NEHEMI 10 - Bible en langue guiziga

Mizli muvulaka vu taŋ vur ɓimujuwa

¹ Vur ɓi ngi gwat tayna gar mindiloko avu ndra Israyeley na, i jumom ˀay kuy kuy wãˀ, waɗ toh toh ɓi nah ti tuh ar ɗerewol. Buy ndrahay, mizli madiɗa ndrahay ati levi ndrahay waɗ masay ndraˀahaya, a tohoko slimiɗ taŋhaya toh toh waɗ haŋ taŋ taˀ taˀ anga.

² Ɗerewol muɗuva haŋ taˀ taˀ anga nah na, mizli misi slimiɗ taŋhay anga, t'ani: «Nehemi, mangal ngi Hakaliya, buy miwi li, Sedekiya,

³ Seraya, Azariya, Irmeya,

⁴ Pasehur, Amariya, Malkiya,

⁵ Hatus, Sebeniya, Maluk,

⁶ Harim, Meremot, Obadiya,

⁷ Daniyel, Ginetoŋ, Baruk,

⁸ Mesulam, Abiya, Miyamin,

⁹ Maˀaziya, Bilgay waɗ Semaya, hanayna gar i masayay.

¹⁰ Levihey kwana, i ti: Yesuwa, mangal ngi Azaniya, Binuwi, mbur ngir tizer ngi Henadat, Kaɗmiyel,

¹¹ ati sukum taŋhay: Sebaniya, Hodiya, Kelita, Pelaya, Hanaŋ,

¹² Mika, Rehop, Hasabiya,

¹³ Zakur, Serebiya, Sebaniya,

¹⁴ Hodiya, Bani waɗ Abeninu.

¹⁵ Buy ngi wuzla mizli, i ti: Paros, Pahat-Moˀap, Elam, Zatu, Bani,

¹⁶ Buni, Asgat, Bebay,

¹⁷ Adoniya, Bigivay, Adiŋ,

¹⁸ Ater, Hiskiya, Azur,

¹⁹ Hodiya, Hasum, Besay,

²⁰ Harif, Anatot, Nebay,

²¹ Makpiyas, Mesulam, Heziri,

²² Mesezabel, Sadok, Yaduwa,

²³ Pelatiya, Hanaŋ, Ananiya,

²⁴ Oze, Hananiya, Hasup,

²⁵ Halohec, Pila, Sobek,

²⁶ Rehum, Hasapna, Maˀaseya,

²⁷ Ahiya, Hanaŋ, Anaŋ,

²⁸ Maluk, Harim, waɗ Baˀana.

²⁹ Israyel mekelemey mujumoko ng'avu taŋ i masayay, Levihey, mijigina mizlingrehey, mizli dimisey, gawla migi slra ngir hay ngi Bumbulvuŋhoy waɗ mizli gar mingicoko ti vu sukwi mekelemey gar, ɓa ngi sipa Ɓimujuwa ngi Buymisemuŋ, yo taŋ ya kwana, jom ati ngwas taŋhay ati ziri taŋ mizile ati mongosohoy waɗ ziri taŋhay gar zliv maslaka wala ngi ɓi gu.

³⁰ Mizli Israyel hanayna a vulaka jini taŋhaya da mizli madiɗa taŋ hanayna, yo a ɓam ɗaˀ ɗaˀ le ti hudum ɓa a sipaka Ɓimujuwa ngi Buymisemuŋ miɓa taŋ di ti balam Moyis gawla naŋ na. Yo ɓi Bumbulvuŋ Buymisemuŋ ndra miɓa ɗaˀ le, ɓimuɗuva naŋhay ati gwat naŋ mawuɗ gar na, a jaka taŋ a hirnga, yo a gam taŋ slra.

³¹ Vurˀe, mizli, ndra mulumaka taŋ a si hirwuy nah na, ndr'anta sa vulaka ziri ndra mongosohoyo ɓa a zuɓaka taŋ ngi ngwasa ta. Yo ziri taŋ mongosohoyo kwana, ndr'anta sa zuɓaka taŋ ngi ngwas da ziri ndraˀahaya ta ya.

