ROMAHAY 6 - Bible en langue guiziga

Avu mungra, ndr'i mumucahay, amma ar ndra mujom ati Kristu na, ndra ti siifa

¹ I sa ɓam mbri ska? Zuwen i ndiram ar mungra ɓa Buymisemuŋ a ga ndra mezle haɗi kwa?

² Kay, kanah ta wãˀ! Avi ɓi ngi gi mungra na, ndr'i mumucahay ɓula. Na, i sa ndiram angi mungra mbri mbri aruŋ maka?

³ Ndra gar micam angi yam na, kite i jumom le ati Yesu Kristu, yo i micam le jom ati naŋ na, ki sinaka ta kwa?

⁴ Ndra micam angi yam tisi muc naŋ na, kite a dikam ndra le jom ati naŋ, ɓa Kristu mislikiɗ ti wuzla mumucahay ti dudok ngi Cine naŋ na, ndra kwana, gwat ngi gi ndra a mbiɗi le nawaya ya.

⁵ Asi da i jumom le zleˀe purla wãˀ ati naŋ ar muc naŋ na, naɓa i sa jumom purla wãˀ ati naŋ ar slikiɗ naŋ ti wuzla mumucahay aya.

⁶ Slukum wala ngi ɓi ani kuy kuy: dumvu ndra magala na, a diraka le jom ati Kristu avu dum mizlira, ɓa dumvu ndra magi mungra a hiryi. Yo ndr'i beke ngi mungrahay mata na vurˀeŋ.

⁷ Asi da mbur a muc le na, a lih le avu mungra.

⁸ Amma da i micam le ati Kristu na, naɓa i tiɓaka le, i sa ndiram ti siifa ati naŋ ya.

⁹ Asi mike na, i sinaka le, Kristu a slikiɗ le ti wuzla mumucahaya, naŋ anta sa muc mata. Muco, naŋ anta ti gidaŋ a hirnga naŋ mata.

¹⁰ Asi Yesu mumuc na, avu mungra, a muc is purla tewle. Naŋ misi ti siifa na, vur Buymisemuŋ.

¹¹ Naŋ kanah ya, kumo kwana, puraka vu kumo kaɓa ki micam le avu mungra. Amma ar kum mujom ati Yesu Kristu na, kum ti siifa vur Buymisemuŋ.

¹² Anja mungra a zum buy angi dumvu kum mamuc na mata, ɓa a gukum ki hĩyãm gwat ngi dumvu mata.

¹³ Hirzlik ngi dumvu kumoy na, anja ki gam taŋ slra ngi mungra kaɓa gwat ngi vurum ngi gi gwat mijeŋ ta na mata. Amma hirzlik kumoyo, taŋ kaɓa gwat ngi vurum ngi gi gwat mijeŋŋehey, yo kaɓa mizli misi ti siifahay mislikiɗam le ti wuzla mumucahay.

¹⁴ Asi mungra anta sa zum buy a hirnga kumo mata, vur kum anta luɓ luɓ avu ɓimujuwa na mata, amma kum luɓ luɓ avu gimezle ngi Buymisemuŋ.

I laham le tivi mungra, ngi tiri gawla ngi Buymisemuŋ

¹⁵ Mbri ska? Ani, ndra muluɓ luɓ avu gimezle ngi Buymisemuŋ, ndr'anta luɓ luɓ avu ɓimujuwa mata na, zuwen i gam mungra muduba sukwa? Kanah ta wãˀ si!

¹⁶ Da kum mira gam slra ngi mbur na, kum ka bekehey ɓa ki cinakaŋ mi, yo ki tiram beke naŋhay le ko da ngi gi slra ngi mungra maru ti mbur ng'ar mucu, malla ko da i slra ngi cine mi maru ti mbur nga ɗiyi jeŋŋe na, ki sinaka ta kwa?

¹⁷ Gukum sise da Buymisemuŋ! Kum i beke ngi mungrahay zleˀe, amma wurenna, dubun mupurla kum mitiɓaka na, ki jaka le a hirnga ti mevel purla.

¹⁸ Ki laham le ti vu mungra, joˀ ki tiram beke ngi gi gwat mijeŋŋe.

¹⁹ Ya maɓi ani ka mbur titra na, asi hĩhĩy ngi vu kum. Zleˀe na, ki pulaka dumvu kumo le ka beke ngi gi slra ngi dili ati gwat mibiyãˀ biyãˀ lambaˀ maga mburo, ɓa a slikiɗ ɓi avu Buymisemuŋ. Wurenna, pulaka vu kumo wãˀ ka beke ngi gi gwat mijeŋŋe, macira hiri da Buymisemuŋ.

²⁰ Ti kum misi i beke ngi mungrahay zleˀe na, mbur mutukukum ˀay ngi gi gwat mijeŋŋe anta.

²¹ Slra, kum migaka nah na, ki lumam di mi ska? Wurenna, ara gukum mesem takwa? Asi kiɗa mi naŋ na, i mucu.

²² Amma wurenna, ki laham le tivu mungra, ki tiram le i beke ngi Buymisemuŋhoy. Ki ra gam gwat maga ɓa mburo, a tiri ngi Buymisemuŋ, yo kiɗa mi naŋ, i siifa ngi sete.

²³ Asi migir ngi mbur magi mungra na, i mucu. Amma gwat Buymisemuŋ mavula ngatara na, i siifa ngi sete, asi ndra mujom ati Buy ndra Yesu Kristu.