NEHEMI 12 - Bible en langue guiziga

Slimiɗ ngi masayay ati ngi mizli levihey mimam ti ruwuy mulaka

¹ Masayay ati levihey munduloko ati Zorobabel, mangal ngi Seyaltiyel, waɗ Yesuwa na, i ti: Seraya, Irmeya, Esra,

² Amariya, Maluk, Hatus,

³ Sekaniya, Rehum, Meremot,

⁴ Ido, Ginetoy, Abiya,

⁵ Miyamin, Maˀadiya, Bilga,

⁶ Semaya, Yoyarip, Yedaya,

⁷ Salu, Amok, Hilkiya waɗ Yedaya. Ti hin ngi Yesuwa na, mizli hanayna gar, i buy ngi masayay ati ngi sukum taŋhay.

⁸ A wuzla Leviheye i ti: Yesuwa, Binuwi, Kaɗmiyel, Serebiya, Yehuda ati Mataniya. Mataniya ati sukum naŋhaya, slra taŋ i zli dimis ngi hunuma Bumbulvuŋ.

⁹ Bakbukiya ati Uni, sukum taŋ Leviheye, taŋ dedeŋ, hiri pulaˀ pulaˀ ng'ar taŋ, ɓa ngi tiɓa dimise.

¹⁰ Yesuwa a yi Yoyakim, Yoyakim a yi Eliyasip, Eliyasip a yi Yoyada,

¹¹ Yoyada a yi Yonataŋ, yo Yonataŋ a yi Yaduwa.

¹² Ti hin ngi Yoyakim na, buy ngi hayaya, masayay ani: asi muy ngi Serayahay i Meraya, asi ngi Irmeyahaya, i Hananiya,

¹³ asi ngi Ezraˀahaya, i Mesulam, asi ngi Amariyahaya, i Yohanaŋ,

¹⁴ asi ngi Melukuhoyo i Yonataŋ, asi ngi Sebaniyahaya, i Zozef,

¹⁵ asi ngi Harimeye, i Atna, asi ngi Merayotoy, i Helkay,

¹⁶ Zakari asi ngi Idohoy, Mesulam asi ngi Ginetoŋhoy,

¹⁷ Zikri asi ngi Abiyahay, mbur ngi Miniyaminey, Piltay asi ngi Moˀadiyahay,

¹⁸ Samiwa asi ngi Bilgahay, Yonataŋ asi ngi Semayahay,

¹⁹ Matenay asi ngi Yoyaripey, Uzi asi ngi Yedayahay,

²⁰ Kalay asi ngi Salayay, Eber asi ngi Amokoy,

²¹ Hasabiya asi ngi Hilkiyahay, waɗ Netaneyel asi ngi Yedeyahay.

²² Angi hin ngi ti Eliyasip ati Yoyada, Yohanaŋ waɗ Yaduwa na, Levi, buy ngi hayay ati masayaya, a tohoko slimiɗ taŋhaya toh toh le, hã a ndila hin ngi zumabuy ngi Dariyus, buy Perse.

²³ Levi, buy ngi hayaya, a tohoko slimiɗ taŋhaya ar ɗerewol ngi slufa ɓi madiɗa madiɗa mucohomoy zleˀe, hã a ndila hin ngi Yohanaŋ, dideˀ ngi Eliyasip.

²⁴ Buy ngi si Leviheye i ti: Hasabiya, Serebiya ati Yesuwa, mangal ngi Kaɗmiyel, waɗ sukum taŋ Levi mekelemeye deŋ deŋ, hiri pulaˀ pulaˀ ng'ar taŋ ngi zli dimis ngi hunuma Buymisemuŋ. Asi mike na, Davit, mbur ngi Buymisemuŋ a vula ɓi nah le kanah, ɓa a zlaka, mizli ti ngay taŋ ti ngay taŋ, a hunumaka Buymisemuŋ, yo a gakaŋ sise.

²⁵ Mataniya, Bakbukiya, Abadiya, Mesulam, Talmoŋ ati Akupo, slra nga taŋ i jigina mizlingre ati gwatay muwam taŋ vu ar hay ngi ciki mizlingre vuna.

²⁶ Mizli gar na, a gaka slra nga taŋ angi hin ngi Yoyakim, mangal ngi Yesuwa, dideˀ ngi Yosadak, yo angi hin ngi ti Nehemi, buy miwi li ati Masay Esdras misina toho gwat.

Muguzlum ngi kiɗa mi ngi ndira mohol ngi Zeruzalem

²⁷ Ngi gi muguzlum ngi vula mohol ngi Zeruzaleme da Bumbulvuŋ, mizli a ram nga supoko Levihey ar li taŋ mipam anga anga gar, ɓa a soko nga Zeruzaleme, ngi gi muguzlum ngi wuna moholo, ti mumul, ti hunuma vu ti dimis, ti kiɗa jãw jãway, kãkuhoy waɗ gujuvuroy.

²⁸ Mizli dimisey a kusoko tir vay prok ngi Zeruzalemey, waɗ tir walahay Netofahay,

²⁹ zle a Bet-Gilgal ati purok ngi Gebahay, waɗ ti Asmavet, asi mizli dimiseye, a pam ti walahay taŋhay gun hirnga ngi Zeruzaleme.

