MIKUCUWULOY 10 - Bible en langue guiziga

Mikicuwuloy vur gwat ngi gi ngi mburu

¹ Mikicuwul ngi Salomoŋhoy. Mangal misi sinmijileŋ a vula mumul da cine Mangal manja lesle, mumuŋ a nduruɓ di hiri

² Zlili muluma ti jiviɗ malambaˀ na, anta pul gir ta, amma gi gwat mijeŋŋe na, a cuko mburo tir muco.

³ Bumbulvuŋ anta pula may a ja mbur mijeŋŋe ta, amma misi moˀoreheye, anta vula taŋ gwat ngi kiɗa maya ta.

⁴ Haŋ mikekewel na, a so ti murga, haŋ miwirwire, a gi zlili.

⁵ Mbur mawi vu ti gwat ngi zum ti hin pas na, i mbur misi wer, amma mbur mahinje ti sifi na, i mbur mihiris le.

⁶ Ɗuwula mi a ndir a hirnga mbur mijeŋŋe, amma mbur misi moˀore, a ɗumo moˀore ɗum ar mingiɓi naŋ.

⁷ Mbur mijeŋŋe na, mizli keŋŋe ti naŋ a hirnga, a ɗuwulakaŋ mi, amma mbur misi moˀore, a puyukoko hirnga naