MIKUCUWULOY 23 - Bible en langue guiziga

¹ Da ki ra zumam ɗaf ati mbur madiɗa na, ji lesl kuy kuy angi naŋ misi a mbuŋ ɗike.

² Da ki ca ɗafa aseˀe aseˀe na, ja lejeŋ ngi mumburlok ɗike.

³ Ki hĩyã ɗaf naŋ mezlehey na ta, asinta, i ɗaf masa pulukuw mesem mesem kwani.

⁴ Ki gir vu ɗik ngi luuma zlili ta, pula ɓi ngi wuluk angi zlili.

⁵ Hiri ɗik a ɗuv anga kuy kuy t'aruŋ si na, a susuyum le. Asi zlili a si na ɗiya kirpasl avu vu naŋ le. A slikiɗ nga muŋ kaɓa krom.

⁶ Mbur mapur vu ti hiri mezle ta na, ki zuma ɗaf naŋ ta, yo anja ki hĩyã ɗaf naŋ mimezlehey na ta.

⁷ Asi mike na, naŋ kaɓa mbur mujuwa ɓi le a mevele si. A ɓuw: «Zum, yo si gwat», dambalaka a mevel nah, kanah ta ngbaŋ.

⁸ Ɗaf balam pal ka minda na, kisa vunoho di avra, kite ka mabigaŋ wuɗa vu ɗik gar na, ki zizi ti zizi ngataraŋ.

⁹ Ki ɓa ɓi ɗike da mbur gilawa ta, a sa pura mingiɓi ɗik mupuɗaw na hiris le.

¹⁰ Maakway ming'aka diga zlezle na, ki kiraha ta, yo ki sla guva ngi mutuhuhoyo ta,

¹¹ asi mbur mijiniˀis asi taŋ na, naŋ gidaŋ, masa pula cuwal taŋ ar ka i naŋ.

¹² Pula mevel ɗike da dubuna gwat, yo jika slimiɗ ɗike ngi cine mingiɓi ngi si na gwata.

¹³ Ziri ziri aruŋ na, ki pula kuti taŋ ti kiɗe ta, da ki ra sliɗa taŋ ti laway na, anta kiɗa taŋ vagay ta.

¹⁴ Da ki ra sliɗa taŋ ti lawaya jak na, kite ki ra laha taŋ ti lih ti vu muco.

Cine makuta mangal naŋ

¹⁵ Mangal ɗu, da mevel ɗike naŋ ti sinmijileŋ na, naɓa mevel ɗu kwana a mumul.

¹⁶ Da ki ra ɓi ɓi ti jiviɗ naŋ kasl kasl na, naɓa dumvu ɗu gar a sa zluzluɓu.

¹⁷ A kwacay ɗike, anja ki gi suloŋ ti migi mungraˀahaya ta, amma ar ka mavi hiipas gar na, zluwun ti Bumbulvuŋ.

¹⁸ Asi ko mbri na, nga mbuŋ ada, yo njaha hiri ɗik na, anta sa zizi ta.

¹⁹ Ka na mangal ɗu, cin, tiri mbur misi sinmijileŋ, naɓa kisa ga gwat ɗike ti jiviɗ naŋ cirre.

²⁰ Anja ki ci a wuzla miwi ti mbaazlahaya ta, ko a wuzla muzuma useˀhey haɗa kwana, ki ci ta.

²¹ Asi mbur masi mbaazla haɗa, yo mazum haɗa na, a caŋ ar murga, yo mbur mahinje haɗa kwana, a ki zana miyaraɓ yaraɓa.

²² Bunuk, miyi ɗik na, cine mingiɓi naŋ, yo ki pura munuko hiris le, asi a gi madangwas le ta.

²³ Sipi, ɓa ki ɓi ɓi mikaslsla, ki lum sinmijileŋ, ki dubun gwat waɗ ɓa ki ndir ti lesle, da ki luuma taŋ le na, ki hirya taŋ ta.

²⁴ Mbur mijeŋŋe na, cine naŋ a zluzluɓu, yo mbur miyi zuŋ misi sinmijileŋ le ar duniya na, a sa mumul.

²⁵ Ga ɓa bunuk ati munuko, a mumulom, ngwas miyi ɗik ar duniya, a zluzluɓu.

²⁶ Mangal ɗu, puliy mevel ɗike mbak da ya, yo anja ki sipa sar ɗu ti cira hiri.

²⁷ Haˀaw, ngwas sulome na, naŋ ka vigiɗ mijileŋ, yo ngwas burvula i vigiɗ ngi yam miselele.

²⁸ Ngwas nah na, a jiɗ vu kaɓa mufuyo vu, a ga ɓa mizli musloh slohoy a jam haɗa a wuzla mizli.

Kpak ngi mbur miwi le

²⁹ Maɓam: «hẽˀe» malla «Aw ma» na, i waniyka? Mandiram ar li tiri, yo mawudam ti mizli na, i waniyka? Matiram suweˀ manja mbiɗeˀvra naŋ na i waniyka? Mapuraka gwat purla wirwir na, i waniyka?

³⁰ I mizli mazikam ar li si mbaazla, yo mizli masipam mbaazla miɗalaka.

³¹ Mbaazla mapur kuy teˀ avu hiri, maki dalangaɗ ɓaˀ ɓaˀ ar sikiɗe, yo mandi pal naŋ satata na, ki ɗuv hiri ava ta.

³² Ar kiɗa mi naŋ na, a humbuɗ vu kaɓa kaw, a ngum vu jigaˀ kaɓa kwecesle.

³³ Akẽh na, hiri ɗik a sa pur gwat ngi zuma hirngahay, yo wuluk ɗike, a sa guw ɓa ki ɓi ɓi ngi gilaway.

³⁴ Ki sa tiri kaɓa mbur mihin le a wuzla mubuliy, kaɓa mbur mihin le tup ar dangwal ngi palalam ngi yam.

³⁵ Joˀ a ɓi: «A kiɗikiy le, amma ko a jiy ta! A sliɗikiy le, amma ko a ci avu ya ta! Da ya misa puɗuk le na, i sa cufuɗ mbaazla ava na si.»