ROMAHAY 14 - Bible en langue guiziga

Ki ga kiita da sukum ɗike ta

¹ Mbur manja gidaŋ ar tiɓi na, tiɓakaŋ, yo gwat naŋ maga taŋ gar na, anja ki mbiɗakaŋ hirnga aseˀe ta.

² Kaɓa ani, mbur mekeleme, a tiɓi le, a pura na, naŋ da ti jiviɗ ngi zuma gwat gar. Amma mbur numuŋ, manja gidaŋ ar tiɓi na, a zum sey lar lambaˀ si.

³ Mbur mazum gwat gar tuwa na, anja a hirsa mbur mazum sey lar lambaˀ na ta. Yo mbur mazum sey lar lambaˀ na kwana, anja a hirsa mbur mazum gwat gar na ta ya. Asi Buymisemuŋ a tiɓa taŋ cuw taŋ gu.

⁴ Da mbur i gawla ɗik ta si na, i ka wa, ɓa hã ki ɓaŋ: «Ki zluɓa le» na ka? Da naŋ zlak kuy kuy angi slra naŋ, malla da a diɗ le kwana, i ɓi ngi buy naŋ ta kwa? Ko mbri na, a sa cici zlak kuy kuy, Bumbulvuŋ, naŋ ti gidaŋ ɓa a jahaŋ jah.

⁵ Mbur mekeleme, a pura kaɓa hin mekelemey a funaka hin numuŋhoyo le. Mbur numuŋ, a pura hiney gar i misi purlahay. Anja mbur gar a cici angi naŋ muwuluk di a mevele.

⁶ Mbur mawa hin mekeleme, a funa numuŋ le na, a ɗuf di i hirnga da Bumbulvuŋ. Mbur mazum gwat gar na, a ga ngi ɗuva hirnga da Bumbulvuŋ. Asi mike na, ara ga sise da Buymisemuŋ aseˀe. Yo mbur mazum gwat gar ta na kwana, a ga ɓa ngi ɗuva hirnga da Bumbulvuŋ, yo ara ga sise da Buymisemuŋ aseˀe.

⁷ Naŋ kine, a wuzla ndra, ko mbur mandir ti siifa asi naŋ vuna muwuɗ na anta. Yo ko mbur mamuc asi naŋ muwuɗ le kwana anta ya.

⁸ Asi da ndr'ada ti siifa na, ndra ti siifa vur Bumbulvuŋ. Yo da i roko micam kwana, i micam vur Bumbulvuŋ. Asi mike na, ko da ndr'ada ti siifa, malla ko da i roko micam tekeɗe kwana, ndr'i nga naŋhay.

⁹ Asi Kristu mumuc, yo naŋ mislikiɗ ti wuzla mumucahay a muŋ na, ɓa a tiri Buy ngi mizli mumucahay ati misi ti siifahay ma gar.

¹⁰ Na ka, ki ga kiita da sukum ɗike, vur mike? Yo ki hirsa sukum ɗike, vur mike? Asi mike na, ndra gar, i sa cicam a mbuŋ Buymisemuŋ, ɓa a ga ndra kiita.

¹¹ Asi a tohoko na: «Buymisemuŋ a ɓi: Kaɓa ya misi ti siifa gisiŋ na, mizli gar a sa dilkam a mbuŋ ɗu, yo mbur gar a sa ɓa njah ti mi naŋ: Buymisemuŋ, naŋ ti dudoko.»

¹² Vurˀe, ko wa gar a sa slufa ɓi ngi hirnga naŋ da Buymisemuŋ ti haŋ naŋ.

Anja ki gi gwat ngi hizigiɗa sukum ɗike ta

¹³ I gam kiita da mbur ar wala ndra ta, kuɗukum mi naŋ. Zuwen tumom vu, ɓa ki gam gwat ngi ba sar da sukum kumo, ɓa a diɗ ar mungra ta, malla ɓa ngi ci di ng'ar mungra ta jaka.

¹⁴ Asi ya mujom ati Buy Yesu Kristu na, i si na le njah wãˀ: gwat misi dili anta. Amma da mbur ara pura ava, i gwat misi dili nah na, a tiri ava kanah gisiŋ.

¹⁵ Da gwat ka mazuma anta ga sukum ɗike kuy ta na, kite k'anta ki wuɗaŋ ta. Mbur Kristu mumuc vurˀe na, anja ki zizaŋ ti gwat ka mazuma na ta.

¹⁶ Gwat mimezle avu ka na, anja mizli a ɓam di ɓi malambaˀ ta.

¹⁷ Asi Zumabuy ngi Buymisemuŋ, i ɓi ngi gwat ngi zum malla gwat ngi si ta. Amma i gi gwat mijeŋŋe, ɓi ngi zuy, yo i ɓi ngi mumul, ˀUf Mipal mavula.

¹⁸ Mbur maga slra ngi Kristu ti jiviɗ misi kanah na, a cira hiri da Buymisemuŋ, yo mizli a ngilam di wuy ma.

¹⁹ Supukum gi gwat mezle ɓa i cifam zuy zuy, yo ɓa a vula ndra gidaŋ ar wala ndra so.

²⁰ Anja ki hirya slra ngi Buymisemuŋ ti ɓi ngi gwat ka mazuma na ta. Gwatay gar, i ngi zumoy gisiŋ ɓula. Amma da gwat a hizigiɗa sukum ɗike ng'ar mungra na, naɓa i gwat mukuy ngi zum ta.

²¹ Kuy naŋ na, anja ki zum ˀuse ta, ki si mbaazla ta, ko gwat wanaka gar mahizigiɗa sukum ɗik ng'ar mungra na, ki ga ta si.

²² Gwat ka mitiɓa le a mevel ɗike na, wi di vu da hirnga ɗik tewle a mbuŋ Buymisemuŋ. Da mbur ara gi gwat naŋ misla wala nah le, a si na le, a zluɓ ɓi ta na, naŋ ar mumul.

²³ Amma da mburo, naŋ ti wuluk cuw cuw a hirnga gwat ngi zumo, da a zuma le na, naɓa Buymisemuŋ a gaŋ kiita. Asi gwat naŋ maga na, a ga tisi tiɓi ta. Yo gwat mbur maga gar, da a ga tisi tiɓi ta na, a gi di i mungra.