³² Yo tapas sabat ati hin ngi muguzlum na, gwat ngi hiɗik wanahayka gar mizli tayna musoko taŋ le na, ndr'anta sa hiɗikaka taŋ ta. Naŋ kine, angi vi mitarnaˀ naŋ gar na, i pulaka hirwuy a musuk vu, yo ndr'anta cufuɗam ɓa a wurkam ndra duvusoyo ta.

³³ Ngi ndra na, i juwam ɓi le, ɓa angi vi gar na, i vulam ɓiri bara maji gram mufaɗa ngi gi slra ar hay gi Bumbulvuŋ ndra.

³⁴ I gwat masa gi slra ngi sa luuma ɗaf ngi bigi da Bumbulvuŋ, ngi mikuli magaka mbak le ta, ngi mikuli ngi zlum ti zlum mimbak le ta ati ngi gi tapas sabat, ngi mikuli ngi kiya muslo le ati ngi muguzlumoy, ngi gwat muvulahay le da Bumbulvuŋ, ngi mikuli ngi zuɓa mungra ngi Israyeley avra, waɗ ngi slra ngi gihey wal wal gar ar hay ngi Buymisemuŋ ndra.

³⁵ Ngi ndra masayay ati levihey waɗ mizli gara, i gam ceregezleŋ le ya, vur ɓi ngi vula dum ng'ar hay ngi Bumbulvuŋ ndra. Asi vur vi gar na, sey hay ngi mbur gar aru ti dum ar deɗe ngi mikuli, kaslsla ar hin muɗuvaka le da mbur ada mburo ti ceregezleŋ. Dum nah na, ɓa a ɗiyam di vu ar li gi mikuli ngi Bumbulvuŋ, Buymisemuŋ ndra, kaɓa mutohoko ɓi nah ar ɗerewol Ɓimujuwa.

³⁶ Naŋ kanah ma, vur vi gar na, sey i vulaka micikiɗeffe ngi gwat ngi migam ndrahay ati ngi widis ngi zum ndraˀahaya gar ng'ar hay ngi Bumbulvuŋ.

³⁷ Yo i vulaka ziri ndra modogom mizilehey ati ngi ginew ndraˀahaya, kaɓa mutohoko ɓi nah ar ɗerewol Ɓimujuwa. Modogom ngi sla ndrahay, ngi tumuŋ waɗ ngi ˀaw ndrahay gar na, i soko taŋ ng'ar hay ngi Buymisemuŋ ndra waɗ da masayay misi ar slra ar hay ngi Buymisemuŋ ndra.

³⁸ Maɗaf mufukuɗa mimezle ndraˀahaya, yi ngi widis ngi zumoyo gar, mbaazla si ati mal ndraˀahaya, i wuɗoko cah cah avu taŋ, i ram di da masay ndrahay misi ar viŋhey ar hay ngi Buymisemuŋ ndra waɗ mukuruˀ ngi gwat ngi migam ndraˀahaya kwana da Levihey. Levihey a sa ra tuɓoko mukuruˀ ngi gwata, ar walahayay ndra magam slra ara gar.

³⁹ Tapas Levihey masa ra tiɓaka mukuruˀ ngi gwatay na, masay purla a wuzla ziri mizile ngi Aroŋhoy, a sa ru asi taŋ. Yo Leviheye kwana, taŋ mutuɓoko mukuruˀ ngi gwatay vuna le na, a sa zuɓaka mukuruˀ taŋhaya, a vulaka ng'ar hay ngi Buymisemuŋ ndra, a sa paka ar viŋ ngi cikila zlili.

⁴⁰ Asi Israyeley ati ziri mizile ngi Leviheye, gwat ngi vul taŋhay: alkamari, mbaazla si ati mal gar na, a sa soko taŋ ng'ar viŋhey mawam vu ti zlili ar taŋ tayna. Gwatay magam taŋ slra ar hay ngi Bumbulvuŋ, masayay magam slra aruŋ, mijigina mizlingrehey waɗ mizli dimisey gar na, taŋ angi viŋ tayna vuna. Kanah na, ndr'anta sa pulaka hay ngi Buymisemuŋ ndra njoŋ kine ta.