³⁰ Akẽh na, masayay ati levihey a gam mezegwel ngi zuɓa hiryi taŋhay avra, yo ngi zuɓa hiryi ngi sukwi Israyel gar, hiryi ngi mizlingrehey ati ngi mohol ngi Zeruzalem vuna.

³¹ Ar nah na, yi ɓi ɓa buy ngi si Zudahaya, a jiɗam ng'ar moholo. Yi ɗuf ngay madiɗa madiɗa, taˀ taˀ cuw ngi zli dimisi. Ngay mizli dimis mudumbuŋ, aru tir vay hazum, kini ngir ti mizlingre ngi Zay gwatay.

³² Maram sek a dirba taŋ ya kwana, i ti: Hosaya waɗ reta ngi buy ngi si Zudahaya.

³³ waɗ Azariya, Esra, Mesulam,

³⁴ Yehuda, Benjameŋ, Simeya ati Irmeya.

³⁵ A dirba nah ma na, i masayay ti zarahay. Zakari, dideˀ ngi Asaf, angi tizer ngi Zakur, Mikaya, Mataniya, Semaya ati Yonataŋ,

³⁶ ati sukum naŋhay, Semaya, Azarel, Milalay, Gilalay, Maˀay, Netaneyel, Yehuda waɗ Hanani, ara supoko taŋ ti gwat ngi dunguroy, ngi Davit mbur ngi Bumbulvuŋ. Esdras, mbur misina toho gwata, naŋ ɓaˀ a mbuŋ taŋ.

³⁷ Mizli dimisey tuwa mindilam a mizlingre ngi ru ng'ar Miviɗiviɗi ngi yama, keɗ na, li majiɗam ti jiɗ ng'ar Walahay ngi Daviti. Joˀ a jiɗam tir li majiɗam ti jiɗ tir mohol vuna, taŋ misi a hirngi hay ngi Davite, a ram sesẽŋ a mizlingre ngi Yam, misi tisi pas ngi mipriki.

³⁸ Ngay mucuw naŋ ngi mizli dimiseye, aru kini tir vay haŋ gula, ya vuna ɓaˀ a dirba taŋ ar moholo waɗ reta ngi buyoy mindiram tuwa. I cohom kini ti hirngi hay musubur ngi di gwat, i ram sesẽŋ avu ɓiɓir ngi mohol mindih ndah ndah a diga na.

³⁹ I ram ti hirnga mizlingre ngi Efrayim, ti hirnga mizlingre ngi Yesana, waɗ ti hirnga mizlingre ngi kilifey. A dirba nah, ti hirngi hay musubur ngi Hananeyel ati hay musubur mazilaka Skat, hã sesẽŋ a mizlingre tumuŋhoy. I sa ra kiɗam mi a mizlingre ngi mijigina lihey.

⁴⁰ Ngay ngi mizli dimisey mitaˀtaˀ cuw tuwa, a cicam ar hay ngi Buymisemuŋ, waɗ ya vuna ati reta ngi buyoy, ndra mindiram bummoˀ tuwa.

⁴¹ Yo masayay: Eliyakim, Maˀaseya, Miniyamin, Mikaya, Eliyohenay, Zakari waɗ Hananiya, ara fam zara.

⁴² Yo waɗ Maˀaseya, Semaya, Elazar, Uzi, Yohanaŋ, Malkiya, Elam waɗ Ezer. Mizli dimisey mazlaka dimis taŋ macin na, baɗ tivi Izrahiya.

⁴³ Tapasa, mizli a gam mikuli haɗi teˀe da Buymisemuŋ, a mumulom haɗa, asi Buymisemuŋ a vula taŋ mumul le haɗa teˀe. Ngwasay ati ziri kwana, a mumulom haɗa ya, hã mumul taŋ na, a zuɓa le ngiɗ ngiɗ.

Gwat mihĩˀĩ ngi masayay ati levihey

⁴⁴ Viŋhey ada, taŋ hĩˀĩ ngi wi vu ti gwat micikiɗeffe ngi migamay ati mukuruˀ gwatay. Ti di nah so na, a wunam mizli ɓa ngi jigina viŋ tayna. Gwatay masoko taŋ tir prokoy mugun hirnga taŋ, kaɓa majuwaka ɓi nah ngi vul da masayay ati leviheye, ɓa mizli tayna a cikilaka taŋ, a paka taŋ ng'ar viŋ tayna. Asi mike na, masayay ati levihey misi angi slra taŋ na, ada a cira hiri da Zudahaya.

⁴⁵ I taŋ magaka slra ngi Bumbulvuŋ taŋ, waɗ slra ngi mezegwel ngi zuɓa hiryi avra. Amma mizli dimisey ati mijigina mizlingreheye, a gaka slra nga taŋ kaɓa Davit ati mangal naŋ Salomoŋ mupulaka taŋ jiviɗ naŋ.

⁴⁶ Asi mike na, ti hin ngi Davit ati ngi Asaf na, buy ngi mizli dimisey ada, a zlam dimis ngi hunuma Buymisemuŋ ati ngi gaŋ sise.

⁴⁷ Ti hin ngi Zorobabel ati Nehemi, vur hin gar na, Israyeleye, ar gwat taŋhay gar na, a vulaka mi ngi mizli dimisey waɗ ngi mijigina mizlingreheye. Yo gwat muvula da Bumbulvuŋ gar na, naɓa i ngi Levihey, joˀ Leviheye kwana, a vulaka mi ngi ziri ngi Aroŋhoyo ya.