MIKUCUWULOY 12 - Bible en langue guiziga

¹ Mbur mawuɗ kuti na, a wuɗ di i dubuna sin ngi gi gwat, mbur mapura mbiɗi hirnga hiris le na, i gilaw.

² Mbur mezle na, Bumbulvuŋ a gaŋ mezle, amma mbur misi were, Bumbulvuŋ a gaŋ kiita.

³ Mbur anta cifi gidaŋ gidaŋ ti gi moˀore ta, amma mbur mijeŋŋe, naŋ anta wus lambaˀ lambaˀ ta.

⁴ Ngwas mupuɗawa, i loppol ngi zil naŋ, amma ngwas sekwele, i waˀa mivi a duba zil naŋ.

⁵ Mizli mijeŋŋeheye, a wulkam di i gi gwat mikaslsla, misi moˀoreheye, nga taŋ i zuma vu.

⁶ Mingiɓi ngi misi moˀoreheye, i li muɗum ngi ziza vu, amma mizli mijeŋŋeheye, mi ngi balam taŋ a laha taŋ.

⁷ Misi moˀoreheye, a ndilam le na, naɓa a kiɗam mi le leɗeɗ, amma hay ngi mizli mijeŋŋeheye, naŋ da deŋ gidaŋ gidaŋ.

⁸ A hunumaka mburo asi lesl naŋ mezleŋ, mbur misi lesl naŋ cir cir ta na, i ngi hirisi.

⁹ Cifi ka mbur mupuɗaw, dambalaka gwat ngi zum kwana, a kicuw na, zuwen cifi ki mbur miweˀe ti gawla ɗik purla si, a funa le.

¹⁰ Mbur mijeŋŋe, a si na gwat ginew naŋhay mawuɗam ngi zumo le, amma mbur misi moˀore, ircece anta a hur naŋ ta.

¹¹ Mbur mahufa guva naŋ na, a sa mbi ti gwat ngi zumo, amma mbur magi welele ti gwat midar ta na, i gilaw lambaˀa.

¹² Mbur miziriɗa mi, a hiyĩ di i gwat ngi lum ngi misi moˀorehey, amma mizli mijeŋŋeheye, a roko deŋ gidaŋ gidaŋ na si.

¹³ Ngamngam makiɗ vu vagaya, a bo baɗ a balam mbur misi moˀore, amma mbur mijeŋŋe, a lih avu muɗa didaka.

¹⁴ Mingiɓi mabo ti balam mbur na, mbur gar a lum mezle nga naŋ nga naŋ ara haɗi, yo a lum migir ngi slra naŋ.

¹⁵ Mbur gilawa, a pura kaɓa naŋ kaslsla si, amma mbur macin kuti na, i mbur misi sinmijileŋ.

¹⁶ Mbur gilawa, a biga ji mevele a haŋhaŋ si, amma mbur misi were, da ara zakaŋ na, a nda ɓi nah ndeˀ a kwacay.

¹⁷ Mbur maɓi ɓi mikaslsla na, a njiko ɓi mijeŋŋe, mbur migi sedewo mijeŋ ta na, a hiryi ɓi.

¹⁸ Mbur maduf mi haɗa na, mi naŋ a ngum vu ka maslalam, amma irne ngi mbur misi sinmijileŋ a mbul vu.

¹⁹ Mbur maɓi ɓi kaslsla na, naŋ da ko ti vunaka gar, amma mbur misi moˀore, a zik kaɓa hiri kiɓic tewle.

²⁰ Mizli majuwam ɓi ngi gi malambaˀa, misi a mevel taŋ i ɓi mijeŋ ta, amma mizli makutam vu ti ɓi ngi zuy na, misi a mevel taŋ i mumul.

²¹ Ko hiryi anta luuma mbur mijeŋŋe ta, amma misi moˀoreheye, taŋ ndus ndus ti ɓi mutuwaˀa.

²² Irne maɓi ɓi ngi slir na, a ga Bumbulvuŋ kuyta wãˀ, a ngil wuy ti mizli magam slra ti ɓi mikaslsla.

²³ Mbur misi were, a ɗumo sin naŋ ɗum, amma mevel ngi gilawaya, a til mi ti ɓi ngi gilaw.

²⁴ Mbur misi haŋ kafaˀa, a wa mizli, amma masafaya, aru ti mburo ng'ar slra misi ti tikaˀay.

²⁵ Wuluk misi a mevel mburo, a huluɓaŋ hilaɓ hilaɓ, amma mingiɓi mezle na, a vulaŋ mumul.

²⁶ Mbur mijeŋŋe a kisa cil naŋ cirre ng'ar jiviɗ mezleŋ, amma jiviɗ ngi misi moˀoreheye, a ziza taŋ.

²⁷ Mbur masafaya anta tuso useˀ naŋ tos le ta, amma gwat mezle mupuɗaw ngi mburo, i wirwir naŋ ngi gi slra.

²⁸ Siifa, naŋ angi jiviɗ ngi slra mijeŋŋe, amma mbur mazuɓ jiviɗ ngi mungra na, aru di ng'ar mucu.