MIKUCUWULOY 17 - Bible en langue guiziga

¹ Zuwen humbuɗa helelem ti zuy, a funa zuma ɗaf ngi muguzlum ti tiri na le.

² Gawla ngi hay misi lesle, a funa mangal ngi hay magi gwat ngi pi meseme le, yo gawla nah, a sa zumaka haya jom ati mizli sukumuŋhoyo.

³ Ɓiri bara ati ɓiri tapasl tapasl, a paka taŋ ti pi ar vu, amma ɓi ngir mevele, mapura i Bumbulvuŋ.

⁴ Mbur malambaˀa, a cine mingiɓi mijeŋ ta, migi slire, a jika slimiɗ asi ɓi ngi slir.

⁵ Mbur masingir ar mbur misi viya na, a zi di i Migi naŋ, mbur mamumul ti ɓi ngi hiryi na, anta sa lih avu kuti ti bonoyo ta.

⁶ Loppol ngi midigilahaya, i dideˀ taŋ meciɗekey, yo gwat ngi wuya ngi ziri kwana, i miyi taŋhay.

⁷ Mingiɓi majini vu na, avu mbur gilawa, naŋ kuy ta, na mingiɓi ngi slire, mbur madiɗa ngi buyo, a pura kuy mbri jak ka?

⁸ Gwat muvula ngatara na, i jiŋ avu mbur mavula, naŋ mimbiɗi le ko ti damaka gar na, gwat naŋ a gi si.

⁹ Mbur masipi ji ngama na, a puyuk hirnga ti ɓi muzluɓa, amma mbur mamo ti ɓi nga dirba na, a wuɗuk ngama.

¹⁰ Mbiɗi hirnga is pal da mbur misi lesl na, a gi slra haɗa ava, a funa makutaka mbur gilaw ti kiɗ ganday skata le.

¹¹ Mbur misi moˀore, a sipi slikiɗa ɓi tewle, amma a sa slinakaŋ mbur miziza vu mukuyta wãˀ ng'avaŋ.

¹² Zuwen ka maji hirnga ti luˀuf masipi ziri naŋhay, a funa ka maji hirnga ti mbur gilaw ar li gi gwat ngi gilaway na le.

¹³ Mbur mama gi mezle ti malambaˀ na, hiryi anta bi put le ti hay naŋ ta.

¹⁴ Zli tiri na, naŋ kaɓa ngila totoŋ ngi yam, inga pula ɓi teˀe, vur tiri maslikiɗ ti gidaŋ.

¹⁵ Gi ti mbur malambaˀa, kaɓa i mbur mijeŋŋe malla gi ti mbur mijeŋŋe, kaɓa i mbur malambaˀ na, taŋ cuw taŋ kuyta wãˀ a mihiri ngi Bumbulvuŋ.

¹⁶ Dala kaw a haŋ mbur gilawa, a pulaŋ gir ngi mike? Ɓa a hiɗik di sinmijileŋ kwa? Na lesl anta ava ta mayse!

¹⁷ Ngama a wuɗuw ko ti vunaka gar, amma sukum ɗike, a ya ka ngi wuɗa mbur mazlir ti ka ta.

¹⁸ Mbur mazliram haŋ kap ati mbur, ɓa a gi sedewo ngi mbur mahil duvus avu mbur na, i gilaw.

¹⁹ Mbur mawuɗ tiri na, a wuɗ di i mungra, mbur maga vu naŋ madiɗa na, a sipi di i bonoy nga hirnga naŋ.

²⁰ Mbur misi wuluk sloh sloh na, naŋ anta luuma wuya ta, yo mbur maɓi ɓi malambaˀ na, hiryi a sa lumaŋ.

²¹ Mbur miyi zuŋ gilaw le na, gir a lumaŋ le, yo cine ngi zuŋ manja lesle, anta sa mumul aseˀe ta.

²² Mevel misi ti mumul na, a mbul vu, amma lika ɓi, a kiɗa hirzlik ngi vuhoyo.

²³ Mbur misi moˀore, a tiɓa gwat ngi vul muɗum ti ɗumo, ɓa a mbiɗa ɓi mikaslsla misi a mevele na.

²⁴ Sinmijileŋ, a pur avu mbur misi lesle, amma mbur gilawa, a pur nga naŋ ng'asi diˀisi,

²⁵ Mangal gilawa, i bonoy avu cine, i ndurɓo hiri avu ngwas miyi naŋ.

²⁶ Kuta mbur mijeŋŋe ti bonoy na, i gwat mukuyta wãˀ, kiɗa mizli madiɗahay kwana, i ngila ɓimujuwa mitaˀ gara.

²⁷ Mbur maji lejeŋ avu irne naŋ na, naŋ ti sin haɗa, yo mbur miteˀteˀ na, i mbur misla wala ngi ɓi le.

²⁸ Ko mbur gilaw kwana, da naŋ teˀ teˀ na, a pura kaɓa mbur misi sinmijileŋ, da a tiɗa mi le tiɗeˀ na, a pura kaɓa mbur misi lesle.