MIKUCUWULOY 8 - Bible en langue guiziga

Sinmijileŋ mazil vu ma

¹ Mazil vu na, i sinmijileŋ takwa? Yo matil mi na, i lesl takwa?

² A hirnga li miɗagar ɗagar a ciki jiviɗ madiɗahay, ar mazlaka jiviɗeye, naŋ da deŋ,

³ a ciki mizlingre ngi ci ng'ar walahay, ar li macohom ti raˀahaya, ara widi, a ɓi:

⁴ «Ya mazil na, i kum mizli gambarahay, haya mizli, ya matil mi na da kumo.

⁵ Kum manja lesley, dubunam ji lesl, gilaway, dubunam wuluk mezle.

⁶ Cinam, ɓi ya mawuɗ i ɓa na, i ɓi hirnga wãˀ, yo mingiɓi ngi balam ɗu na, i jiviɗ mikaslsla vuna si.

⁷ Haˀaw, balam ɗu a ɓi di i ɓi mikaslsla, asi irne ɗu a titila ɓi ngi moˀore ndum ta wãˀ.

⁸ Mingiɓi mabo ti balam ɗu gar na, naŋ jeŋŋe, ɓi mugun kini malla muŋsloh kini gar na, anta ar mingiɓi ɗu ta.

⁹ Ko wa gar misla wala ngi ɓi le na, mingiɓi ɗuwoyo gar ava, taŋ kaslsla, yo mbur muluma sine le na, mingiɓi ɗuwoyo, taŋ tuwaˀ ava ta.

¹⁰ Tuɓaka ɓi ya madubunukum di na, mbak ɓiri bara le, tiɓaka sine, mbak ɓiri tapasl tapasl mipal naŋ na le.»

¹¹ Asi sinmijileŋ naŋ mezle fineˀ virzle hiri paatu, yo ko gwat mekelem mupuɗaw fineˀ naŋ anta.

Sinmijileŋ mabugo vu

¹² Ya sinmijileŋ na, ji lesl, i hay ɗu, i luuma sin ngi gi gwat mijam haŋ kuy kuyo le.

¹³ Zluwun ti Bumbulvuŋ na, i hirsa gi malambaˀa. Huhumo vu, njuro vu, jiviɗ ngi gi malambaˀ ati ɓi ɓi muslurkoɗ gar na, yi pura taŋ hiris le.

¹⁴ Ngilawuy ati gi gwat mezle gu gar na, taŋ avu ya, yo lesl ati gidaŋ gar na, taŋ avu ya.

¹⁵ Buy madiɗahay mazumam buy na, tisi ya, yo mizli madiɗahay macicaka ɓi jeŋŋe na, tisi ya.

¹⁶ Yarmahay mawam li na, tisi ya, yo mizli madiɗa ngi buyoyo, i migi kiita mijeŋŋehey na, tisi ya.

¹⁷ Yi wuɗ di i mizli mawuɗikiy, yo mizli masipikiy hirdam hirdam na, a sa lumikiy.

¹⁸ Zlili ati dudoko, taŋ avu ya, yo gwat ngi lum mazik ati masik gar na, kanah ma.

¹⁹ Gwat ya mavula na, i mezle fineˀ ɓiri tapasl tapasl mipal naŋ kine, yo lum ya mavula na, a funa ɓiri bara mimezle le.

²⁰ Yi zuɓ di i jiviɗ maru ng'ar ɓi mijeŋŋe, ya ar jiviɗ maru ng'ar ɓi mikaslsla.

²¹ Adiga, i vula zlili le da mizli mawuɗikiy, i naha hay taŋhaya le mbaf mbaf ti zlili.

²² Bumbulvuŋ a go ya le, yi micikiɗeffe ngi slra naŋ magaŋ, yi mudumbuŋ ngi slra naŋhay misi zle ngadana tahay na.

²³ Yi mukicuwa zle misi ngadana ta, zle ti zli virzi ngi gwatay, zle ti duniya muɗuv virzi.

²⁴ A goko ya na, naɓa yam ngi ruwuyoy anta aruŋ, naɓa yam miviɗiviɗi mijileŋ jileŋhey anta aruŋ.

²⁵ Dumbuŋ angi muwãhay misa gam, yo dumbuŋ angi li miɗingir ɗingirey na, a goko ya le.

²⁶ Naɓa Bumbulvuŋ a ga hirwuy ati muŋ t'aruŋ, ko zli virzli ngi murɓuk tekeɗe ar duniya anta.

²⁷ Ti di naŋ muɗuva muŋ na, naɓa y'ada, ti naŋ micira si diˀis a hirnga mubuliy,

²⁸ ti naŋ micikila hirnga ngi gazlavay a muŋ, yo ti yam miviɗiviɗihey magam himaˀ jirif jirif,

²⁹ ti naŋ ɓi micica maakway da mubuliy, anja ɓa yam a tuwuɗa ta, waɗ ti naŋ muɗuva si virzi ngi hirwuyo na,

³⁰ naɓa yi buy ngi slra a cikeˀe, vur hin gar na, i ra gaŋ mumul, i ra gi dungur a mihiri naŋ pas gar,

³¹ i ra gi dungur angi hirwuy naŋ miga na, ya ti cine ndum haɗa a wuzla mizli.

Mbur macina mingiɓi ngi sinmijileŋ na, naŋ ti mumul

³² Ziri ɗuwoy, wurenna, cinaka mingiɓi ɗu, mizli majaka ɓi ɗu a hirnga na, taŋ ti mumul!

³³ Cinaka dubun ɗu na, ɓa ki tiram misi sinmijileŋhey, anja ki gam di ka sefel ta.

³⁴ Mbur macina mingiɓi ɗu, vur hin gar, naŋ da deŋ a mizlingre ɗu, ara jigina li ci ngi hay ɗu na, naŋ ar mumul!

³⁵ Asi mbur mulumiy le na, a lum siifa le, yo a lum gi mezle ngi Bumbulvuŋ le.

³⁶ Amma mbur magiy gwat ngi ji mevel na, a hiryi di i vu naŋ tehhe a muŋ, mizli mahirsikiy gar na, a wuɗam di i mucu.