MIKUCUWULOY 22 - Bible en langue guiziga

¹ Zuwen zila slimiɗ ti mezle, a funa zlili mihaɗa na le, gi mezle i gwat mukuy, a funa ɓiri bara ati ɓiri tapasl tapasl le.

² Mbur misi zlili ati misi murga, taŋ purla, asi taŋ cuw taŋ i Bumbulvuŋ miga taŋ.

³ Mbur misi lesle, a pura mendere le ara ndilawa na, a ɗum, amma manja si na ɓiheye, a cohom a cikeˀe, a sam bonoy.

⁴ Mbur mahin hirnga na, i mbur mazluwun ti Bumbulvuŋ, migir naŋ i zlili, ɗuva hirnga waɗ siifa.

⁵ Jiviɗ ngi mbur musloh sloh na, hadaw ati mazaɓ saɓaɓa anga, mbur muwuɗ jigina siifa naŋ le na, a kirih kileŋ ava.

⁶ Sirka jiviɗ mezle da zuŋ, zle ar zli virzi ngi siifa naŋ, ko da a gi midigila le kwana, naŋ anta sa pula ta.

⁷ Mbur misi zlili a wa misi viyahaya, yo mbur mididiɗa duvuso, i beke ngi mbur muvulaŋ duvuso.

⁸ Mbur magi gwat jeŋ ta na, a sa lum migir naŋ i bonoy, asi gidaŋ naŋ ngi gi moˀore na, a sa tiki.

⁹ Mbur mapur vu ti hiri mezle na, a sa ɗuwulakaŋ mi, asi naŋ muvula gwat ngi zum da mbur hĩhĩy.

¹⁰ Mbur masingir ar mbur na, ɓula avra, naɓa tiri a kiɗ mi le: yo tiri ati zi vu anta mata!

¹¹ Mbur mawuɗ mbur misi ti mevel mezle, yo mingiɓi naŋ i ngi gi mezle na, buy i ngama naŋ.

¹² Bumbulvuŋ a ro hiri taˀ ar sin migisiŋ gisiŋ, a hirya mingiɓi ngi mbur maɓi sloh sloh.

¹³ Mbur masafaya a ɓi na: «Mobor ada avra, da i bi le na, a sa kiɗiy ɓaˀ a jiviɗe!»

¹⁴ Mi ngi balam misi may zile, i vigiɗ mijileŋ, mbur Bumbulvuŋ mupula le fuk na, a sa diɗ ng'araŋ.

¹⁵ Gi gilawa, naŋ da a mevel ziri, amma ganday ngi kuti taŋ, a ɓula taŋ di avra.

¹⁶ Mbur mazuma mbur hĩhĩy na, a tiri ti hĩhĩy le i mbur madiɗa, mbur mavula gwat da mbur misi zlili na, a vusu.

Ɓi wal wal ngi ji lesl

¹⁷ Jika slimiɗ ngi cine mingiɓi ngi misi sinmijileŋhey, yo ki slimiɗ ar dubun ɗu na.

¹⁸ Asi hiri a curuw ngi tiɓa taŋ a hur mevel ɗike, anja t'ada jom gar, weˀ vu a balam ɗike.

¹⁹ Ɓa ki pula vu ɗik mbak da Bumbulvuŋ na, i wuɗ i dubunuw gwat da ka dana ya.

²⁰ Ani i tuhuw mingiɓi mezlehey le kukur makir, i mi ngi kuti vuhoy ati ngi siney,

²¹ ɓa ki biga ɓi mikaslsla muwãˀ naŋ gisiŋ, ɓa mizli mislinukuw na, ki mataŋ mingiɓi ti jiviɗ naŋ kaslsla.

²² Anja ki tiɓa gwat ngi mbur hĩhĩy ta, asi i hĩhĩy, yo mbur mizlew na, anja ki guzuvuraŋ ar kiita ta.

²³ Asi Bumbulvuŋ a sa cik vu ar taŋ, yo mizli mavaka gwat taŋhay na, a sa zuɓa siifa taŋ avra.

²⁴ Ki jam ngama ati mbur misi mevele ta, ki laˀam ati mbur mihimaˀa ta,

²⁵ vur ka masa sirik ti gwat ngi gi naŋ malambaˀ na, yo vur ka masa pula siifa ɗik a ci ar kwar.

²⁶ Mizli mazliram haŋ kap kap ati mizli, ɓa ngi gi sedewo ngi duvus ngi mizli na, ki ci a wuzla taŋ ta,

²⁷ asinta, kisa lum gwat ngi wuruk naŋ ta kwani! Ki wuɗ ɓa a sa zuɓaka arngawo ɗik, ka mutup angaˀa na vur mike?

²⁸ Maakway, dideˀ ɗikey ming'aka zleˀe na, ki kiraha ta.

²⁹ Mbur maga slra naŋ kuy kuy na, ki pur le ɗaˀ kwa? Ko a mbuŋ buyoy kwana, naŋ a cici gu, naŋ anta sa cici a wuzla manja sineye ta.