ROMAHAY 3 - Bible en langue guiziga

¹ Na, da naŋ kanah na, mbur Yude a fini vu ti mike? Ci mizawa, a pul gir ngi mike?

² Gwat mupuɗaw ada anga haɗi gisiŋ. Buymisemuŋ minjika mingiɓi naŋ dumbuŋ na, a pula asi haŋ taŋ.

³ Na, mbri ska? Da mekelemey a wuzla taŋ, t'anta teŋteŋ ta na, gi teŋteŋ ta na, a sa tika Buymisemuŋ ɓa a ndir teŋteŋ ta ya kwa?

⁴ Ndiɗaˀ wãˀ. Ko da mbur gar a gi slir tekeɗe kwana, anja mizli a sinaka, Buymisemuŋ a ɓi di i ɓi mikaslsla na si. Naŋ kaɓa mutohoko ɓi naŋ miɓi: Anja mizli a sinukuw, ka jeŋŋe ar mingiɓi ɗike. Da ara gukuw kiita na, anja kiita a hizigiɗuw ta.»

⁵ Amma da malambaˀ ndra magaka ara biga da mizli, Buymisemuŋ naŋ jeŋŋe na, i sa ɓam mbrike? Buymisemuŋ naŋ jeŋŋe ta asi naŋ mazuɓ himaˀ, a kiɗa ndra ti naŋ na kwa? Ya maɓi ani na, ka wuluk ngi mizli si.

⁶ Ndiɗaˀ wãˀ si! Asi da Buymisemuŋ naŋ anta jeŋŋe ta na, a sa ga kiita da duniya mbri mbrike?

⁷ Da kaɓa slir ɗu ara biga Buymisemuŋ naŋ kaslsla njah wãˀ, ɓa mizli a gakaŋ dudok aseˀe na, a giy kiita ka yi mbur migi mungra vur mi aruŋ maka?

⁸ Na, da naŋ kine na, zuwen i ɓam: «Gukum gwat malambaˀ ɓa ɓi mezle a bo tiraˀa» ta vur mike? Mizli mekelemey a kupam ndra ɓi, kaɓa ndr'i ɓam le kanah. Mizli tayna a ndilaka le ter ngi ga taŋ kiita.

Mbur mijeŋŋe anta wãˀ

⁹ Na mbri ska? Ndra Yudeheye, i funaka mizli mekelemeye le aruŋ kwa? Ndiɗaˀ wãˀ! Asi yi biga ɓi nah le zleˀe si, yi ɓi na: «Mizli gar, Yudehey ati mizli mekelemeye, taŋ rak raka, mungra a funa taŋ gidaŋ le gar taŋ.»

¹⁰ A tohoko na: «Mbur mijeŋŋe anta wãˀ! Ko pal tekeɗe anta.

¹¹ Ko mbur misi ti lesl loŋ anta. Mbur masipa Buymisemuŋ loŋ anta.

¹² Mizli gar a ngizlam le avu jiviɗ mezle, taŋ jom gar, a zizam le cek. Mbur magi mezle, ada kwa? Ko pal tekeɗe anta wãˀ.

¹³ ˀAy ngi ɓi ɓi taŋ, naŋ ka zivi mibaŋ. A gam gilaw da mizli ti irne taŋ. Mingiɓi mabo ti balam taŋ, naŋ kaɓa muwuŋ ngi kwecesle.

¹⁴ Mingiɓi taŋ a nis vu mukuy ta wãˀ.

¹⁵ A zuɓam sar kutum nga pi pumbus ngi mizli.

¹⁶ Angi li taŋ macohom gar na, a hiryaka gwat ngi mizli, a gaka taŋ bonoy.

¹⁷ Tˀanta gam gwat ko neˀ, ɓa mizli a cifam zuy zuyo ta.

¹⁸ Zluwun ti Buymisemuŋ, anta ko neˀ a mihiri taŋ ta.»

¹⁹ Naŋ kine, i sinaka le, ɓimujuwa maɓi gar na, a ɓi da mizli mahinam hirnga aseˀe, ɓa wereke a bo ti balam mizli mata, ɓa Buymisemuŋ a ga kiita da mizli ngi duniya kurzluˀ gar.

²⁰ Vurˀe, ko mbur anta ndir jeŋŋe a mbuŋ Buymisemuŋ asi naŋ maga gwat ɓimujuwa maɓa na ta. Naŋ kine, ɓimujuwa a biga ɓa mbur a sina, a gi mungra le.

Buymisemuŋ a laha mburo mbri mbrike?

²¹ Amma wurenna, Buymisemuŋ a biga ndra di le, a ɗiya mizli jeŋŋe manja ɓimujuwa. Ɓimujuwa ati mijiviɗeye, a gaka sedewo naŋ anihĩ:

²² Buymisemuŋ a ɗiya mizli jeŋŋe asi taŋ mitiɓaka Yesu Kristu. A ɗiyi di i mizli matiɓaka Kristu gar, asi mizli gar, taŋ rak rak a mihiri ngi Buymisemuŋ.

²³ Mizli gar a gam mungra le, a ndiram le manja luuma dudok ngi Buymisemuŋ.

²⁴ Amma asi gimezle naŋ na, a ɗiya taŋ le jeŋŋe ngatara tisi Yesu Kristu mambiɗa hirnga taŋ na.

²⁵ Buymisemuŋ a vul di i Yesu vuna ngi gi mikuli a mbuŋ Buymisemuŋ ngi buna mungra ngi mizli ti pumbus naŋ, asi tiɓi taŋ. Buymisemuŋ a wuɗ ɓa a biga avu mizli, naŋ jeŋŋe: asi ti mizli migam mungra angi hin naŋ muɓus ɓi zleˀe na, a pula ɓi nah le, a ga taŋ kiita ta.

²⁶ Amma dana so na, ara biga, naŋ, naŋ jeŋŋe. Asi a wuɗ ɓa naŋ da jeŋŋe, yo mbur mandir ti siifa vur naŋ matiɓa Yesu na, a ɗiyaŋ jeŋŋe ma.

²⁷ Ɓi ɓa mburo huhumvu naŋ aseˀe, ada anga kwa? Ko anta wãˀ si! Vur mi ska? Asi gi gwat ɓimujuwa maɓa na kwa? Anta aseˀe ta wãˀ, amma asi tiɓi.

²⁸ Naŋ kine, i waka na, mburo anta ndir jeŋŋe a mbuŋ Buymisemuŋ asi naŋ maga gwat ɓimujuwa maɓa na ta, amma asi tiɓi.

²⁹ Malla Buymisemuŋ vuna, i Buymisemuŋ ngi Yudehey tewle si kwa? I Buymisemuŋ ngi mizli mekelemey ta wal kwa? Kanah ta, i Buymisemuŋ ngi mizli mekelemey aya.

³⁰ Buymisemuŋ, naŋ purla, asi mike na, a sa ɗiya Yudeheye jeŋŋe, asi tiɓi taŋ, yo a sa ɗiya mizli Yude tahay na jeŋŋe asi tiɓi taŋ na ya.

³¹ Ndra mitiɓam na, mbiɗeˀvra, i ra hizigaka ɓimujuwa avra, ka slra naŋ anta sukwa? Kanah ta wãˀ jak, i ra ɗuvaka hirnga da ɓimujuwa jaka.