ROMAHAY 11 - Bible en langue guiziga

Buymisemuŋ a pula Israyeley avra ta

¹ I ra cufuɗ vu so: Buymisemuŋ a pula mizli naŋhaya le kwa? Anta kanah ta wãˀ! Ya vuna, yi mbur Israyel, Abraham i dideˀ ɗu, yo i bo tir tizer ngi Benjameŋ.

² Buymisemuŋ, mizli naŋhay naŋ muwuna taŋ daf dumbuŋ na, a pula taŋ ta. Malla mingiɓi ngir Ɓimutoho, Eli mumbul mi ti Israyeley a mbuŋ Buymisemuŋ na, ki sinaka ta kwa? A ɓi na:

³ «Bumbulvuŋ, a kiɗaka mijiviɗ ɗikeye le, a mbizlaka li gi ɗikeye le. Mindir i ya pal ɗu, amma ara sipikiy ɓa a kiɗikiy ya vuna vagay aya.»

⁴ Amma Buymisemuŋ a mbiɗaŋ di mbrike? A ɓaŋ: «Yi wi vu le guc ti mizli durmuk tarnaˀ, mizli midilkam a mbuŋ kuli Baˀal ta.»

⁵ Angi hin misi ani na, naŋ kanah ya, mizli Buymisemuŋ muwuna taŋ asi gimezle naŋ na, a ndiram le neˀe.

⁶ Buymisemuŋ muwuna mizli na, asi gimezle naŋ, anta asi gwat ngi gi taŋ ta. Da Buymisemuŋ a wuna mizli asi gwat ngi gi taŋ zleˀe na, naɓa gimezle ngi Buymisemuŋ i gimezle migisiŋ ta.

⁷ I sa ɓam mbri ska? Mizli Israyeley a lumaka gwat taŋ misipaka na ta, sey mizli naŋ muwuna taŋ na mulumakaŋ. Mekelemeye kwana, hirnga taŋ a tiri le gidaŋ haɗi.

⁸ Kaɓa Ɓimutoho miɓi: «Buymisemuŋ a vula taŋ lesl magi hinje, hã dana a puram ti hiri taŋ gu ta, a cinam ti slimiɗ taŋ gu ta.»

⁹ Davit kwana, a ɓi: «Anja muguzlum taŋ a tiri mazaɓ, malla zuva avu taŋ, ɓa a ndilam, a kutam weˀe avu gwat ngi gi taŋ.

¹⁰ Anja hiri taŋhay a slirɓam, hã a puram mata wãˀ. Anja a ndiram girjaŋ girjaŋ ndrehhe.»

¹¹ Yi cufuɗ so: sar muba Yudehey na, a ndilam le wãˀ kwa mbrike? Anta kanah ta wãˀ! Taŋ a gam malambaˀ ti gi, amma sukwi ngi mizli mekelemeye, a ndilaka ɓa hã Buymisemuŋ a laha taŋ na, mbele malambaˀ ngi Yudehey vuna. A ga kanah ɓa a slikiɗa suloŋ da Yudeheye.

¹² Ani, da gi malambaˀ ngi Yudehey na, a ga zlili le haɗi da duniya, yo taŋ mumam a ruwuyo, da a ga zlili le haɗi da sukwi ngi mizli mekelemeye na, lih taŋ masa laham wãˀ na, gwat, naŋ masa ga ta na, ada kwa?

Mizli Yudehey ta masa laham

¹³ Wurenna, i ɓi di i kum Yudehey ta na, ya i mislin ngi Kristu ng'avu mizli Yude tahay na, yo ya misi kanah na, i pura i slra ɗu hirnga wãˀ.

¹⁴ I wuluk kanah ɓa yi slikiɗa suloŋ da muy ɗuwoyo, ɓa yi lih cah asi taŋ.

¹⁵ Naŋ kine, Buymisemuŋ mubaˀa taŋ baˀ murvay zleˀe na, mizli ngi duniyahay a jumom ˀay le ati Buymisemuŋ. Ani, da a sa tiɓaka taŋ le a muŋ na, i mi masa gi ka? A sa gi kite i mizli mumucahay mislikiɗam ti slikiɗ a muŋ.

¹⁶ Da ɗaf mudumbuŋ dumbuŋhoyo, a paka taŋ le da Buymisemuŋ na, naɓa ɗaf mindir gar, inga naŋhay. Da slaslalak ngi widiseye, a vulaka taŋ le da Buymisemuŋ na, naɓa mihaŋ naŋhay gar, inga naŋhaya ya.

¹⁷ Mizli Yudeheye, taŋ kaɓa tutumbur Buymisemuŋ mihirva ti hirvi. Mihaŋ naŋ mekelemeye, a kilahaka taŋ le avra. Ka, mbur Yude ta na, ka kaɓa mihaŋ ngi tutumbur ngi ɓuh mujuɓukuw ti juɓ angi li taŋ, ɓa ki cir tisi slaslalak ngi widis mihirvaka ti hirvi tuwa.

