NEHEMI 9 - Bible en langue guiziga

Mezegwel ngi njika mungra a wuzla mizli

¹ Angi hin kukur cuw nga mufaɗ ngi kiya mitarnaˀ naŋ nah na, Israyeleye, zana ngi vagay ɓaˀ ɓaˀ avu vu, yo hohoy kor kor avu vu, dar a kusom ɓa a gam dalyam.

² Mizli misi taŋ i sukwi Israyel gar na, a ngicam ngac pal taŋ avu mizli mulakaya, a cifam baˀ pal taŋ ɓa a njikaka mungra taŋhay ati ngi dideˀ taŋhay aya.

³ A zlaka a slikiɗam tir li cifi taŋhaya, deŋ deŋ yom, dar ara cinaka maslufaka taŋ ɗerewol ngi Ɓimujuwa ngi Bumbulvuŋ, Buymisemuŋ taŋ na, hã ler makir. Yo ar ler makir mekelemeye ma na, ara njikaka mungra taŋhay, a hurukom huruk huruk a mbuŋ Bumbulvuŋ, Buymisemuŋ taŋ.

⁴ Yesuwa, Bani, Kaɗmiyel, Sebaniya, Buni, Serebiya, Bani, waɗ Kenani i Levihey. A slikiɗam ar li miɗiya vriw ngi Levihey tuwa, a tilam mi ti gidaŋ ng'avu Bumbulvuŋ, Buymisemuŋ taŋ.

⁵ A dirba nah, Levihey, ti: Yesuwa, Kaɗmiyel, Bani, Hasapneya, Serebiya, Hodiya, Sebaniya waɗ Petahiya, a tilam mi, a ɓam: «Slikiɗam, gaka sise da Bumbulvuŋ, Buymisemuŋ kum. Gakaŋ sise ndrehhe, hã ngi sete.» «Bumbulvuŋ, Buymisemuŋ, anja mizli a gukuw sise ti zila slimiɗ ɗik misi dudok na, asi dudok ɗike naŋ haɗa, a zli ta wãˀ. A funa ɗuwula mi ati hunuma vuhoyo le gar.

Nehemi midir dibiɗ a mbuŋ mizli gar

⁶ Bumbulvuŋ i ka pal ɗik tewle. Muŋ ati gwatay misi anga gar na, miga taŋ i kaha. Hirwuy ati gwat ngi raˀahay gar, miga taŋ i kaha. Mubuliy ati gwat ngi raˀahay gar, miga taŋ i kaha. Mavula siifa da gwat hanayna gar i kaha. Yo gwat ngi muŋhoy gar na, a hurukom huruk huruk a mbuŋ ɗiki.

⁷ Bumbulvuŋ, Buymisemuŋ, muwuna Abraham i kaha. Mubo di baɗ ar walahay Ur, hirwuy Babiloŋ, Yo micaŋ slimiɗe, Abraham na, i ka vuna!

⁸ Ki luuma Abrahama na, i mbur miteŋteŋ a mbuŋ ɗike. Akẽh na, ki jumom ˀay ati naŋ, yo ki ɓaŋ, naŋ ati dideˀ naŋhaya, kisa vula taŋ hirwuy ngi Kanaˀanay, ngi Hitihey, ngi Amorihey, ngi Perizihey, ngi Zebusihey waɗ ngi Girgasihey. Gwat ka miɓa kisa ga na, ki ga le, asi ka jeŋŋe.

⁹ Dideˀ ndrahay mihinam hirnga zleˀe a Ezipte na, ki pura taŋ le, yo widi taŋ a mi mubuliy lavaɗ na, ki cine le.

¹⁰ Gwat mupuram ɗaˀ ta ati gwat ngi zuma hirngahay gar na, ki ga taŋ le ngi zliɗa lesl da buy madiɗa ngi Ezipte, da gawla naŋhay waɗ da mizli ngi si ruwuy naŋhay gar. Vur na, Eziptehey ti huhumo vu taŋ na, a guzuvuraka Israyeleye le. Ka vuna, ki si na le takwa! Yo ki ga le ɓa slimiɗ ɗik a zil kaɓa naŋ mazil dana ani na.

¹¹ Ki wucaha yam ngi mubuliye wucah a wuzla cuw a mbuŋ taŋ, joˀ Israyeley a cohom ti wuzla mubuliye, ti sar njiraŋ njiraŋ. Mizli musupoko taŋ na, ki pa taŋ haŋ le yimak ng'ar yam, kaɓa mbur mihiziga ɗugur le ng'ar yam mijileŋ.

¹² Ti papasa, ki biga taŋ jiviɗe ti musuwre ngi gazlavay sikikiki. Yo ti duvuɗo, ti musuwre ngi vu puɗak puɗak, ɓa ngi pusluɗa taŋ jiviɗ taŋ marama.

