MIKUCUWULOY 30 - Bible en langue guiziga

Mingiɓi ngi Agur

¹ Misenna i mingiɓi ngi Agur, mangal ngi Yake. Mingiɓi madiɗa ngi mbur hana, da Itiyel, da Itiyel ati Ukal, mbur hana a ɓi:

² «Haˀaw, yi mbur gilaw muwãˀ ngi si mizli, kpak naŋ na, lesl ɗu naŋ anta ka ngi mizli ta.

³ Yi dubun sinmijileŋ ta, amma sin mipal ngi gi gwat na, i dubuna le ɓula.

⁴ Mijiɗ ɗaˀ nga muŋ, a po sar a muŋ na i waka? Mija himiɗe kaw asi haŋ naŋ ɗaˀ i waka? Mimbiza yama mbizeˀ ar godo naŋ ɗaˀ i waka? Micica maakway ngi ruwuy gar i waka? Slimiɗ naŋ mbrike? Mangal naŋ a sa zilaka mbrike? Ko mbri na, ki si na le sotuwaɗi?

⁵ Mingiɓi ngi Buymisemuŋ gar na, a ndila le ngi pulaŋ mevel, Buymisemuŋ i mbaray ngi mizli maɗumom di.

⁶ Ko ki co ɓi mekelem neˀ ng'ara ta: naɓa a sa mbuɗuw hirnga, hã ka vuna, kisa sina, ki migi slir.

⁷ I cufuɗ gwatay le cuw avu ka Buymisemuŋ, ɓa i sa muc tikeˀe na, ki vuliy taŋ le:

⁸ Ɓi mijeŋ ta ati slir na, kiraha killeŋ avu ya, ki giy ɓa yi tiri misi viya malla misi zlili ta, vuliy gwat ngi zum ɓa i ngir di tew si,

⁹ asi da i gi zlili le haɗa ma na, i sa ji mi, i sa ɓi: «Bumbulvuŋ vuna i waka? I si na ta», malla da i gi viya le ma na, i sa hul, naɓa i sa hirya slimiɗ ɗik, ka Buymisemuŋ ɗu na ma.

¹⁰ Gawla ngi mburo, ki gilaŋ ɓi daˀ a mbuŋ buy naŋ ta, vur naŋ masa nisuw, dar ka, kisa jijira bonoy nah.

¹¹ Mizli ada manisaka cine taŋhaya, yo t'anta ɗuwulaka mi da mumuŋ taŋhaya ta ma!

¹² Mizli ada mapuraka vu taŋ, ka gwat malambaˀ anta avu taŋ ta, dambalaka a bunaka dili taŋ avra ta ngbaŋ.

¹³ Mizli ada mawaka vu taŋ ka taŋ dum mizli mekelemeye, a puraka mizli buruɗ le.

¹⁴ Mizli ada, sliŋ taŋ ka maslalam, yo sliŋ ngi kiri taŋ, ka sliwiɗi, a zumaka gwat ngi mizli mizlew ngi si ruwuyo, yo waɗ ngi misi murga muwãˀ ngi wuzla mizli.

Mikicuwul muslufahay

¹⁵ Dirnaˀaya, naŋ ti ziri mongosohoy cuw, slimiɗ taŋhaya: «Vuliy, vuliy.» mumufaɗay anta ɓam tewle ta.

¹⁶ Li cifi ngi mizli mumucahay, ngwas dirlay, hirwuy mimbi ti yam ta, waɗ vu, ɓa a ɓi: «Muk» muduba na, anta ɓi ta ndiɗaˀa si.

¹⁷ Mbur masingir ar cine, yo mangum cine mi da mumuŋ ta na, magagak ngir zlazlaray a sa nduzokoŋ hiri, joˀ kromoy a sa zumakaŋ.

¹⁸ Gwatay ani makir, a finikiy hirnga le, yo mumufaɗ taŋ, i sla wala naŋ ta:

¹⁹ Jiviɗ ngi krom a muŋ, jiviɗ ngi kaw ar mandazlay muwã, jiviɗ ngi palalam ar mubuliy madiɗa, waɗ jiviɗ ngi mbur zil ng'avu ngwas zuŋ zuŋ aruŋ.

²⁰ Ngwas migi madama na, gwat ngi gi naŋ ani: a zuma gwata, waɗ a puya mi tukwaɗ tukwaɗ, a ɓi: «I gi gwat malambaˀ neˀ ta.»

²¹ Majijikaka hirwuy i gwatay ani makir, yo gwatay mufaɗ na, hirwuy anta ɓusa ɓi taŋ gu ta:

²² Mbur beke matiri buy, gilaw mazum haɗa,

²³ Ngwas mihimaˀ mazuɓ zil, waɗ ngwas migi slra mazuma hay ngi buy naŋ ngwasa.

²⁴ Gwatay misi titiri memeɗehey wãˀ, ada mufaɗ asi ruwuyo, dambalaka i gwat misi sinmijileŋ ngi wuzla gwat misi sinmijileŋhey.

²⁵ Milkitiŋ, i gwat misi gidaŋhay ta, amma a sinaka wi vu ti gwat ngi zum taŋ ti hinpasa le,

²⁶ kucumoy, i njenjeŋ manja gidaŋhay, amma a sinaka li cifi taŋ le ar butumo,

²⁷ jaraya, naŋ anta ti buy ɓaˀ a mbuŋ ta, amma a sinaka bi arleˀe le, hindiˀille,

²⁸ mitiɓirslime, i gwat ngi ji kaw ti haŋ ngbaŋ, amma, a ci sesẽŋ ar mugum ngi buy!

²⁹ Gwatay ada makir, a sinaka kile teˀe, yo gwatay mufaɗa, a sinaka ru teˀe:

³⁰ I mobor, gwat mupuɗaw ngi si gwat misãmi ngi ɓuhoy, naŋ anta mi nga dirba a mbuŋ gwat loŋ ta wãˀ.

³¹ Zungu ngi ɓuh malla bazuwaya, dingiriŋ taŋhay gidaŋ haɗa waɗ buy miki le ɓaˀ a mbuŋ soje naŋhay.

³² Da ki huhumo vu ɗike le zleˀe gilaw gilaw, a dirba nah, ki wuluk le na, tiɗa mi ɗike tiɗeˀe:

³³ asi kiɗa ɗuwa na, a bo ti wursla, kiɗa vu avu hutuŋ, a ngilo mivilngir, slikiɗa mevele, a zli tiri!