MIKUCUWULOY 21 - Bible en langue guiziga

¹ Mevel ngi buyo, naŋ kaɓa mizaw asi haŋ ngi Bumbulvuŋ, a ngi di hirnga ng'ar li naŋ muwuɗ le gar.

² Mburo, gwat ngi gi naŋ gar na, a pura ava kuy, amma maɗumburo ɓi ngir mevel ngi mburo gar i Bumbulvuŋ.

³ Gi gwat mijeŋŋe, yo gi gwat mikaslsla na, Bumbulvuŋ a hĩyã fineˀ mikuli.

⁴ Pura vu hiris le ati wuluk ngi huhumo vu na, mabiga mbur misi moˀore i nah: nah gar i mungra.

⁵ Wuluk ngi mbur miwirwire, i lum migisiŋ gisiŋ, amma wusa vu haɗa, aru ti mburo ng'ar murga.

⁶ Zlili muluma ti gi gilaw da mizli na, i himiɗ lambaˀ ngi mizli masipam mucu.

⁷ Misi moˀoreheye, i moˀore taŋ maziza taŋ, asi t'anta ngumam gi gwat mikaslsla ta.

⁸ Gi gwat ngi mbur magi mungra madiɗa na, i jiviɗ musloh sloh, amma slra ngi mbur mijeŋŋe na, i jiviɗ micirre.

⁹ Zuwen cifi pal ɗik ar li mukulkuc a viŋ, a funa cifi ar hay purla ati ngwas misi may sliŋ na le.

¹⁰ Deŋ vu ngi mbur misi moˀore, a wuɗ di i gi malambaˀa, ko ngama naŋ kwana, naŋ anta puraŋ ti hiri mezle ta.

¹¹ Mbur manja si na ɓi, da a kutakaŋ le ti bonoy na, a vula sinmijileŋ da mbur gilawa, yo a sa lum sin ngi gi gwat mudubunaka le da mbur misi sinmijileŋ na.

¹² Mbur mijeŋŋe a ji lesl avu sukwi ngi misi moˀoreheye, hã a hizigiɗa taŋ ng'ar mendere.

¹³ Mbur madisla slimiɗ ɓa a cine widi ngi mbur hĩhĩy ta na, a sa zil vu: gawla kilawa na, mbur mikil widi naŋ anta.

¹⁴ Gwat muvula ngatara, yaŋ ti yaŋ na, a tisl mevel, vula gwat suhho na, a muca himaˀ mufõh fõh.

¹⁵ Gi kaslsla i mumul avu mbur mijeŋŋe, amma avu mbur migi malambaˀa, i bonoy.

¹⁶ Ko wa gar mabuˀ avu jiviɗ mezle na, a sa ra hin a wuzla mizli mumucahay.

¹⁷ Mbur mawuɗ gi gwat maciraŋ hiri na, a sa ndir manja gwat, mbur mawuɗ mbaazla ati useˀ mezle haɗa na, anta gi zlili ta.

¹⁸ Mbur misi moˀore, i ngi mbiɗa hirnga ngi mbur mijeŋŋe, yo mbur manjika ɓi ngi mizli kwana, i ngi mbiɗa hirnga ngi mizli mikaslslahay.

¹⁹ Zuwen ka mindir ar li papala, a funa zuɓa ngwas misi may sliŋ ati misi mevele le.

²⁰ A hay mbur misi sinmijileŋ, zlili mupuɗaw ati lum ada, amma mbur gilawa, a kiɗa mi taŋ pay.

²¹ Mbur masipi gi mezle ati gi teŋteŋ na, a lum siifa, gi jeŋŋe waɗ ɗuva hirnga.

²² Walahay majiginaka kuy kuyo, mbur misi sinmijileŋ a tiɓa gu, a waha mohol, taŋ manjaham hiri aseˀe na gu.

²³ Mbur majigina mingiɓi mabo ti balam naŋ gar na, a jigin di i vu naŋ avu bonoy.

²⁴ Mbur mahuhum vu, macin ta na, mazilam hirnga gidaŋ na i naŋ, a ga slra naŋ ti huhumo vu mifineˀ gidaŋ le.

²⁵ Mbur masafaya, i may gwat naŋ masa kiɗaŋ, asi haŋ naŋ anta ngum gi slra ta.

²⁶ A vi hiipas ar li hiyĩ gwat, amma mbur mijeŋŋe, a vul gwat ti mevel purla.

²⁷ Mikuli ngi mbur misi moˀore i gwat mukuyta wãˀ, sokkota naŋ maga ti wuluk malambaˀ na jak ma.

²⁸ Migi sedewo jeŋ ta na, a sa zizi, amma mbur misina cine ɓi le na, a si na ɓi ɓi gu ndrehhe.

²⁹ Mbur misi moˀore, a ga vu naŋ ka mbur migidaŋ gidaŋ, amma mbur mikaslsla na, gwat ngi gi naŋ a dir virzi le gidaŋ gidaŋ.

³⁰ Sinmijileŋ ngi mburu, lesl ngi mbur, malla ko wuluk naŋ kwana, naŋ puɗaw a mihiri ngi Bumbulvuŋ ta.

³¹ A juwaka piliseye vur hin ngi vurumo, amma wãˀ naŋ na, mavula bugawla i Bumbulvuŋ.