¹⁸ Anja ki wa vu ɗike kaɓa ki funa mihaŋ mikilahaka taŋ le avra na ta. Ki huhumvu gu mbri mbrike? Majaha slaslalaka, i ka ta, amma i slaslalak majuhuw ka jaka.

¹⁹ I si na le gisiŋ, kisa ɓi: «A kilahaka mihaŋ tayna le avra, ɓa a juɓukiy ya ar li taŋ.»

²⁰ Gisiŋ ɓula, amma a kilahaka taŋ avra na, asi taŋ mitiɓam ta na. Na ka, ka misi ar li taŋ na, asi tiɓi ɗiki. Anja ki huhumvu ɗike ta so, zuwen zluwun jaka.

²¹ Yudeheye, i mihaŋ mikpak kpak ngi widiseye, da Buymisemuŋ a pula taŋ ar li taŋ ta na, anta sa puluw ka ta ya si.

²² Pura ɗi, Buymisemuŋ i mezle, yo naŋ himaˀ ma gar. Naŋ himaˀ avu mizli mindilam le, amma naŋ mezle avu ka, anja sey ki ndir ti gimezle naŋ na. Da kanah ta na, a sa kilihuw ka avra ya.

²³ Da Yudehey a pulaka hirnga taŋ migidaŋ na le na, a sa juɓoko taŋ ar li taŋ misi zleˀe a muŋ ya. Asi Buymisemuŋ, naŋ ti gidaŋ ngi juɓo taŋ a muŋ.

²⁴ Ka mbur Yude ta, ka mihaŋ ngi tutumbur ngi ɓuh, a bukoko ka, a sa juɓukuw avu tutumbur mihirvaka ti hirvi. Anta i li ɗik mikpak zleˀe ta. Yudeheye, i mihaŋ mikpak kpak ngi widis nah, a sa juɓoko taŋ a muŋ avu widis taŋ muboko ti vaˀa zleˀe na kutum ta jak kwa?

Buymisemuŋ masa laha Israyeley ngi kiɗa mi wãˀ

²⁵ Sukum ɗuwoy, ɓi mikaslsla muɗum zleˀe ani, ya mawuɗ i bugukum di ɓa ki sinakaŋ, vur kum masa puraka vu kum kaɓa i misi sinmijileŋhey. Mizli mekelemey cah a wuzla Israyeleye, hirnga taŋ gidaŋ, amma a zik hã da Buymisemuŋ milaha sukwi ngi mizli mekelemeye le gar.

²⁶ Kahana so na, Israyeley gar a sa laham. Kaɓa Ɓimutoho miɓi: «Milahavu a sa so baɗ ti Siyoŋ, a sa zuɓa moˀore ngi dideˀ ngi Zakopoyo gar avra.

²⁷ Ya masa zuɓa mungra taŋ avra na, jumoˀay ɗu ati taŋ, i hana.»

²⁸ Avu Ɓimezle na, Yudehey a tiram mesene ngi Buymisemuŋ le. Hana i gwat mukuy vur kum. Amma avu Buymisemuŋ mawuna mizli so na, taŋ i mizli Buymisemuŋ mawuɗ taŋ, tisi dideˀ taŋhay.

²⁹ Asi mike na, gwat Buymisemuŋ muvula le ngatara na, naŋ anta tiɓa a muŋ mata, yo mizli naŋ mizila taŋ le na, naŋ anta mbiɗa wuluk naŋ mata.

³⁰ Naŋ kine, ti zleˀe, kum Yudehey ta na, ki cinaka mi da Buymisemuŋ ta, amma wurenna, Buymisemuŋ a purukum ˀircece le, asi Yudehey micinakaŋ mi ta na.

³¹ Wurenna, taŋ ya kwana, anta cinaka mi da Buymisemuŋ ta, ɓa Buymisemuŋ mupurukum ˀircece na, a pura taŋ ˀircece ya.

³² Buymisemuŋ a gica mizli le gar angi cin mi ta, ɓa a pura taŋ ˀircece gar.

Buymisemuŋ i madiɗa, ɓi naŋ a sluf ta

³³ Yawwa! Buymisemuŋ naŋ ti zlili haɗi wãˀ! Sin naŋ mijileŋ ati sin naŋ ngi gi gwata, taŋ jileŋ haɗi! Wuluk naŋ mujuwa le a mevele na, maɓa mbiɗeˀvra naŋ gu, i waka? Gwat naŋ miɗiya jiviɗ naŋ le na, masla wala naŋ gu, i waka?

³⁴ Ɓimutoho a ɓi: «Misina wuluk ngi Buymisemuŋ, i waka? Malla mangilaŋ wuy gu, i waka?

³⁵ Malla ta na, muvulaŋ gwat dumbuŋ ɗaˀ ɓa a sa wurkaŋ di a muŋ, i waka?»

³⁶ Asi gwat gar a so ti vaˀaŋ. Gwat misi ada gar na vurˀeŋ, yo inga naŋhay. Dudok inga naŋ ma, hã ngi sete! Amin.