MIKUCUWULOY 11 - Bible en langue guiziga

¹ Kilo mawi gwat jeŋ ta na, a ga Bumbulvuŋ kuyta wãˀ, amma gwat mawa dudok ngi gwata kaslsla na, a ciraŋ hiri.

² Da huhumo vu ada na, naɓa hiris kwana ada ya, amma sinmijileŋ, naŋ avu mizli muluɓ luɓoy.

³ Teŋ teŋ ngi mizli mikaslslahaya, maka taŋ mbuŋ i naŋ, amma wer ngi mizli maɓam ɓi dar ta na, a ngizla taŋ.

⁴ Ar hin Buymisemuŋ miji mevel le na, zlili anta gi gwat neˀ le ta, amma gi jeŋŋe, a cuko mburo tir muco.

⁵ Jeŋŋe ngi mbur miteŋteŋ na, a tiri ti gwat ngi gi naŋ kaslsla, amma mbur misi moˀore, a muc ti moˀore naŋ vuna.

⁶ Jeŋŋe ngi mizli mikaslslahaya, a laha taŋ, amma mizli miteŋteŋ tahaya, hiyĩ gwat taŋ na, a ja taŋ ar kwara tehhe a muŋ.

⁷ Da mbur misi moˀore a muc le na, njaha hiri naŋ a zizi le, yo njaha hiri naŋ asi zlili naŋ na kwana, a zizi le ya.

⁸ Mbur mijeŋŋe a lih le tir zluwuno, yo mbur misi moˀore a diɗ le ng'ar li naŋ.

⁹ Mbur miziriɗa mi, a ziza cil naŋ ti mi ngi balam naŋ, amma mizli mijeŋŋehey a sa laham ti sin taŋ.

¹⁰ Walahay a zluzluɓ asi mizli mijeŋŋehey taŋ ar wuya, da mizli misi moˀorehey a zizam le na, walahay a ji salalay.

¹¹ Ɗuwula mi ngi mizli mikaslslahay a pa walahaya, mi ngi balam misi moˀoreheye, a waha walahaya.

¹² Mbur mahirsa cil naŋ na, i gilaw, mbur misla wala ngi ɓi le na, a cifi lek leke.

¹³ Mbur magi mbaɗa na, a njik di i ɓi miyaŋŋahay, mbur miteŋteŋ a ndir ti ɓi ɗum a kwacay.

¹⁴ Da mizli madiɗa ngi mbuŋhoy anta na, hirwuy a hiryi, laha vu a gi vur vendeke ngi mizli i mingilawuyoy.

¹⁵ Mbur magi sedewo ngi mbur mulak mawuɗ duvus na, a sa si bonoy, mbur mangum ta na, a ndir setetete.

¹⁶ A cikaka hirnga da ngwas mezle, yo mbur migidaŋ a lum zlili.

¹⁷ Mbur mavul ti gula ti hazumo, a gi di i mezle da hirnga naŋ tehhe, mbur masingir ar mbur misi ar bonoyo, a wuɗ di i bonoy nga hirnga naŋ.

¹⁸ Mbur misi moˀore a lum di i migir mapulaŋ mesem mesem. Amma mbur marudigi ti ɓi mijeŋŋe na, a lum migir migisiŋ gisiŋ naŋ.

¹⁹ Haˀaw, gi gwat mijeŋŋe, aru ti mburo ng'ar siifa, amma mbur masipi gi malambaˀ na, aru ng'ar mucu.

²⁰ Mizli misi mevele dar purla ta na, a ga Bumbulvuŋ kuyta wãˀ, mizli miteŋteŋheye, a lumam gi mezle naŋ.

²¹ Ko mbri na, mbur misi moˀore a sa kutakaŋ ti bonoy, amma sukwi ngi mizli mijeŋŋeheye, a sa laham.

²² Ngwas mukuy manja lesle, naŋ kaɓa dangwa ngi ɓiri tapasl tapasl milaw avu hutuŋ ngi fedem.

²³ Mizli mijeŋŋehey a kutukom sey gi mezle, misi moˀorehey a njaham hiri nga taŋ ngi luuma himaˀ tewle.

²⁴ Mbur mekelem a vul ti gula ti hazum, na a gi zlili ti vendeke jak, mbur numuŋ a kuso gwata hã fineˀ gidaŋ, na a gi murga ti vendeke jaka.

²⁵ Mbur mavul ti gula ti hazum na, a sa lum gwata, mivi zah avra, yo mbur mavul gwat ngi si da mbur na, a sa kiɗakaŋ madalyama.

²⁶ Mbur mawi vu ti dawa sekke si na, mizli a nisakaŋ. Amma mbur maru ti daw ngi hiɗik ar luuma na, a ɗuwulakaŋ mi.

²⁷ Mbur masipi jiviɗ ngi gi mezle na, mizli a hĩyãkaŋ, mbur masipi gi malambaˀ na, malambaˀ vuna a sa ndilaŋ gbaˀa.

²⁸ Mbur mapula vu naŋ mbak vur zlili naŋ na, a sa diɗi, amma mizli mijeŋŋeheye, a sa ɗiɗam kaɓa widis tukuzohoy.

²⁹ Mbur magi biyãˀ biyãˀ ti hay naŋ na, a sa lum migir naŋ i himiɗi, mbur mijijigwiɗe, a sa tiri beke ngi mbur misi sinmijileŋ.

³⁰ Widis ngi siifa, i migir ngi mbur mijeŋŋe, mbur misi sinmijileŋ, mizli taŋ asi haŋ naŋ.

³¹ Mbur mijeŋŋe, naŋ ti migir naŋ a ruwuyo gisiŋ gisiŋ, na mbur misi moˀore ati mbur migi mungra na, nga taŋ i ɓam mbri yaka!