MIKUCUWULOY 18 - Bible en langue guiziga

¹ Misi gizaka, a sipi di i gwat naŋ mawuɗ tewle, da ko a vulakaŋ kuti wanaka gar na, a tiɓa ta.

² Macira hiri da mbur gilawa, i sli wala ngi ɓi ta, amma i njika wuluk ngir mevele.

³ Moˀore ati pi meseme, taŋ zlaɓa, yo hiris ati zi vu kwana, taŋ zlaɓ aya.

⁴ Mingiɓi ngi balam mburo, naŋ jileŋ kaɓa yam, i mekepel mivravra, miviɗiviɗi ngi sinmijileŋ.

⁵ Angi kiita, ɗiya ɓi ngi mbur misi moˀore, ɓa ngi ziza mbur mijeŋŋe na, naŋ kuy ta.

⁶ Mingiɓi ngi mbur gilawa, a slikiɗ tiri, mi ngi balam naŋ, a so ti kiɗa vu.

⁷ Maziza mbur gilawa i mi ngi balam naŋ, mi ngi irne naŋ i kwar ngi ji naŋ tehhe a muŋ.

⁸ Mingiɓi ngi mbur mukupa ɓi na, naŋ kaɓa ɗaf mundum, a ci sesẽŋ asi vu.

⁹ Mbur magi vagas ti slra naŋ na, i misi purla ati mbur mihirya gwata.

¹⁰ Slimiɗ ngi Bumbulvuŋ i hay madiɗa migidaŋ, mbur mijeŋŋe a kil ng'ara, a lum li pula vu araŋ.

¹¹ Zlili ngi mbur misi zlili i hay naŋ, muguno le ti mohol, ar wuluk naŋ na, i gala mbur matuwuɗa gu ta.

¹² Dumbuŋ angi mbur masa hiryi na, naɓa huhumo vu a nahaŋ mevele le, amma mburo, ɓa a sa lum dudok na, naɓa hina hirnga ada.

¹³ Mbur mambiɗi mi manja a cine ɓi na, kite a bigi di i gilaw naŋ, a pi di i mesem.

¹⁴ Mbur muguta, wuluk ngi muc anta ava ta na, a pa hirnga da jiji, amma da wuluk misi kanah anta ava ta na, maslikiɗa deŋ gu i waka?

¹⁵ Mbur misi lesle, a lum sin, yo slimiɗ ngi mbur misi sinmijileŋ, a wuɗ cine ɓi ngi sine gǝr gǝr.

¹⁶ Mbur mavul gwat ngatara na, a gaŋ vu zuyyo, yo a pulaŋ jiviɗ ngi ci ng'avi mizli madiɗahay.

¹⁷ Mbur maɓi dumbuŋ ar kiita na, a puraka naŋ jeŋŋe, amma da mbur numuŋ a ndilo le ya na, a ɓi pal avu nga naŋ.

¹⁸ Da a gaka ceregezleŋ le na, a kiɗa mi ngi tiri le, a sla ɓi ngi mizli migidaŋhaya le.

¹⁹ Sukum ɗik migakaŋ gwat ngi ji mevel le na, a zli ta wãˀ fineˀ walahay muguno le ti moholo, yo tiri naŋ, naŋ zlak kuy kuy, kaɓa gwat ngi kilika miviŋ ngi hay madiɗaŋ.

²⁰ Mbur gar a luuma ɗafa ti mingiɓi ngi balam naŋ, i mi ngi balam naŋ masaŋ ti gwat ɓa a mbi.

²¹ Muc ati siifa na, a gi avu mingiɓi, mbur mawuɗ ɓi ɓi ti lesl na, a luuma migir naŋ.

²² Mbur mulum ngwas le na, a lum gwat mezle le, a lum gi mezle ngi Bumbulvuŋ le.

²³ Mbur misi viya a ɓi ˀay ɓaˀ a ruwuy, amma mbur misi zlili a mbiɗa ti buc.

²⁴ Mbur misi ti cil naŋhay haɗa na, a sakaŋ ti mendere, amma ngama numuŋ, a funa sukumuŋ le.