muwuɗ le gar, yo mbur naŋ muwuɗ le ɓa a tiraŋ hirnga gidaŋ na, a tiraŋ di.

Buymisemuŋ a zuɓ himaˀ, yo a pur ˀircece ma

¹⁹ Asinta, mbur a sa ɓiy: «Da kine na, Buymisemuŋ a mbiɗa hirnga da mizli ngi mi aruŋ maka? Da Buymisemuŋ a wuɗ le a gi kanah na, masli himaˀ ava gu, i waka» kwani?

²⁰ Kay, ka mburu, i ka wa ɓa hã ki ngila mi da Buymisemuŋ ka? Ani, magayaka, a ɓa mindir naŋ: «Ki ndiriy kahana vur mike» na, a ɓaŋ gu kwa?

²¹ Mbur mindira gwata, a gi ti hohoyo kaɓa naŋ muwuɗ le ta kwa? Da a wuɗ le na, a zuɓa hohoy misi purla, a ndir di tutuŋhoy cuw: Pal hana, i tutuŋ mezle, yo pal numuŋ, i tutuŋ ho gar ta kwa?

²² Da Buymisemuŋ, a wuɗ biga himaˀ naŋ ati gidaŋ naŋ le avu mizli mekelemeye na, asi a ndilaka le ter ɓa a pa himaˀ naŋ angi taŋ, yo taŋ gweˀ ngi zizi. Dambalaka na, a ɓus di ni ɓi ti ɓus haɗi.

²³ Yo naŋ miga kanah na, asi a wuɗ le ɓa a biga gi dudok naŋ mihaɗi na da mizli naŋ mupura taŋ ˀircece, naŋ miɗiya taŋ daf dumbuŋ zleˀe, ɓa a sa lumam dudok na.

²⁴ I ndra mizli, naŋ muzulo ndra ti wuzla Yudehey tew ta, amma ti wuzla mizli mekelemey na ya.

²⁵ Naŋ kaɓa naŋ miɓa angi ɗerewol ngi mijiviɗ Oze: «Mizli ɗuwoy zleˀe ta na, i sa zila taŋ mizli ɗuwoy. Yo mizli ya mawuɗ taŋ zleˀe ta na, i sa zila taŋ mizli ya mawuɗ taŋ haɗa.

²⁶ Angi li naŋ miɓa taŋ: Kumo ki mizli ɗuwoy ta na, a sa zilaka taŋ ziri ngi Buymisemuŋ misi ti siifa.»

²⁷ Ezayi kwana, a til mi ti ɓi ngi Israyeleye, a ɓi na: «Ko da taˀ ngi Israyeleye, taŋ haɗi kaɓa muyuŋ a mizaw tekeɗe kwana, masa laham a wuzla taŋ, i mizli neˀkini si.

²⁸ Asi Bumbulvuŋ, ɓi naŋ miɓa le na, a sa ga wãˀ a ruwuyo kutum si.»

²⁹ Naŋ kaɓa Ezayi miɓa dumbuŋ zleˀe na ma: «Da Buy vurum mise amuŋ a pula ndra dideˀehey neˀ zleˀe ta na, anja ani i tiram le kaɓa Sodom, i bam vu le ati Gomor.»

Mizli matiɓaka Kritu na, Buymisemuŋ a tiri ti taŋ jeŋŋe

³⁰ I sa ɓam mbri ska? I sa ɓam: Mizli Yudehey ta masipam ɓa a ndiram jeŋŋe zleˀe ta na, Buymisemuŋ a ɗiya taŋ le jeŋŋe, asi tiɓi.

³¹ Na, Israyeley masipam ɓimujuwa, ɓa zliv a tiram jeŋŋe ti naŋ na, taŋ a lumaka ta jaka.

³² A lumaka ta vur mike? Asi mike na, taŋ a wuɗam ɓa a lumaka asi tiɓi ta, amma a waka na, a lumaka asi gwat ngi gi taŋ. Vurˀe, ɗugur mabi sara, a ba taŋ sar le.

³³ A gi le kaɓa Ɓimutoho miɓi: «Ani, i ra ka ɗugur ngi bi sar da mizli a Siyoŋ, mandazlay muwã ngi hizigiɗa vu. Amma ko wa mitiɓa le na, anta sa pi mesem ta wãˀ.»