MIKUCUWULOY 4 - Bible en langue guiziga

Luma sinmijileŋ, yo wi vu ti sinmijileŋ

¹ Ziri, cine kum maɓukum ɗaˀ ɗaˀ na, cinaka, jikam slimiɗ ɓa ki sinaka ɓi ngi lesle.

² Haˀaw, yi dubunukum di i gwat migisiŋ gisiŋ, gwat ya mudubunukum di na, ki pulaka ta.

³ Ya vuna kwana, ya teŋteŋ avu baha zleˀe ya, yo maha a wuɗiy kaɓa mawuɗam zuŋ kirmalay.

⁴ Baha a dubuniy gwata, a ɓiy na: «Ja mingiɓi ɗu kuy kuy a mevel ɗike, gwat ya mawuɗ na, ja taŋ a hirnga, naɓa madiya ˀaw a zuma zay ɗike.

⁵ Anja ki lum sinmijileŋ, anja ki lum lesle. Ki puyuk hirnga ti mingiɓi ɗu ta, yo ki mbiɗi duba ava ta.

⁶ Anja ki pula sinmijileŋ fuk ta, asi masa jiginuw i naŋ, wuɗ sinmijileŋ, a sa ki slimiɗ ar ka.

⁷ Ɓa ki ndir, ki mbur misi ti sinmijileŋ na, sey ki zla ti luuma sinmijileŋ, yo gwat ngi lum ɗik gar na, vula ɓa ki lum lesle.

⁸ Ja sinmijileŋ gumbuˀ, naɓa a sa gi ti ka mbur madiɗa, da ki jaŋ le kuɓuy na, a sa ɗuvuw hirnga.

⁹ A sa tiri i gwat ngi wuya mezle avu ka, kaɓa loppol mimezle tuwaɗ tuwaɗ a hirnga.

Ki sipa sar ngi misi moˀoreheye ta, sinmijileŋ i nah.»

¹⁰ Mangal ɗu, cin, tiɓa mingiɓi ɗu na, naɓa hin ngi siifa ɗik a sa gi subur.

¹¹ Yi ra buguw jiviɗ ngi gi slra ti sinmijileŋ, yi ra dubunuw sipa jiviɗ mikaslsla.

¹² Kanah na, kisa ru nga mbuŋ gu, ko gwat masa guw ngaˀ anta, yo kisa kil kpaŋ kpaŋ, ko gwat mabuw sar anta.

¹³ Gwat ya mudubunuw di na, cici zlak araŋ, ki pula ta, wi di vi, asi i siifa ɗiki.

¹⁴ Ki ci sar kulaˀ le ar jiviɗ ngi misi moˀoreheye ta, ki sipa sar ngi migi gwat malambaˀahaya ta.

¹⁵ Pula jiviɗ taŋ mbak ti mi teˀ teˀe, ki cuh ti raˀa ta, mbiɗi duba, cuh tir li mekelem.

¹⁶ Mizli tayna, da a gam malambaˀ geˀ le ta na, t'anta hinjam ta, da a zlumburam mbur a ruwuy ta na, a hinjam ta.

¹⁷ Asi a zumam i gwat taŋ malumaka ti jiviɗ malambaˀa, yo gi moˀore a wa taŋ ka mbaazla.

¹⁸ Amma jiviɗ ngi mizli mijeŋŋeheye, naŋ njahha ka li mawun, a gi njahha ti vendeke, hã wuzla papasa.

¹⁹ Na jiviɗ ngi misi moˀoreheye, i luvuŋ timbiɗim, t'anta sinaka gwat masa ba taŋ sara ta.

Cici kaŋ kaŋ ar gwat ngi gi ɗike

²⁰ Mangal ɗu, ji lesl asi mingiɓi ɗu, jika slimiɗe jak asi mi ngi kuti ɗuwoyo.

²¹ Anja ki puyuk hirnga ti mingiɓi ɗu ta, wi taŋ vu weˀ a hur mevel ɗike.

²² Mizli gar mira tiɓaka taŋ a mevel taŋ na, i siifa ati jam ngi vu avu taŋ.

²³ Dumbuŋ naŋ na, jigina mevel ɗik avu gwat ka mawulka gar, asi siifa ɗik a bo ti vaˀaŋ.

²⁴ Ɓi muslurkoɗ slurkoɗ gar na, ki pula a bo ti irne ɗike ta, yo pula ɓi ngi mbaɗa kileŋ avu ka.

²⁵ Anja ki pur hiri taˀ ng'ar mizli ngi mbuŋ ɗike, yo anja hiri ɗik a ndir taˀ cir cir a mbuŋ ɗike.

²⁶ Wuluk kuy kuy ar jiviɗ ka mawuɗo zuɓa, yo anja i jiviɗ migisiŋ.

²⁷ Anja ki ngizli avu jiviɗ ɗike, ti hazum ta, ti gula ta, kirih kileŋ avu gi malambaˀa.