MISE 5 - Bible en langue guiziga

Buy miɓaka ɓi naŋ ɗaˀ le tuwa, a sa ɓo ti Betelyem

¹ Bumbulvuŋ a ɓi na: «Naka Betelyem, hirwuy Efrata, ki walahay meciɗek wãˀ a wuzla walahay ngi muy ngi Zudahaya. Amma mbur a sa bo tivi ka vur ya, ɓa a wa mizli Israyeleye. Degezer naŋ, a zlo zle misi ngadana ta, zle ngi sete.

² Vurˀe, Buymisemuŋ a sa pula Israyeleye mbak asi haŋ ngi mesene taŋhaya, hã ngwas misi zuŋ a kwacay na, a yi ɗagay. Akẽh na, sukum naŋhay mindiram na, a sa jumom ng'avi Israyeley.

³ Naŋ buy tuwa, a sa cici zlak, a jigina mizli naŋhaya, ti gidaŋ ngi Bumbulvuŋ, ti dudok ngi slimiɗ ngi Bumbulvuŋ, Buymisemuŋ naŋ. Mizli naŋhay a sa cifam setette, yo mizli a sa sinaka madiɗa naŋ na, hã a si diˀisi.

⁴ Masa so ti zuy asi ruwuyo i naŋ vuna. Da mizli Asirihey misa coko le asi hirwuy ndra, ara zumaka hay ndraˀahaya na, i sa cicam mijiginey tarnaˀ, waɗ buy ngi mizli dangafaɗa, ɓa a zliram dibiɗ ati taŋ.

⁵ Taŋ, a sa waka hirwuy Asiri ti maslalam taŋhaya, yo a sa waka hirwuy Nemroto ti gordo taŋhay. Amma da Asirihey misa coko le asi hirwuy ndra, yo taŋ misa coko le, hã ar maakway ndra na, masa laha ndra i buy vuna.

Israyeley mindiram ti siifa a wuzla sukwi ngi mizli

⁶ Akẽh na, Israyeley mindiram ti siifa na, a sa tiram a wuzla mizli mihaɗahaya, kaɓa wulngar Bumbulvuŋ magico di tos purla, kaɓa yam ngi vuŋ maji avu giziŋ, manja a kutuk ti vu mbur, manja a njih hiri asi mbur titira.

⁷ Akẽh na, Israyeley mindirama, a sa tiram a wuzla sukwi mihaɗa, kaɓa mobor a wuzla gwat misahmi ngi ɓuhoy, kaɓa zinga ngi mobor a wuzla tumuŋ gezleŋ taˀ. Da naŋ mira cuh gar na, a ja gwata, a ngira, amma ko mbur malaha ginewe gu ti vaˀa anta.

⁸ Anja ki zuɓa haŋ ɗik ng'ar mizli mazliram ti ka ta na so, yo anja ki ngizla mesene ɗikeye!

Gwat mizli majaham taŋ lambaˀ na, Bumbulvuŋ a sa susuyumo taŋ

⁹ Bumbulvuŋ a ɓi: «Tapasa, i sa ngizla pilis kumoyo, yo i sa ziza mota ngi vurum kumoy avra.

¹⁰ I sa waha walahay ngi si ruwuy kumoy avra, yo li kumoy ngi ndil ng'ar taŋ tuwaˀa, i sa mbizla taŋ avra.

¹¹ Ɓi ngi cucuk kumoy na, i sa kiɗa ɓi nah avra, yo mupura daˀasay a sa kiɗam mi a wuzla kumo.

¹² Kuli dum miciɗa ti ciɗey ati kuli ɗuguroyo, i sa ngurfo taŋ a sa soko taŋ asi ruwuy kum avra, gwat kum migaka ti haŋ kumo, kisa hurkom a mbuŋ naŋ mata.

¹³ Kuli ɓamtal kumoyo, i sa muɗa taŋ tisi ruwuy kumo avra, yo i sa waha walahay kumoyo.

¹⁴ Sukwi ngi mizli micinikiy mi ta na, i sa pula cuwala ar taŋ ti mevel fõh fõh haɗa.