NAHUM 1 - Bible en langue guiziga

¹ Tila mi vur walahay Niniv. Misi ani na i mingiɓi, Buymisemuŋ minjika da Nahum, mbur Elkos.

Bumbulvuŋ, i Buymisemuŋ, a gi zluwun, yo naŋ mezle

² Bumbulvuŋ i Buymisemuŋ misi suloŋ, yo a pul cuwal ma. Bumbulvuŋ i mupula cuwal, himaˀ naŋ a gi zluwun. Mizli mazliram ti naŋ ta na, Bumbulvuŋ a pula cuwal naŋ ar taŋ, a zuɓ himaˀ fõh fõh ng'ar mesene naŋhaya.

³ Bumbulvuŋ anta ji mevel kutum ta gisiŋ, naŋ gidaŋ haɗa, amma mbur muzluɓ ɓi le na, Bumbulvuŋ anta pulaŋ mbaka si ta. Da ara cuh na, mbak musuwre ati burkataŋ, gazlavaya i lagwada ngi si sar naŋ.

⁴ A mbura himaˀ da mubuliye, a hisik ngbatataŋ, a hisika yam ngi mizawaya cek. Ɓuh ngi Basaŋ ati Karmele, a vus ti vus, gwat tukuzo ngi ruwuy Libaŋhay a ɓutom.

⁵ Muwãhay a jijikam a mbuŋ naŋ, li miɗingirey a luwuslam. Hirwuy a jijik a mihiri naŋ, duniya ati mizli ngi raˀahaya gar a jijikam.

⁶ Macici avu himaˀ naŋ gu i waka? Da naŋ miji mevel le na, maɓusa ɓi nah gu i waka? Ji mevele mufõh fõh na, a slikiɗ ka vu matiɓi giw giw, mandazlay muwãhaya a ndislam kpah kpah a mbuŋ naŋ.

⁷ Bumbulvuŋ naŋ mezleŋ, ar hin ngi bonoyo, i li ɗum ngi mburu. Mizli maɗumom ava na, a ki slimiɗ ar taŋ.

⁸ Ko da mendere ara cuh kaɓa mekepel madiɗa kwana, a ki slimiɗ ar taŋ na si. Amma a hirya walahay avra, a ɓula mesene naŋhaya sesẽŋ ng'ar li luvuŋ.

Mingiɓi misi aseˀe aseˀe da walahay Zuda ati da Niniv

⁹ Ki gam gidiɓi mi ar Bumbulvuŋ ka? Mizli mazliram ti kum ta na, a ngizla taŋ pay, bonoy anta sa mo mata.

¹⁰ Asi taŋ slilah slilah kaɓa sisim, yo taŋ muwam wãˀ ti mbaazla tuwa na, a sa zlizliraka taŋ pay kaɓa giziŋ muˀulo.

¹¹ Hirwuy Niniv, mbur magi gidiɓi ar Bumbulvuŋ ngi gi malambaˀ na, a bo tivi ka, i mbur misi wuluk malambaˀa.

¹² Bumbulvuŋ a ɓi ani: «Ko da mesene kumoy a ndilaka le gucuˀo, yo taŋ haɗa tekeɗe kwana, a sa ngizlam pay na si, ɓi taŋ a sa kiɗ mi. Yi hunukum duba le wãˀ ti bonoy zleˀe, amma y'anta sa mahiri naŋ mata.

¹³ Wurenna, i ra ngila galalaŋ naŋ mihirisl ar kum vuna, yo i ra pusukukum celelu kumoy avra.»

¹⁴ Mizli Ninivey, Bumbulvuŋ ara ɓi ani ɗaˀ ɗaˀ vur kumo: «Kum anta lumam dideˀ kumoy ngi sa zila slimiɗ kumo mata. Kuli kumoy miciɗa ti ciɗ malla mipa ti pihey na, i sa susuyumo taŋ tir hay taŋhay avra. I ra la vigiɗ ngi dik kumo, asi kum i mizli mupuɗaway ta.»