MIKUCUWULOY 16 - Bible en langue guiziga

Bumbulvuŋ naŋ da ar gwat ngi gi ngi mbur vur hin gara

¹ Gwat ngi gi, mbur a toho a mevele, amma i Bumbulvuŋ mapula jiviɗ ngi gi nah.

² Mburo, gwat ngi gi naŋ gar na, a pura kuy, amma mapura mevel ngi mbur i Bumbulvuŋ.

³ Njika gwat ngi gi ɗike da Bumbulvuŋ, naɓa gwat ka mujuwa ngi gi gar na, a sa gi.

⁴ Bumbulvuŋ miga gwat gar na, a wuluk le, ko naŋ miga mbur misi moˀore vur hin ngi bonoy na kwana, a wuluk le.

⁵ Mbur muhuhumo vu gar na, a ga Bumbulvuŋ kuyta wãˀ, ar kiɗa mi naŋ na, anta sa ndir manja a gakaŋ kiita ta.

⁶ Da ji ngama ada, gi teŋteŋ ada na, naɓa wereke ada ya, yo da mbur ara zluwun ti Bumbulvuŋ na, a mbiɗa duba da malambaˀa.

⁷ Da gwat ngi gi ngi mburo, a cira hiri le da Bumbulvuŋ na, ko ati mesene naŋhay kwana, Buymisemuŋ a ɗiya taŋ ˀay.

⁸ Zuwen zlili mineˀkini, muluma ti jiviɗ naŋ, a funa zlili mihaɗa, muluma ti jiviɗ naŋ ta na le.

⁹ Mbur a wulka gwat ngi gi, amma i Bumbulvuŋ mapula jiviɗ ngi gi naŋ.

Ɓi vur buy madiɗahay

¹⁰ Buyo, a ɓi di i wuluk ngi Buymisemuŋ, da ara ga kiita na, naŋ anta pur mburo ti pur ta.

¹¹ Kilo ati agwada mikaslsla, i ngi Bumbulvuŋ, yo cikili ngi dudok ngi gwat gar na, i slra naŋ.

¹² Gi malambaˀa, i gwat mukuyta wãˀ a mihiri ngi buyo, asi zumabuy naŋ mandir gidaŋ gidaŋ na, ti gi jeŋŋe.

¹³ Mizli maɓam ɓi mijeŋŋe na, buy a ga taŋ mezle, a wuɗ mizli maɓam ɓi mikaslsla.

¹⁴ Ji mevel ngi buyo, a kiɗa mburo vagay, amma mbur misi sinmijileŋ, a tislaŋ mevele gu.

¹⁵ Da hiri ara cira buyo na, naɓa siifa ada, yo gi mezle naŋ na, naŋ kaɓa vuŋ ngi mohor.

Kpak ngi mbur ati gwat ngi gi naŋ a wuzla mizli

¹⁶ Zuwen mbur malum sinmijileŋ, a fina ɓiri tapasl tapasl mimezle le, zuwen mbur malum lesle, a fina ɓiri bara le.

¹⁷ Jiviɗ ngi mizli mikaslslahaya, naŋ pulaˀ duba avu gi malambaˀa, mbur mawuɗ jigina siifa naŋ na, a ji lesl avu gwat ngi gi naŋ.

¹⁸ Maru ti mbur nga zizi na, i huhumo vu, mahizigiɗa mburo, i hirsa vu.

¹⁹ Zuwen cifi miweˀe ati mihina hirngahay, a funa wunka gwat ngir vurum ati mizli muhuhumo vuhoyo le.

²⁰ Mbur mawulka ɓi kuy kuy na, a sa cin ndum, mbur mapula vu naŋ mbak da Bumbulvuŋ na, a mumul.

²¹ Mbur masla ɓi ti wuluk mijileŋ na, a zilaka mbur misi lesle, ɓi ɓi ti ˀay mezle na, a mbiɗa mevel ngi mburo.

²² Wuluk mezle, i miviɗiviɗi ngi siifa avu mizli misi ti naŋhaya. amma a kutaka gilawaya ti gilaw taŋ vuna tehhe a muŋ.

²³ Mbur misi sinmijileŋ na, a wuluk kwaɗay, ɓa a sla ɓi, yo kiɗa slir naŋ na, a mbiɗa mevel ngi mburo.

²⁴ Mingiɓi ngi wuɗa vu, a bam vu ati mam, naŋ deɗek a balama, i slalak avu dumvu.

²⁵ Mbur mekeleme, a pura gwat ngi gi naŋ kaslsla, dambalaka ar kiɗa mi naŋ na, a zuɓ di i jiviɗ ng'ar mucu.

²⁶ Maga ɓa mbur a gi slra gǝr gǝr na, i may majaŋ, i gwat ngi ci nga mi mahizigiɗaŋ.

²⁷ Mbur kesefe, a juw ɓi malambaˀ a kwacaya, irne ngi balam naŋ i vu mazuma li.

²⁸ Mbur maɓi sloh sloh na, a slikiɗ tiri, yo mbur magil ɓi na, a wuɗuka ngamahaya.

²⁹ Mbur misi moˀore a tikina cil naŋ, ɓa aru di ng'ar jiviɗ malambaˀa.

³⁰ Mbur mawuluk gi malambaˀa, a tiɗa hiri, a humbuɗ mi na, kite a gi malambaˀ le si.

³¹ Holo, i loppol mezle misi a hirnga mburo, ɓa mbur a luuma na, sey da ara gi gwat mijeŋŋe.

³² Mbur maji mevel kutum ta na, a funa mbur bugawla le, mbur majigina vu naŋ gu na, a funa mbur mazum walahay taˀa le.

³³ Mbur maga ceregezleŋ da mizli, da ceregezleŋ a sa diɗ le ar waka gar na, ɓi nah a bo tivu Bumbulvuŋ.