¹³ ki po sar le ti muŋ nga muwã Sinaya, ki ɓa taŋ ɓi le a muwã Sinaya, ki vula taŋ ɓimuɗuva mijeŋŋe, ɓimujuwa mikaslsla, gwat ka mawuɗo ati ɓi mezle miɓa ɗaˀ le.

¹⁴ Sabat ngi ɗik mipal na, ki biga taŋ di le. Ɓi miɗaˀ le, ɓi micica waɗ Ɓimujuwa, ki vula taŋ di le tisi gawla ɗik Moyise.

¹⁵ Ngi kiɗa taŋ may ngi ɗafa, ki vula taŋ gwat ngi zumo le paɗ ti muŋ. Ngi kiɗa taŋ madalyama, ki budugo taŋ yama le bitiŋ bitiŋ tir mandazlay muwã. Yo hirwuy ka muvula taŋ di ti hudum haŋ paɗ nga muŋ tuwa, ki ɓa taŋ le, ɓa a sa pam ara.

¹⁶ Amma dideˀ ndrahay vuna, i mizli muhuhumo vuhoy, hirnga taŋ gidaŋ, a tiɓaka ɓi ka miɓa taŋ di ɗaˀ le na ta.

¹⁷ A ngumam cine mi ta, yo cekenehey ka miga taŋ vur taŋ na, a wulkaka ɓi naŋ keŋ mata. Hirnga taŋ gidaŋ. Taŋ mislikiɗam ɓi avu ka na ma na, a wulkam ɓa a mam ng'ar beke taŋ a Ezipte a muŋ. Amma ka, ki Buymisemuŋ mapul mungra ngi mizli, ki pur vu ti hiri mezle, ki pur ircece haɗa, ki ji mevel kutum ta, ka teŋteŋ haɗa, ko ki pula taŋ zlaɗ ta.

¹⁸ Ko ti taŋ muluwuslam ɓiri, a pam di zuŋ sla peˀ peˀ, a wudam: ‹Buymisemuŋ ndra, mubo ti ndra baɗ ti ruwuy Ezipte i naŋ› na tekeɗe, a zluɓam ɓi madiɗa le ngbaŋ.

¹⁹ Gar ti nah kwana, ko ki pula taŋ zlaɗ lambaˀ a wuzlaɓuh mikirɗak kirɗak ta na si, asi ka mapur ircece haɗi na. Ti papasa, musuwre ngi gazlavaya, naŋ anta kirih kirah le avu taŋ ta, ara biga taŋ jiviɗe. Yo ti duvuɗo ma na, musuwre ngi vu anta kirih kirah le avu taŋ ta ya, ara pusluɗa taŋ jiviɗ taŋ marama.

²⁰ Ki vula taŋ ˀUf ɗik mezle na le, ɓa a slaka wala ngi ɓi. Ki zlika taŋ ti man ngi zumo ta, yo ki vula taŋ yam ngi kiɗa madalyama le.

²¹ Taŋ migam vi kukur mufaɗ a wuzlaɓuh mikirɗak kirɗak na, ki ja haŋ taŋ le kuy kuy, ko gwat mikica taŋ anta neˀ le ta. Zana taŋhay a hiryam hiryeˀ le ta, yo sar taŋhaya kwana, a hislam hasl le ta.

²² Ki vula taŋ zuma buyoy ati sukwi ngi mizli le asi haŋ taŋ. Ki wuɗuka taŋ hirwuy ngi midigwi taŋhaya le, joˀ taŋ a zumaka. I hirwuy ngi Sihoŋ, buy madiɗa ngi Heseboŋ ati hirwuy ngi Ok, buy madiɗa ngi Basaŋ.

²³ Ki ska dideˀ taŋhaya, a jam le ngweɗeŋ ngweɗeŋ kaɓa wurzlaŋhay a muŋ. Hirwuy Kanaˀan, ka miɓa dideˀ taŋhay zleˀe, ɓa a sa pam ara tuwa na, ki ci ti taŋ le ng'ara.

²⁴ Dideˀ taŋhay a cam le angi hirwuy nah, a zumaka le. Kanaˀanay, mizli ngi si ruwuyoyo ki hina taŋ hirnga le a mbuŋ dideˀ ndraˀahaya. Taŋ ati buy taŋhaya, ki vula taŋ le asi haŋ taŋ, ɓa a gam ti taŋ kaɓa taŋ muwuɗam.

²⁵ Walahay muguno taŋ le ti moholoyoy ati li magi gwat gar na, a tiɓaka taŋ le. Hay mimbaf mbaf ti zlili ti sukwi wal wal gar, vigiɗ ngi yamay, guva ngi gudubunoy, ngi tutumburoy ati ngi widis ngi zumoy haɗa, a tiɓaka taŋ le. A zumam le, a mbam le, a zlumburam le, yo a cifam le ar wuya. Hana gar na, mbele gi mezle ɗik mihaɗa na.

²⁶ Amma gar ti nah kwana, a slikiɗam ɓi, a slam himaˀ le avu ka na si. A mbiɗam duba le kileŋ wãˀ avu Ɓimujuwa ɗike. Mijiviɗ ɗikey muhurdumom avu taŋ, ɓa anja a moko ng'avu ka na, a kiɗaka taŋ le vagay vagay.

