ROMAHAY 2 - Bible en langue guiziga

Kiita, Buymisemuŋ maga da mizli

¹ Ka, mbur wanaka gar maɓa mbur mekeleme: «Ki zluɓa le» amma, ka vuna kwana, ki ra gi ka naŋ vuna ya na, a sa pulukuw ngi ɗike teˀ gu mbri mbri aruŋ maka? Kite ki ɓi di i vu ɗik tehhe a muŋ vuna si.

² I sinaka le, Buymisemuŋ maga kiita da mizli magam gwat kanah na, naŋ kaslsla.

³ Amma ka maɓa mbur mekeleme: «Ki zluɓa le» tuwa, da ki ra gi ka naŋ vuna ya na, Buymisemuŋ masa ga kiita da mizli na, ki pura kaɓa kisa lih gu sukwani?

⁴ Buymisemuŋ maɓus ɓi haɗi, mavul haɗa, gimezle naŋ mihaɗi na asin ta, ki ra gi di kaɓa ɓi ngi sefel kwani? Mezle ngi Buymisemuŋ maguw di, ɓa ki mbiɗa mevel ɗike na, ki si na takwa?

⁵ Amma hirnga ɗike gidaŋ, k'anta ngum mbiɗa mevel ɗike ta. Hana ki cikil di i bonoy madiɗa wãˀ ngi kutuko hin Buymisemuŋ masa njuyo himaˀ naŋ ati kiita, naŋ masa ga ti jiviɗ naŋ kaslsla na.

⁶ Tapasa, ko wa gar na, Buymisemuŋ a sa wurkaŋ weˀe avu slra, naŋ migaŋ.

⁷ Mizli mahurdumom ti gi slra mezle, mapuram jiviɗ ɓa Buymisemuŋ a vula taŋ dudok, ɓa a ɗuva taŋ hirnga, yo ɓa a ndiram caˀa na, Buymisemuŋ a sa vula taŋ siifa ngi sete.

⁸ Amma mizli mambiɗam hirnga avu Buymisemuŋ, mahizigaka ɓi mikaslsla avra, yo masipam ɓi mijeŋ ta gar na, Buymisemuŋ a sa vunaha himaˀ naŋ ati ji mevele ng'ar taŋ.

⁹ Mbur magi gwat malambaˀ gar na, a sa si bonoy, a sa lik haɗa, Yudehey dumbuŋ waɗ sukwi mekelemey gar.

¹⁰ Amma ko wa gar magi mezle na, Buymisemuŋ a sa vulaŋ dudok, a sa ɗuvaŋ hirnga, a sa vulaŋ zuy, da Yudehey dumbuŋ waɗ da sukwi mekelemey gar.

¹¹ Asi mike na, avu Buymisemuŋ, mizli gar, taŋ rak rak si.

¹² Mizli gar migam mungra le manja si na ɓimujuwa ngi Moyise na, a sa zizam manja ɓimujuwa ya. Amma mizli gar misinaka ɓimujuwa le, a gam mungra le na, Buymisemuŋ a sa ga taŋ kiita ti ɓimujuwa ya.

¹³ Asi mike na, mizli mijeŋŋehey a mbuŋ Buymisemuŋ na, i mizli macinam ti cin tewle ta, amma i mizli magaka gwat ɓimujuwa maɓa taŋ di na.

¹⁴ Mizli Yudehey ta na, a sinaka ɓimujuwa ta, amma da ara gaka gwat ɓimujuwa maɓa na, ko da ɓimujuwa inga taŋ ta kwana, slra taŋ a bigi le, kaɓa a sinaka gwat ngi gi ati ngi gi ta le.

¹⁵ Slra ngi ɓimujuwa mawuɗ na, a bigaka, a tuh le a mevel taŋ, wuluk mijileŋ ngir mevel taŋ kwana, ada biga ya. Naŋ kine, pas mekeleme, wuluk taŋ a biga taŋ di: a gam malambaˀ le, malla a gam mezle le.

¹⁶ Gwat ngi gi muɗum ngi mizli gar, Buymisemuŋ mupula ɓa masa ga kiita nah, i Yesu Kristu na, a sa njik gar ti hin nah. Ɓimezle ya matil di mi na, i ɓi nah vuna.

Yudehey ati ɓimujuwa

¹⁷ Amma, ka mbur maɓi ki mbur Yude, ki ra huruk huruk huruk angi ɓimujuwa, ki ra huhumvu ɗike, ki ɓi: «Buymisemuŋ inga ya.»

¹⁸ Ki si na gwat Buymisemuŋ mawuɗo le, ɓimujuwa a dubunuw jiviɗ ngi sli wala ngi gi gwat mezle le.

¹⁹ Ka ki wa kaɓa ki miɗiɗa dangaray gisiŋ gisiŋ, ki li minjahha a mbuŋ mizli ngir luvuŋhoy,

²⁰ ki misirka gwat ngi gi da mizli manja si na gwatay, ki mudubuna gwat da ziri, asi ki si na le gisiŋ, k'ada ti ɓimujuwa. Ki wa kaɓa ki si na gwataya le kwaŋ kwaŋ ti naŋ. Ɓi ka maɓa gar na, ki wa i ɓi mikaslsla wãˀ.

²¹ Na, ka mbur madubun gwat da mizli mekelemey ma na, ki dubuna da hirnga ɗike ta wal kwa? Ki til mi, ki ɓi: «Ki hulom ta», na, ki hul vur mike?

²² Ki ɓi: «Ki gam madama ta», na, ki gi vur mike? Ki ra hirsa kuliheye, na, ki hulo gwat ngir hay taŋhaya vur mike?

²³ Ki ra huhumvu ɗike ti ɓimujuwa, na, ka mangila ɓimujuwa na, ki ra ma Buymisemuŋ nga ruwuy.

²⁴ Vurˀe, a tohoko na: «Mizli mekelemey mazaka Buymisemuŋ na, vur kum mizli duniyahay vuna.»

²⁵ Gisiŋ, da ki ra ga gwat ɓimujuwa maɓa na, ci mizaw i gwat mupuɗaw avu ka gwaɗ naŋ. Amma da ki ra ngila ɓimujuwa na, kite ki ci a mizawa ta.

²⁶ Da mbur mici mizaw ta, ara ga gwat ɓimujuwa maɓa na, Buymisemuŋ a sa pura kite a ci le a mizawa takwa?

²⁷ Mbur mici a mizawa ta, amma da ara ga gwat ɓimujuwa maɓa na, a sa guw kiita. Vur mike na, k'ada ti ɓimujuwa toh toh ar ɗerewol, yo ki ci le a mizawa ma, amma ko ti nah gar kwana, ki ra ngila ɓimujuwa na si.

²⁸ Naŋ kine, maga mburo i mbur Yude gisiŋ na, i deŋ ngi vu naŋ ta. Yo maga mburo i mbur mici le a mizawa kwana, i vivi ngi ci mizaw naŋ na ta ya.

²⁹ Amma maga mburo i mbur Yude gisiŋ na, i gwat muɗum ngi hur kwacay naŋ, yo ci mizawa, i ci mizaw ngir mevele, ci mizaw ngi ˀUf ngi Buymisemuŋ, i ngi ɓi mutohoko ti tuh na ta. Mbur Buymisemuŋ mahunumaŋ, mbak mizli mahunumakaŋ na le na, i nah.