NEHEMI 8 - Bible en langue guiziga

¹ Sukwi Israyel gar a ngiɓam ˀay ar li purla, a jumom jom ar li misi a mizlingre ngi Yam. A ɓaka Esdras, mbur misina toho gwata, ɓa a so ti ɗerewol ngi Ɓimujuwa ngi Moyis, Bumbulvuŋ muwuɗ da Israyeley na.

² Masay Esdras a so ti ɗerewol ngi Ɓimujuwa nga mbuŋ mizli ar kuso. Ar kus nah i ziley ati ngwasay waɗ ziriy zliv macinam gu. Naɓa i hin mudumbuŋ ngi kiya mitarnaˀ naŋ.

³ Esdras a slufa ɗerewol tuwa, a mbuŋ mizlingre ngi Yama, a mbuŋ ziley ati ngwasay waɗ ziriy zliv macinam gu, zle ngi li biŋ biŋ, hã wuzla papas. Mizli gar a jikaka slimiɗe le kuy kuy ngi cine ɓi ngir ɗerewol Ɓimujuwa nah.

⁴ Esdras, mbur misina toho gwata, a cici deŋ ar li miɗiyaka ti dum hĩˀĩ vriw a muŋ. Mideŋ deŋ a cikeˀe tir vay hazumo i ti: Matitiya, Sema, Anaya, Uriya, Hilkiya waɗ Maˀaseya. Yo tir vay gula kwana, i ti: Pedaya, Mikayel, Malkiya, Hasum, Hasebadana, Zakari waɗ Mesulam.

⁵ Esdras a wuna ɗerewolo a mihiri ngi mizli gar, asi naŋ vriw a muŋ ar mizli gar. Naŋ muwuna ɗerewolo wun si na, mizli gar a slikiɗam puyõˀ.

⁶ Ar nah na, Esdras a ga sise da Bumbulvuŋ, Buymisemuŋ madiɗa. Joˀ mizli gar a tiɓaka: «Anja kine! Anja kine!» haŋ yom a muŋ. A dirba nah, a hurukom, a hurukom huruk huruk a mbuŋ Bumbulvuŋ, midibiɗ a ruwuy a ruwuy.

⁷ Akẽh na, mizli levihey: Yesuwa, Bani, Serebiya, Yamin, Akup, Sabetay, Hodiya, Maˀaseya, Kelita, Azariya, Yosabat, Hanan waɗ Pelaya, mizli tayna a zlaka a dubunaka taŋ Ɓimujuwa tuwa.

⁸ Joˀ a slufa ɗerewol Ɓimujuwa ngi Buymisemuŋ tuwa, ti jiviɗ naŋ macin kwaŋ kwaŋ, a ɓa taŋ mbiɗeˀvra naŋ, ɓa a slaka wala ngi ɓi taŋ maslufaka taŋ di vuna.

⁹ Akẽh na, Nehemi, mbur miwi li ati Masay Esdras misina toho gwata waɗ Levihey maɓaka pulaˀvra ngi Ɓimujuwa da mizli gar na, a ɓaka taŋ: «Hin misenna i hin ngi Bumbulvuŋ, Buymisemuŋ kum. Anja ki likam ta, yo ki tuwam ta!» Asi mike na, mizli gar macinaka mingiɓi ngir Ɓimujuwa tuwa na, a roko tuwam zleˀe.

¹⁰ Esdras a ɓa t'ani ava ma: «A ram ngi hay kumoy, zumam gwat mezleŋ, yo sam gwat mundumoy. Mizli manja gwatay na, saka taŋ ti mi nga taŋ, vur hin misenna i muvula le da Bumbulvuŋ ndra. Anja ki likam ta, asi mumul maso ti vu Bumbulvuŋ na, mavulukum gidaŋ i nah.»

¹¹ Levihey a taˀaka mi da mizli, a ɓaka taŋ: «Cifam teˀ teˀ takwa, asi hin misenna i muvula le da Bumbulvuŋ. Anja ki likam ta.»

¹² Akẽh na, mizli gar a ram ngi hay taŋhay, ɓa a zumam gwat, ɓa a sam gwata. Yo mizli mujuwam vu tahay na, ɓa a saka taŋ ti mi nga taŋ, waɗ ɓa a bigaka mumul taŋ mihaɗa na, asi mingiɓi mudubunaka taŋ di na, a cinaka pulaˀavra naŋ le kuy kuy.

Gi muguzlum mazlaɓ

¹³ Angi hin mucuw naŋ na, buy ngi hayay ngi wuzla mizli gar, masayay ati leviheye, a kusom kos kos a ciki Esdras, mbur misina toho gwat tuwa, ɓa a slaka wala ngi ɓi ngir Ɓimujuwa na kuy kuy.

¹⁴ A lumam a tohoko ar Ɓimujuwa misenna, gwat Bumbulvuŋ miɓa ɗaˀ le da Israyeley ti balam Moyis na: ti hin ngi muguzlum ngi kiya mitarnaˀ naŋ na, sey Israyeley a hinam ar mazlaɓay.

¹⁵ Yo anja sey a ɓaka ɓi ngi muguzlum misenna, a tilam di mi ar walahay taŋhay gar waɗ a Zeruzalem, a ɓaka mizli: «Bam, a ram nga muwã, nguwoko mihaŋ ngi tutumbur mihirva ti hirvihey ati ngi ɓuhoy, kalaf ngi mirte, mihaŋ ngi Babazlahay, waɗ mihaŋ ngi widis mutukuf tukufoy, soko taŋ ɓa ngi ɗiya mazlaɓ, kaɓa mutohoko ɓi nah.»

¹⁶ Ar nah na, mizli a bam, a nguwoko kalaf ngi ɗiya mazlaɓaya. Mbur gar na, a ɗiyi a hirnga viŋ naŋ midika ti dike, malla a mamay taŋhay, a mamay ngi hay ngi Buymisemuŋ malla ar li misi a mizlingre ngi Yam, waɗ ar li misi a mizlingre Efrayim.

¹⁷ Mizli mukusom kos kos tuwa gar taŋ, ati mizli mumoko tir beke tuwa, a ɗiyam mazlaɓaya, a hinam angi taŋ. Dambalaka na, zle ti hin ngi Zozuwe, mangal ngi Nun, hã a ndilo hin nah na, Israyeley a gam gwat misi kanah ɗaˀ ta wãˀ. A gi avu taŋ tapasa i hin ngi mumul madiɗa.

¹⁸ Zle avu hin muɓulaˀ ngi muguzlumo, hã avu hin ngi dirba naŋ wãˀ na, Esdras ara slufa taŋ ɗerewol Ɓimujuwa ngi Buymisemuŋ vur hin gar. A gaka muguzlumo hã hin tarnaˀa. Yo angi sirik taŋ, hin midangafaɗ naŋ na, a gam di kus madiɗa ngi kiɗa mi naŋ.