MIKUCUWULOY 29 - Bible en langue guiziga

¹ Mbur mimbiɗakaŋ hirnga le, amma naŋ anta cin ta na, a sa hiryi gurjik, ko slalak naŋ anta.

² Da mawaka li i mizli mijeŋŋehey na, naɓa mizli taŋ ti mumul, amma da mawa li i mbur misi moˀore na, naɓa mizli a niˀicam.

³ Mbur mawuɗ sinmijileŋ na, cine a mumul, amma mbur mandir ɓaˀ a hay ngwas sulomehey na, a zliɗa zlili naŋ lambaˀa.

⁴ Buy maga kiita kaslsla na, hirwuy naŋ a cici gidaŋ gidaŋ, amma mbur misi may gwat, maga vu ngi buutu na, a hirya hirwuyo.

⁵ Mbur matikina cil naŋ ti ɓi mideɗek na, a ngi di i ngamngam a jiviɗi.

⁶ Mbur misi moˀore a ci ar kwar ngi mungra naŋ tehhe a muŋ, amma mbur mijeŋŋe a zluzluɓ, a mumul.

⁷ Mbur mijeŋŋe a si na cika vu asi mizli hĩhĩyahaya le, amma mbur misi moˀore, naŋ anta ti lesl ngi sin naŋ ta.

⁸ Mizli midirɗa vuhoyo, a paka mi da walahaya, ɓa a slikiɗ ɓi, amma misi sinmijileŋheye, a mucaka himaˀ ngi walahaya.

⁹ Da mbur misi sinmijileŋ, ara gam kiita ati mbur gilaw na, ko da a ji mevel le malla ara singir tekeɗe kwana, naŋ anta sa lum musuka vu ta na si.

¹⁰ Mizli mikiɗa hirngahaya, a hirsaka mbur miɗalla, amma mizli mikaslslahaya, a sipakaŋ.

¹¹ Mbur gilawa, gwat magaŋ kuy ta ar wuluk naŋ gar na, a njika ɓuy ar li babaraŋ, amma mbur misi sinmijileŋ, a tika vu naŋ, a muca ɓi nah.

¹² Buyo, da ara ji lesl asi ɓi ngi slir wanaka gar na, naɓa gawla naŋhay gar, a sa tiram misi moˀorehey.

¹³ Mbur misi viya ati mbur mazuma gwatngi mizli na, taŋ misi purla, amma mawuna taŋ hiri kweŋ da taŋ cuw taŋ, i Bumbulvuŋ.

¹⁴ Buy maga kiita da mizli hĩhĩyahay ti jiviɗ naŋ na, naɓa janga naŋ ngi buyo, naŋ da ndrehhe.

¹⁵ Ganday ati mbiɗi hirnga na, a vul sinmijileŋ da mburo, amma mangal mupulaka le mbak, a gi ka naŋ mawuɗ na, a pa mesem da mumuŋ.

¹⁶ Da mawaka li i misi moˀorehey na, naɓa mungra a yi vu ti vendeke, amma masa gaka sedewo ngi taŋ mindilama, i mizli mijeŋŋehey.

¹⁷ Kuta mangal ɗike, ɓa mevel ɗik a sa hin, naɓa a sa mbuw ti gwat mundumoy.

¹⁸ Da pura gwat ti kleŋ anta mata na, naɓa mizli taŋ sek manja lejeŋ, amma mbur maja ɓimujuwa a hirnga na, a mumul.

¹⁹ Anta kutaka gawla ngi haya ti mingiɓi ɗaˀ ɗaˀ ta, asi da ko a sa cine le kwana, naŋ anta sa cin mi ta.

²⁰ Da ki pur mbur le maɓi ɓi barlaw barlaw na, zuwen ka manjih hiri asi mbur gilaw, a funa ka manjih hiri aseˀe na le.

²¹ Mbur mahirya gawla naŋ zle ti zuŋ na, ar kiɗa mi naŋ, a sa tiri di masafaya.

²² Mbur miji mevel kutumo, a slikiɗ tiri, mbur mislikiɗ himaˀ le na, a ya mungra cak cak.

²³ Huhumo vu a hin ˀay da mbur, amma wuluk ngi hina hirnga na, a cika hirnga da mburo.

²⁴ Mbur majumom ati muhul na, a hiris di i dumvu naŋ tehhe, mbur muhul i minisa le, naŋ da cine ngbaŋ, amma anta njika muhulo ta.

²⁵ Zluwuno, i mazaɓ avu mburo, amma mbur mupula vu naŋ le mbak da Bumbulvuŋ na, ko gwat magaŋ anta.

²⁶ Mizli haɗa a sipam, ɓa buy a pura taŋ ti hiri mezleŋ, amma maga kiita da mbur gar na i Bumbulvuŋ.

²⁷ Mbur magi gwat ɗalla ta na, mizli mijeŋŋehey a puraka kuy avu hiri ta wãˀ, mbur masipi jiviɗ micirre na kwana, misi moˀorehey a purakaŋ kuy avu hiri ta wãˀ aya.