MISE 4 - Bible en langue guiziga

Zeruzalem, walahay hirnga ngi cifi zuy araŋ

¹ «Tumbuŋ na, gwat masa gi ani: muwã misi hay ngi Bumbulvuŋ anga na, a sa ɗuvaka a hirnga muwãhay gar, a sa gi subur fineˀ li miɗingireye gar, joˀ mizli a sa mbizlam ciɗngim ciɗngim ng'avaŋ.

² Sukwi ngi mizli haɗa a sa ram nga diga, a sa ɓam: ‹Akum, juɗukum nga muwã Bumbulvuŋ, ng'ar hay ngi Buymisemuŋ ngi Zakop. Naŋ, a sa biga ndra jiviɗ naŋ, joˀ ndra, i sa sipaka jiviɗ naŋ vuna cirre.› Asi gwat ngi dubuno, a bo ti Siyoŋ, yo mingiɓi ngi Bumbulvuŋ a ndilo ndra ti Zeruzalem.

³ A sa ndir i misli kiita ar wala ngi mizli haɗa, sukwi ngi mizli migidaŋhay, ko mikileŋhey kwana, naŋ a sa ndir i misli kiita taŋ. Sukwi ngi mizli vuna a sa vuɗam sliŋ ngi gam ngi slahay ti maslalam taŋhaya, ziwit taŋhaya, a sa vuɗam taŋ slagwayay. Sukwi mekelem anta sa duduɓ maslalam ng'ar sukwi mekelem mata, mizli anta sa dubunaka gi vurumo mata.

⁴ Mbur gar a sa cifi asi gudubun naŋ waɗ asi uruf naŋ zuy zuy, ko mbur masa gaŋ ngaˀa anta.» Asi i ya Bumbulvuŋ misi gidaŋ wãˀ maɓa ti mi ɗu.

⁵ Da mizli gar ara sipam di i kuli taŋ na, ndra, ndr'i sipam di i Bumbulvuŋ, Buymisemuŋ ndra ngi caˀa.

Bumbulvuŋ i buy a Zeruzaleme

⁶ Ya Bumbulvuŋ i ɓi na: «Ti hin nah na, mizli maram kiciɗek kiciɗek na, i sa kuso taŋ, mizli mizliɗam hirnga le ati misi ya miga taŋ bonoy le na, i sa cikila hirnga taŋ.

⁷ Mizli maram kiciɗek kiciɗek vuna, i sa ga ɓa mandiram i taŋ, muroko kileŋ kileŋ na, i sa ga ɓa a tiram sukwi migidaŋ. Ya Bumbulvuŋ i sa cifi i buy taŋ a muwã Siyoŋ, zle wurenna hã ngi sete.

⁸ Naka so na, hay madiɗa, mijigin ngi diili Zeruzalem, zumabuy ɗik madiɗa misi zleˀe, a sa mo ng'avi ka a muŋ, zumabuy ngi Zeruzalem a sa mo ng'asi haŋ ɗik a muŋ.»

Ci a kwacay Zeruzalem ati naŋ milih

⁹ Ki hiziga widi kaˀ wurenna vur mike? Buy anta asi hirwuy ɗike ta kwa? Mukuti ɗik a muc le kwa, ɓa hã bonoy a funuw gidaŋ kaɓa ngwas mawuɗ a yi na?

¹⁰ Diyli Siyoŋ, vu majuw na, mbiɗi di puɗwuliˀ puɗwuliˀ, widi haɗa haɗa, kaɓa ngwas mira yi, asi kisa bi wurenna tir walahaya, kisa ra cifi ar guva, hã kisa ru sesẽŋ a Babiloŋ. Ki sa lih a diga. Bumbulvuŋ a sa mbuɗu hirnga ɗik a diga tisi haŋ ngi mesene ɗikeye.

¹¹ Ani wurenna, sukwi ngi mizli haɗa a kusom le ar ka, A ɓam: «Anja ki hiryi, yo Zeruzalem diŋ na, anja i singilakaŋ.»

¹² Gwat Bumbulvuŋ mawuɗ a ga na, taŋ a sinaka ta, a sinaka wuluk naŋ ta: asi naŋ a kuso taŋ le kaɓa daw a məlaŋ.

¹³ Diyli Siyoŋ, slikiɗ, ɗugo dawa, i sa tiri ti kakaɓa gwat misãmi misi durum ngi ɓiri, yo misi sar ngi ɓiri gaza. Ki sa mburusl mizli zigiduw taˀ taˀ haɗa, gwat ngi lum taŋ ngir vurumo, kisa ngizla taŋ ngi vul da Bumbulvuŋ, yo zlili taŋhaya, ngi vul da buy ngi ruwuy kurzluˀ gar.

¹⁴ Amma wurenna so na, diili migi vurum, cira vu ɗike car car, asi a ndaham ndra le, hirnga ndra gun. A ra kiɗaka migi kiita ngi Israyele ti ganday a ciki kwala.