ROMAHAY 13 - Bible en langue guiziga

Cina mi da mizli miwi hirwuyoy

¹ Anja sey mbur gar a hin hirnga a mbuŋ mizli miwi hirwuyoyo. Da Buymisemuŋ a vula ta na, ko zumabuy anta. Mizli muroko zumam buy na, i Buymisemuŋ micifa taŋ.

² Naŋ kine, mbur masli himaˀ avu mizli miwi hirwuyoy na, kite ara sli himaˀ avu ɓi Buymisemuŋ miɓa. Mizli maslaam himaˀ gar na, a sa soko ti kiita nga hirnga taŋ vuna a muŋ.

³ Naŋ kine, da mbur ara gimezle na, a zluwun ti mizli madiɗa miwi hirwuyoyo ta, sey da mbur ara gi gwat malambaˀa. Da ki wuɗ le ɓa ki zluwun ti mizli miwi hirwuyoyo ta na, gimezle, dar a sa hunumukuw.

⁴ Asi mbur miwi hirwuyo, i mbur migi slra ngi Buymisemuŋ ɓa a jinuw ngi gimezle. Amma da ki ra gi malambaˀ na, zluwun di, naŋ misi ti gidaŋ ngi kuti mizli na, i ngatara ta. Naŋ magi slra ngi Buymisemuŋ na, a bigi di i himaˀ ngi Buymisemuŋ ti kuta mizli magam gwat malambaˀa.

⁵ Vurˀe, naŋ kuy ɓa ngi hin hirnga a mbuŋ mizli miwi hirwuyoyo. Anta ngi tika himaˀ ngi Buymisemuŋ tewle ta, amma asi wuluk ngir mevel ɗik maɓuw ɓa ki gaŋ.

⁶ Kum mawurkaka buutu na, aseˀe ma. Asi mike na, mizli micikil naŋhaya, a gam di i slra ngi Buymisemuŋ muvula taŋ di.

⁷ Gwat ngi wuruk da mbur gar na, wurkakaŋ di. Buutu da mbur micikila buutu, laada da mitiɓi laada. Mbur zliv ngi zluwun di na, zluwunam di, mbur zliv ngi ɗuvaŋ hirnga kwana, ɗuvakaŋ di.

Wuɗa mbur cil ɗik

⁸ Anja ki ndiram ti duvus ngi mbur ko loŋ a hirnga kumo ta. Sey duvus ngi wuɗavu ar wala kum tewle si. Asi mbur mawuɗ mbur cil naŋ na, a ga gwat ɓimujuwa mawuɗo le wãˀ.

⁹ Asi mike na, ɓimuɗuva miɓi: «Ki gi madama ta, ki kiɗ hirnga ta, ki hul ta, ki hiyĩ gwat ta» waɗ mekelemey ada ma na, a jumom le ar ɓi midegweleˀe ani: «Wuɗ mbur cil ɗike, kaɓa ka mawuɗ vu ɗik vuna.»

¹⁰ Mbur mawuɗ mbur cil naŋ na, anta gaŋ malambaˀ ko neˀ ta. Vurˀe, mbur mawuɗ vu na, a gi di i gwat ɓimujuwa mawuɗ gar wãˀ.

Wam vu vur so ngi Kristu

¹¹ Hin ndra misi anga hana, ki sinaka le. Ler a gi le ɓa ki puɗkam tir hinje kumoyo. Asi mike na, dana hin ngi lih ndra a dungufo ndra le wãˀ, fineˀ ndra mizlaka tiɓi ndra cikiɗeffe.

¹² Duvuɗ a cuh le haɗi, li a sa wun gweˀe. Pulukum gi gwat ngir luvuŋ so. Hulukum gwat ngi vurum ngi li minjahha.

¹³ Sey i gam gwat ti jiviɗ naŋ ɗalla, kaɓa magaka ar li minjahha, manja zuma gwat fineˀ gidaŋ, malla wi ti mbaazla, gi may gwat ka kwelegwer, malla gi sulome, manja tiri, malla gi suloŋ.

¹⁴ Amma kaka Buy Yesu Kristu avu vu kumo, yo gwat ngi kiɗa may da kpak ngi vu kum na, anja ki pulakaŋ vu ta.