MIKUCUWULOY 3 - Bible en langue guiziga

Sinmijileŋ ati cine mi da Buymisemuŋ

¹ Mangal ɗu, gwat ya madubunuw di na, ki puyuk di hirnga ta, ɓi ya maɓuw taŋ ɗaˀ ɗaˀ le na, ja taŋ a mevel ɗike.

² Asi ɓa kisa ndir jam, hutuŋ subur, yo kisa mumul na, mbele ya makutuw na.

³ Gi mezle ndrehhe, yo gi gwat mikaslsla, luwa taŋ law law asi ˀay ɗike, toho taŋ nguɗ nguɗ ar beleler ngir mevel ɗike.

⁴ Dar Buymisemuŋ ati mizli a sa gukuw mezle, a ngilam ti ka wuy, yo a sa purukuw kuy avu hiri.

⁵ Ki pula vu ɗike mbak da lesl ɗik ta, pula vu ɗike mbak ti mevel purla da Buymisemuŋ.

⁶ Ar gwat ngi gi ɗik gar na, sinaŋ, ɓa i naŋ masa buguw jiviɗe.

⁷ Mapura vu ɗike ki mbur misi sinmijileŋ na, i ka tehhe a muŋ ta, zuwen zluwun ti Bumbulvuŋ, mbiɗa duba da ɓi malambaˀa jaka.

⁸ Masa tiri slalak vur dumvu ɗik na, i nah, yo a tisluw hirzlik ngi vu ɗik gar zuyyo ma.

⁹ Ɗuva hirnga da Bumbulvuŋ ti zlili ɗike, yo vulaŋ micikiɗeffe ngi gwat ngi migam ɗikeye.

¹⁰ Dar dirgwaɗ ɗikey a sa naham mbaf mbaf ti daw, yo mbaazla a sa ɓul ka yam.

¹¹ Mangal ɗu, Bumbulvuŋ makutuw na, ki pula ta, yo ki ji mevel ar naŋ mambuɗuw hirnga na ta.

¹² Asi Bumbulvuŋ a kuti di i mbur naŋ mawuɗo, kaɓa cine makuta mangal ngisi mevele.

Sinmijileŋ ati cifi ar wuya

¹³ Mbur mulum sinmijileŋ le, yo misla wala ngi ɓi le na, i mumul avaˀaŋ,

¹⁴ Ka muluma le na, a funa ɓiri bara le, yo li lum naŋ, a funa ɓiri tapasl tapasl le ma.

¹⁵ Sinmijileŋ, naŋ puɗaw haɗa fineˀɗugur hirnga, gwat mbur mahĩyã gar na, ko ngi wi ati naŋ anta.

¹⁶ A jina mburo ɓa a ndir hutuŋ subur, yo a gaŋ zlili, a gaŋ ɗongor.

¹⁷ Aru ti mburo ar jiviɗ mezle, joˀ mbur aru a jiviɗe manja zluwun.

¹⁸ Sinmijileŋ i widis ngi siifa avu mizli miji naŋhay kaw a hirnga, yo mizli misi ti naŋ na, taŋ ar mumul.

¹⁹ Muɗuva virzi ngi hirwuyo, i Bumbulvuŋ ti sin naŋ mijileŋ, yo a cica muŋ ɓa a ndir gidaŋ gidaŋ ti lesl naŋ.

²⁰ Yam mijileŋ jileŋhey muwunam, yo gazlavay mago vuŋ na, ti sin naŋ ngi gi gwat vuna.

Bumbulvuŋ majigina mbur misi sinmijileŋ

²¹ Mangal ɗu, anja wer ati sli wala ngi ɓi a bugukuw jiviɗe: ja taŋ a hirnga ko ti vunaka gar.

²² Masa guw ɓa ki ndir ti siifa migisiŋ, mimezle na, i taŋ.

²³ Dar kisa zuɓa jiviɗ ɗike setette, ko sar anta sa buw ta.

²⁴ Ti hiikuɗo, ka misa hin le na, k'anta sa zluwun ta, yo ti duvuɗo, ka mihin le tup na, ki hinje buɗusl.

²⁵ Zluwun mugurjik anta sa ndiluw ta, ko misi moˀorehey anta sa zlukuw ngi kiɗa vu ta.

²⁶ Asi masa jiginuw, ki zluwun ta na, i Bumbulvuŋ vuna, yo a sa wi vu ti ka avu mazaɓ misi a mbuŋ ɗik gar.

Wuɗa mbur cil ɗiki

²⁷ Mbur muro ti may ngi gwat avu ka, zliv ki vulaŋ gu na, ki zlikaŋ ta.

²⁸ Mbur cil ɗike, da zliv gwat ada, ki vulaŋ gu na, ki ɓaŋ: «Aru kwaɗay! kisa mo tiprik, ɓa i sa vuluw» na, ki ɓaŋ kanah ta.

²⁹ Ngama ɗike, da naŋ muro joˀ setette a ciki ɗike na, anja ki wuluk ngi gaŋ malambaˀ ta.

³⁰ Mbur muguw gwat ta si na, ki tiraŋ gbiŋ lambaˀ kine ta.

³¹ Ki gi suloŋ ti mbur misi moˀore ta, ko ki sipa jiviɗ naŋ neˀ le ta.

³² Asi Bumbulvuŋ, ɓi muslurkoɗ gar na, a gaŋ kuy ta wãˀ, amma naŋ i yeme ngi mizli mikaslslahay.

³³ Bumbulvuŋ a nisa hay ngi mizli misi moˀoreheye, amma a ɗuwula mi da hay ngi mizli mijeŋŋeheye.

³⁴ Mizli masingiram anga na, a singir ar taŋ, amma a ga mezle da mizli mihina hirngahaya.

³⁵ Buymisemuŋ a ga ɗongor da mizli misi sinmijileŋheye, amma gilawaya, a sa pam mesem.