NEHEMI 6 - Bible en langue guiziga

Nehemi, mesene naŋhay a wuɗamgakaŋ malambaˀ

¹ Sanebalat ati Tobiya, Gesom, mbur Arap waɗ mesene ndra mekelemeye, a cinaka na, i mahiri ngi ndira moholo le, yo li munjoŋ njoŋhoy tuwa anta mata. Naɓa ti di nah vuna i ca palalam ngi mizlingreheye t'aruŋ ngbaŋ.

² Ar nah na, Sanebalat ati Gesom a slinoko mbur a so ɓiy: «Sawa, i ra gam cikil a Kefirim, ar sozo Ono.» Dambalaka taŋ ti wuluk ɓa ngi sa giy malambaˀa.

³ Ya kwana, yi slin mbur ng'avi taŋ ɓa ara ɓa taŋ na: «Slra, ya maga hana na, i slra madiɗa kuyta wãˀa, y'anta lum haŋ ngi ru gu ta. Da yi ru le nga zlir ti kumo na, naɓa slra a sa cici gay lambaˀ na kuy kwa?»

⁴ A slinoko ti mingiɓi misi purla ng'avi ya sar mufaɗa, amma yi mbiɗa taŋ di mi misi purla na si.

⁵ Ngi sar muzlum naŋ na, Sanebalat a slino mbur purla a wuzla gawla naŋhay ng'avi ya ti mingiɓi misi purla, ti letir manja sluruɓa mi naŋ, kaw a haŋ.

⁶ A ɓi angi letir vuna na: «Maɓaka ɓi ɗik a wuzla sukwi ngi mizli yudehey ta ko a maka gar na, i ra cinaka, yo ko Gesem kwana, a ɓiy di le. A ɓi na: Ka ati Yudeheye, ki wuɗam ɓa ki slikiɗam ɓi. Yo ka mandira mohol na vurˀe, ɓa kisa cifi buy taŋ kini.

⁷ A ɓam ma na, a Zeruzaleme, ki cifi mijiviɗey le ɓa a sa tilam mi ti ɓi ɗike: Ki cifi buy le a hirwuy Zuda. Ani wurenna, a sa ɓaka mingiɓi hanayna da buy Perse. Da ki wuɗ le na, sawa ɓa i gam cikil jom arleˀe.»

⁸ Dar yi slin mbur ɓa ara ɓaŋ na: «Ɓi ka maɓa hana gar na, ko gwat mikaslsla anta neˀ ara ta. Magujuwo ɓi tayna cek i ka vuna si.»

⁹ Asi mike na, mizli tayna gar a wuɗam na, ɓa a gam ndra zluwun, vur a ɓam ti kwacay taŋ na: «Naɓa a sa pulam haŋ kwalal avu slra, ɓa slra taŋ anta sa kiɗ mi mata wãˀ!» «Haˀaw Buymisemuŋ, vuliy gidaŋ ar slra misenna takwa!»

¹⁰ Tapas numuŋ ada na, i ru ngi hay Semeya, mangal ngi Delaya, dideˀ ngi Metabeyel, asi a ndilo gu ngi hay ɗu ta. Semeya tuwa, a ɓiy na: «Akum i ra zliram ar hay ngi Buymisemuŋ, a wuzla hay vuna cummo. I gicaka miviŋheye giceˀ giceˀ le, asi mizli ara soko nga kiɗ ɗike vagay. A ɓam a sa soko nga kiɗ ɗik vuna ti duvuɗ kini.»

¹¹ Akẽh na, yi mbiɗaŋ di: «Mbur misi kaɓa ya na, ɓa i kil sukwa? Na zle, mbur misi kaɓa ya na, i ci ng'ar hay ngi Buymisemuŋ, ɓa hã y'ada ti siifa gisiŋ sukwa? Kay, y'anta sa ci vuna ta si.»

¹² Asi mike na, i si na le i Buymisemuŋ mislino di ng'avi ya zleˀe ta si, asi naŋ miɓa ɓi misenna gar na ar ya vuna si. Ko mbri na, Tobiya ati Sanebalat a vulakaŋ dala le, ɓa a so ɓiy kanah.

¹³ A vulakaŋ dala vur mike? A vulakaŋ di na, da a so ɓiy le kanah na, naɓa zluwun a sa giy, i sa ga gwat naŋ miɓiy di na gar, ɓa i gi mungra. A puram di gar i jiviɗ ɓa slimiɗ ɗu a zil tir malambaˀa, yo ɓa a puraka na, i za Bumbulvuŋ le.

¹⁴ Aw Buymisemuŋ ɗu, Tobiya ati Sanebalata, gwat taŋ migaka, yo Noˀadiya, ngwas mijiviɗ ati mijiviɗ mekelemey gar mawuɗam ɓa a gikiy zluwun na, ka ɓi nah ɓaˀ a slimiɗe.

¹⁵ Mihiri ngi ndira moholo, a kiɗ mi angi hin kukur cuw nga zlum ngi kiya Elul. A gam hin kukur zlum nga cuw ar slra nah.

¹⁶ Mesene ndrahay ati sukwi ngi mizli mekelemey mugun hirnga ndra gar micinaka ɓi nah na, zluwun a ga taŋ le haɗa teˀe, akẽh na, taŋ vuna ti hirnga taŋ a puraka vu taŋ, a mam le a dirba. Taŋ a sinaka le, slra misenna migi gar na, asi Bumbulvuŋ ndra a ca haŋ naŋ le anga.

¹⁷ Hirak ti hin tayna vuna ma na, mizli madiɗa ngi Yudehey ati ngi Tobiyahaya, ada tohom letirey haɗa ar wala taŋ.

¹⁸ Asi mike na, Yudehey haɗa a jumom ˀay le bummoˀ ti hudum, vur naŋ vuna i jomo ngi mbur Yude mazilaka Sekaniya, mangal ngi Ara. Waɗ ma na, mangal naŋ Yohanaŋ a zuɓ ngwasa i zuŋ ngi Mesulam, mangal ngi Berekiya.

¹⁹ Yudehey a ngilam di wuy a mihiri ɗu vuna si, a rakaŋ ti ɓi ɗu ya. Tobiya a sliniy ti letireye zleˀe na, ɓa a giy zluwun.