MIKUCUWULOY 25 - Bible en langue guiziga

¹ Salomoŋ, mikicuwul naŋ mekelemey ani ma, mutohoko i mizli ngi buy Zuda mazilaka Ezekiyas.

Mikicuwul wal wal

² Dudok ngi Bumbulvuŋ na, i naŋ magi gwat mufuna wuluk ngi mbur, yo dudok ngi buyo kwana, i naŋ maɗumburo gwata ɗumbur ɗumbur le, ɓa a sa gaŋ.

³ Muŋ, gil naŋ ara kiɗ mi sesẽŋ amaka, yo hirwuyo, jileŋ naŋ ara kiɗ mi sesẽŋ amaka na, i si na ka ta Naŋ kanah ya, mbur masina wuluk ngi buyo gu anta.

⁴ Bi ti malambaˀ ngi ɓiri bara avra, joˀ mbur muluwusla ɓiri, a bo di mejejeŋ njiraŋ.

⁵ Kiraha misi moˀore kileŋ a mbuŋ buyo, naɓa buyo, zumabuy naŋ a sa ndir gidaŋ gidaŋ ti gi jeŋŋe.

⁶ Ki huhum vu a mbuŋ buyo ta, yo ki cici ar li ngi mizli madiɗahaya ta.

⁷ Zuwen maɓukuw ti ɓi: «Jiɗawa ng'aka», a funa mamukuw nga ruwuy a mbuŋ buyo le.

⁸ Gwata, ko da hiri ɗik a pura le tekeɗe kwana, ki wus di vu kutum ng'ar kiita ta. Da mbur mazlir ti ka ta, a biga le njah, i slir na, kisa gi mbrike?

⁹ Bubuɗoko ɓi ɗike ati mbur mazlir tika ta na, amma ɓi miyaŋ ngi mbur mekelem muslufuw di le na, ki njika ta,

¹⁰ vur naŋ misa cine le na, a sa zuw, yo naɓa k'anta sa mbiɗa ɓi malambaˀ ka miɓa tuwa gu mata.

¹¹ Ɓi mizlir le kasl na, naŋ kaɓa weɗe ngi ɓiri bara avu taasa ngi ɓiri tapasl tapasl.

¹² Mbur misi sinmijileŋ mambiɗa hirnga da mburo, da a cine le na, naŋ kaɓa dangwa ngi ɓiri tapasl tapasl, yo kaɓa virzle ngi ɓiri tapasl tapasl mileɗeɗe.

¹³ Mislin miteŋteŋ, naŋ avu mbur mislin naŋ, kaɓa yam matisla li yaɓyaɓ ti sifi, a vula gidaŋ da buy naŋ.

¹⁴ Mbur maɓi ɗaˀ ɗaˀ le, a sa vul gwat da mbur, a vula vuna ta ma na, naŋ kaɓa gazlavay ti himiɗ biw biw magi vuŋ ta.

¹⁵ Ɓusa ɓi haɗa na, a tisla mevel da mbur migi kiita, mbur maɓi ti sekke vu na, a ci sesẽŋ avu tesle.

¹⁶ Da ki lum mam le na, zum weˀe, da ki zum le fineˀ gidaŋ na, kisa vunoho di avra.

¹⁷ Aru a hay ngama ɗike, bulaw bulawa si, asi da ki mbaŋ le na, a sa hirsuw.

¹⁸ Mbur magi sedewo ti slir a hirnga cil naŋ na, naŋ kaɓa tokom ati maslalam waɗ luvut mipiyeŋ piyeŋ.

¹⁹ Pula mevel da mbur sulome angi hin ngi bonoy na, naŋ kaɓa humbuɗa gwat ti sliŋ mawus malla cici ti sar jegwer.

²⁰ Turo godo avra ti hin ngi himiɗ, pi mbaazla mikwerek ar waˀa, waɗ zli dimis a mbuŋ mbur muro ti bonoy na, i gwat mupurla.

²¹ Da may ara ja mesene ɗike na, vulaŋ gwat ngi zumo, da yam ara gaŋ na, vulaŋ gwat ngi si.

²² Ka maga kanah na, kite ki cikilaŋ di i zayvu hilɓiɓ a hirnga, amma Bumbulvuŋ a sa wurkuw di.

²³ Himiɗ vay muŋ a so ti vuŋ, juwa mi kaˀ kaˀa, a yi slir.

²⁴ Zuwen cifi pal ɗik ar li mukulkuc a viŋ, a funa cifi ar hay purla ati ngwas misi may sliŋ na le.

²⁵ Ɓi mezle mandilo ti ruwuy mikileŋ na, naŋ kaɓa yam miyaɓyaɓ matisla mumburlok mungbuˀ le.

²⁶ Mbur mijeŋŋe masipa tikin ngi mbur misi moˀore na, naŋ kaɓa yam miviɗiviɗi muduɓo le, kaɓa yam mihirya le.

²⁷ Zuma mam fineˀ gidaŋ na, naŋ kuy ta, amma dubuna gwat mupuɗaw na, naŋ kuy ɓula.

²⁸ Walahay muwaha le, manja mohol gun hirnga naŋ na, naŋ kaɓa mbur majigina vu naŋ gu ta.