NEHEMI 1 - Bible en langue guiziga

¹ Hana i ɓi ati slra ngi Nehemi, mangal ngi Hakaliya. Angi kiya Kisilew ngi vi mizli ngir cuw ngi zumabuy ngi Artakzerses na, naɓa ya Nehemi, ya a Sus, walahay muguno ti mohol.

Nehemi micina labara ngi Zeruzalem

² Akẽh na, Hanani, mbur ngi wuzla sukum ɗuwoyo a ndilawa baɗ ti ruwuy Zuda waɗ mizli njiraˀ aseˀe. Joˀ yi cufuɗa taŋ vur ɓi ngi zude mijahay, mumoko ti ruwuy mulak, mindiram ti siifa waɗ vur ɓi ngi Zeruzaleme ma.

³ Taŋ a mbiɗikiy di: «Mizli mumoko ti ruwuy mulak, nga ruwuy buy Zuda miwa a diga, a roko ti bonoy madiɗa waɗ ar mesem. Asi mike na, a slinaka mohol ngi Zeruzaleme le njoŋ njoŋ, yo ma na, a wuraka miviŋ ngi mizlingreheye le.»

Nehemi midir dibiɗ vur Yudehey

⁴ Ya micina mingiɓi hana tuwa cin na, ya joˀ nga ruwuy ti tuwuy, hã i zik ar li like, hin mbeˀ mbeˀe. Yo i ra gi dalyam, i ra dir dibiɗ a mbuŋ Buymisemuŋ misi ar birngiŋ.

⁵ Yi ɓaŋ: «Aw Bumbulvuŋ, Buymisemuŋ ngir birngiŋ, ki Buymisemuŋ madiɗa, yo ki Buymisemuŋ magi zluwun da mburu. Mizli mawuɗokuw, yo majaka ɓimuɗuva ɗikey a hirnga na, ka Buymisemuŋ, ki ro ti jumoˀay ati taŋ, yo k'ada teŋteŋ avu taŋ.

⁶ Anja ki jiko slimiɗ, yo ki ɗuvo hiri ng'ar ya, ɓa ki cine diradibiɗ nga ya gawla ɗike takwa! Wurenna, duvuɗ ti papas gar na, i ra dir dibiɗ a mbuŋ ɗike, vur gawla ɗik Israyeleye. Mungra, ndra Israyeley mugukuw di gar na, i ra njukuw di. Ya ati dideˀ ɗuwoyo i gam mungra le avu ka.

⁷ Kay, i gukuw gwat ngi ji mevel le gisiŋ gisiŋ, yo ɓimuɗuva ati ɓimujuwa waɗ ɓi ngi sirik ɗikey, ka muvula taŋ da gawla ɗik Moyis na, ko i jaka taŋ kaw le a hirnga ta.

⁸ Mingiɓi ɗik, ka mupula jiviɗ naŋ da gawla ɗik Moyis miɓa na, wulka keŋ takwa, asi a ɓi zleˀe na: ‹Da ki cifam teŋteŋ avu ya ta na, naɓa yi sa zliɗukum hirnga mber mber nga wuzla sukwi ngi mizli.

⁹ Amma da ki ra moko ng'avi ya, ɓimuɗuvahay, ki ra jaka taŋ a hirnga, ki ra gam taŋ slra na, naɓa ko da a hilaka mizli kumoyo le nga ruwuy mulak, a ram taŋ le nga ruwuy mira kiɗo mi tekede kwana, yi sa cikilo hirnga taŋ, i sa mo taŋ cummo ng'ar li ya muwuna, ɓa i ndir a diga na si.›

¹⁰ Taŋ i gawla ɗikey, yo i sukwi ɗik ka mumbuɗo hirnga taŋ ti gidaŋ ɗik mihaɗa waɗ ti haŋ ɗik musolok na.

¹¹ Aw Bumbulvuŋ, jiko slimiɗ ɓa ki cine diradibiɗ nga ya gawla ɗike, waɗ ngi gawla ɗikey mahĩyãka zluwun ti ka na. Ga ɓa gwat ya mawuɗ i ga dana na, i ga gu, yo ga ɓa buy a puriy ircece takwa.» Ti di nah vuna, naɓa mavula gwat ngi si da buyo i ya.