MIKUCUWULOY 6 - Bible en langue guiziga

Duvus mbur mihil le avu mbur na, ki ci ar ɓi nah ta

¹ Mangal ɗu, da ki zuɓa ɓi ngi duvus ngi mbur cil ɗike le, yo ki zliram haŋ le kap ati mbur muvulaŋ di,

² da ki juwa hirnga ɗike le ti mingiɓi ngi balam ɗike, yo mingiɓi ngi balam ɗike, a cu le ar kwar na,

³ ga gwat nah mangal ɗu, ka wurenna asi haŋ ngi mbur muvula duvuso, anja ki cuko hirnga ɗike, ara lumaŋ, hurdum hirdam, ga slimiɗ da mbur cil ɗike.

⁴ Ki pula vu ɗike mbak da hinje ta, anja hinje a so zirip zirip a hiri ɗike ta, sey da ka miwurka le.

⁵ Cuko hirnga ɗik tir kwara, kaɓa mangazaw malla ɗiyuw malih avu ngamngam na ya.

Anja ki gi masafaya ta

⁶ Masafaya malambaˀvu, pura milkitiŋ kwaɗay! singila gwat ngi gi taŋ ayɗi, ki lum sinmijileŋ anga.

⁷ Milkitiŋ, ko mijigin naŋ anta, ko mbur makaŋ mbuŋ malla buy naŋ anta.

⁸ Ti hin pas na, a wi vu ti gwat ngi zum naŋ, yo ti sifi kwana, a cikila gwat ngi zumo.

⁹ Masafaya malamaˀvu, k'ada tuppo hã ti vunaka? Ki sa puɗuk tir hinje, hã ti vunaka?

¹⁰ Ki wuɗ ki hinje neˀ, ki musuk vu neˀ, ki muruɗo duba neˀ, yo k'ada haŋ gijaw so,

¹¹ na so na, angi pas nah gar na, murga a sa ndilo ka gurjik, kaɓa mbur maliˀi jew jew lambaˀ, viya a sa ndilo ka kaɓa mbur mufuyo vu.

Kpak ngi mbur maɓi ɓi dar ta

¹² Mbur mandir ti ɓi mijeŋ ta ngek avu mi na, i kesef lambaˀ, i mbur migi malambaˀa.

¹³ A kuɓuc hiri ngi ga gilaw da mizli, a vuruk vu ti sar, yo ti haŋ.

¹⁴ Gi malambaˀa, i kpak nga naŋ. A gi gidiɓi ngi gi malambaˀ ar pas gar, a slikiɗ tiri.

¹⁵ Vurˀe, a sa zizi gurjik lambaˀ si, a sa kiɗaka a haŋhaŋ kutum si, slalak naŋ anta.

Gwat Bumbulvuŋ mahirsa

¹⁶ Gwatay ada merkeɗe, Bumbulvuŋ mahirisa taŋ, na zle taŋ tarnaˀ ti naŋ mapura kuyta wãˀa:

¹⁷ Pura vu ɗik fineˀ mizli, irneˀ magi slir, pi pumbus ngi mbur migi gwat ta,

¹⁸ wuluk malambaˀ mimbizeˀ a mevel, sar mazuɓ kutum kutum nga gi malambaˀa,

¹⁹ sedewo mijeŋ ta ti slir yoɓ yoɓ, waɗ mbur mazlir sukumuŋhoy ngi tiri.

Ji lesl avu gi madama

²⁰ Mangal ɗu, ɓi ngi bunuk maɓuw di ɗaˀ le na, ja a hirnga, yo ɓi ngi munuk madubunuw di na, ki pura ka sefel ta.

²¹ Dira taŋ dar dar a mevel ɗike ndrehhe, luwa taŋ law law gun asi ˀay ɗike, kaɓa gwat ngi wuya.

²² A sa bugukuw jiviɗ ar ka maru ati ka masawa gar, a sa jiginukuw ar li hin ɗike, yo ka mupuɗuk le na, a sa vulukuw kuti.

²³ Asi ɓi maɓukuw di ɗaˀ le na, naŋ ka lampe, yo ɓi madubunukuw di na, i li minjahha, mbur madubunuw gwat ti lesl mijileŋ na, a buguw di i jiviɗ ng'ar siifa.

²⁴ A buguw di i ji lesl avu ngwas migi malambaˀa, yo avu irne mideɗek ngi ngwas burvula.

²⁵ Ki hĩyã ngwas misi kanah asi kuy naŋ na ta, pura hiri naŋ maɗiɗi vu na, ki pulaŋ vu ta.

²⁶ Asi ngwas sulome na, a sipi di i gwat ngi zum neˀkini, amma madama, a zuzuw siifa ɗik mupuɗawa wãˀa.

²⁷ Mbur maki vu ar jiiba, manja vu a tiɓi avu zana na, ada kwa?

²⁸ Malla mbur maru ar zayvu, manja vu a wuraŋ sara na, ada kwa?

²⁹ Ko wa gar maru ng'avu ngwas ngi cil naŋ na, naŋ kanah ya, ko wa gar muwusaŋ le na, naŋ anta bi njiraŋ ta.

³⁰ Mbur muhul gwat le ngi kiɗa may kwacay naŋ na, anta hirsakaŋ ta.

³¹ Amma da ɓi naŋ misa njik le na, a sa wuruk makaw tarnaˀ nga meˀe, hã a ziza zlili ngi hay naŋ cek ma kini.

³² Mbur magam madama ati ngwas na, hirnga anta ava ta, a gi kanah ngi ziza siifa naŋ.

³³ A sa wurkakaŋ ti kiɗ, yo a sa mi a ruwuy, pi mesem naŋ na, anta sa susuyum ta wãˀ.

³⁴ Asi suloŋ a sa slikiɗa himaˀ da zile fõh fõh, yo tapas pula cuwal na, anta sa puraŋ ircece ta.

³⁵ N'anta sa ngum ɓa a wurkaŋ vurˀe ta wãˀ, ko da a vulakaŋ gwat ngatarahay haɗaka wanaka gar na, naŋ anta sa tiɓa ta.