²⁷ Ka so na, dar ki vula taŋ asi haŋ ngi mizli mazliram ti taŋ ta, joˀ taŋ a guzuvuraka taŋ. Ti taŋ misi angi bonoy na, a wudam ng'avu ka. Ka ki cino widi taŋ na le paɗ ti muŋ. Dar ki vula taŋ mizli mucuk taŋhay tir bonoyo ɓa a lahaka taŋ tisi haŋ ngi mizli mazliram ti taŋ tahaya. Hana gar na, asi gi mezle ɗiki.

²⁸ Na, taŋ micifam le setette, ara musukam vu ma na, a zlaka a gam gwat malambaˀ a mbuŋ ɗik tuwa ma. Ka kwana, ki pula taŋ zlaɗ da mesene taŋhay, joˀ mesene taŋhay a guzuvuraka taŋ. A wudam ng'avu ka tuwa a muŋ ma ni. Ka, ki ra cino taŋ widi taŋ paɗ ti muŋ, ki laha taŋ, ki laha taŋ sar mbeˀ mbeˀe. Hana gar na, asi gi mezle ɗik mihaɗa na.

²⁹ Ka, ki hinika taŋ ˀay le, ɓa anja a moko, a sipaka Ɓimuɗuva ɗike. Amma taŋ ti huhumo vu taŋ tuwa na, ko a cinaka ɓi ka miɓa ɗaˀ le na ta ndiɗaˀ wãˀ. A ngilaka ɓihey, ka muɗuva taŋ, ɓa mbur a ga taŋ ngi luuma siifa na le. Taŋ a cicam kaŋ kaŋ, a tiram misi hirnga gidaŋhay, ko a cinam mi neˀ le ta.

³⁰ Ki ɓuso taŋ le vi mbeˀmbeˀe. Ki vula ˀUf ɗik le da mijiviɗ ɗikeye, ɓa a tumbuloko taŋ ngbaŋ ni, amma ko a kam slimiɗ ta. Dar ki vula taŋ asi haŋ ngi sukwi ngi mizli ngi si ruwuy mekelemey.

³¹ Asi gi mezle ɗik mihaɗa tuwa na, ka ki pula taŋ ɓa a ngizlam ta, ki pula taŋ zlaɗ lambaˀ ta. Asi ki Buymisemuŋ mapur vu ti hiri mezle, mapur ircece haɗa.

³² Na wurenna so na, ka Buymisemuŋ ndra, Buymisemuŋ madiɗa, migidaŋ, magi zluwun da mburu, ma ngila jumoˀaya ta, yo ki Buymisemuŋ miteŋteŋ. Bonoy ndra mijam di hirnga ati buy madiɗa ndrahay, buy meciɗek ndrahay, masay ndrahay ati mijiviɗ ɗik ngi si ndrahay, dideˀ ndrahay ati mizli ɗikey gar na, ki slimiɗ anga takwa. I bonoy mindilo ndra zle ti hin ngi buy Asirihey, hã dana na.

³³ Ka so na, ar gwat mindilo ndra le gar na, ka, ka jeŋŋe, asi ki ga gwata ti jiviɗ naŋ kaslsla. Amma ndra, i gam di i moˀore.

³⁴ Buy madiɗa ndrahay, buy ndrahay, masay ndrahay ati dideˀ ndraˀahaya, nga taŋ ya kwana, a gam slra ti Ɓimujuwahaya ta. Yo ɓi ɗikey, ka miɓa taŋ ɗaˀ le, waɗ ka mika taŋ di mumuyuŋ zay sla a slimiɗ, ki mataŋ hiri nah sar mbeˀ mbeˀ na kwana, a kam slimiɗ ɓaˀ le ara ta.

³⁵ Taŋ a zumam buy le, ki vula taŋ gwat mezlehey le haɗa teˀe, ar hirwuy madiɗa, magi gwat haɗaka muvula taŋ di, yo ka mici ti taŋ ng'ara na ngbaŋ. Amma ko taŋ a gam gawla ɗike ta, yo gwat ngi gi taŋ malambaˀhay na, ko a pulaka taŋ mbak le ta na si.

³⁶ Hirwuy hana, i ka muvula da dideˀ ndrahay, ɓa anja a mumulom ti gwat ngi migam ngi raˀahay ati zlili ngi raˀahaya gar zleˀe. Na wurenna, pura ɗi, i tiram bekehey le anga.

³⁷ Buyoy, ka mucufa taŋ a hirnga ndra asi ndra migam mungra avu ka na, gwat ngi migam mihaɗa ngi si ruwuy misenna, naŋ cek da taŋ. A wam ndra, ndra hirnga ndra vuna ati ginew ndraˀahaya, kaɓa taŋ hĩhĩyaka le gar. Kay, i cam le ar bonoy madiɗa wãˀ.»