MIKUCUWULOY 13 - Bible en langue guiziga

¹ Mangal misi sinmijileŋ a cine kuti ngi cine naŋ, amma mangal macin ta na, anta tiɓa mi ngi cine mambiɗaŋ hirnga ta.

² Ko wa gar a luuma migir naŋ ar mingiɓi naŋ mezle, amma mizli macifam ti ɓi a kwacay ta na, nga taŋ i moˀore tewle.

³ Mbur maji lejeŋ avu mi ngi balam naŋ na, a jigin di i siifa naŋ, mbur maɓi ɓi haɗa na, a hiryi di i vu naŋ.

⁴ Masafaya a hiyĩ gwat, amma a lum ta, amma mizli miwirwireye, gwat taŋ mahĩyãka, a sa mbam di.

⁵ Mbur mijeŋŋe, a pura slire hiris le, mbur misi moˀore, a pa mesem da mizli ti zi.

⁶ Da gi jeŋŋe a jigina mbur masipi jiviɗ mikaslsla na, naɓa mungra kwana, a ziza misi moˀoreheye ya.

⁷ Mbur mekeleme, a ga vu naŋ ka misi zlili, dambalaka gwat naŋ anta neˀ ta ngbaŋ, mbur numuŋ a ga vu naŋ ka misi murga, dambalaka naŋ ti zlili haɗa ngbaŋ.

⁸ Mambiɗa hirnga ngi mburo, i zlili naŋ, amma mbur misi murga, anta surokoŋ mi ta.

⁹ Mbur mijeŋŋe, a pusluɗa li puɗak puɗaka, mbur misi moˀore, naŋ mbuˀmbuˀ kaɓa lampe mamucu.

¹⁰ Huhumo vu a slikiɗ di i tiri tewle, sinmijileŋ, naŋ avu mizli matiɓam kuti.

¹¹ Gi zlili a haŋhaŋ na, a kiɗ mi a haŋhaŋ ya, amma mbur magi zlili ti sekvu na, zlili naŋ a siki.

¹² Njaha hiri hirnga puyuk na, a gi jiji, gwat mbur muro ti may naŋ, da a luuma le na, i widis ngi siifa.

¹³ Mbur matiɓa kuti ta na, a zizi, mbur mazluwun ti ɓimuɗuva na, a sa lum migir naŋ.

¹⁴ Dubun ngi mbur misi sinmijileŋ i miviɗiviɗi ngi siifa, a laha mbur avu mazaɓ ngi muco.

¹⁵ Mbur misi ti wuluk mezle, a gi mezle da mizli, amma mizli macifam ti ɓi a kwacay ta na, a zuɓam jiviɗ miyikiɗik.

¹⁶ Mbur majigina vu naŋ na, a ga gwata tir sin naŋ, amma gilawa, a gi di i gwat naŋ ngi gilaway.

¹⁷ Mislin misi moˀore, a ca sar ar bonoy, amma mijiviɗ miteŋteŋ a mbul vu.

¹⁸ Mbur mangum sirik ta na, a vus, yo a pi mesem. amma mbur mangum a mbiɗakaŋ hirnga na, a sa ɗuvakaŋ hirnga.

¹⁹ Gwat mbur muro ti may naŋ, da a luuma le na, i gwat mezle avu dumvu naŋ, gilaway mangumam mbiɗa duba da gwat malambaˀa ta na, vurˀe.

²⁰ Mbur malaˀam ati misi sinmijileŋhey na, a sa lum sinmijileŋ, yo mbur malaˀam ati gilaway kwana, a saŋ ti mendere.

²¹ Malambaˀa, ara gidiɗa migi mungraˀahaya, amma gi mezle ara kisa mizli mijeŋŋeheye.

²² Mbur mezle a sa pula zlili naŋ da dideˀ naŋhay, amma zlili ngi mbur migi mungra, a wam di vu da mbur mijeŋŋe.

²³ Guva ngi mbur misi murga, a gi gwat haɗa, amma mbur mazizi, asi gi jeŋŋe anta.

²⁴ Mbur mawuɗ sliɗa mangal naŋ ta na, naɓa naŋ anta wuɗaŋ ta, amma mbur mawuɗ mangal naŋ na, a wus vu ngi kutaŋ ti lawaya.

²⁵ Mbur mijeŋŋe a zum, hã a mbi ndus, amma kwacay ngi mbur misi moˀore, a ro njoŋ.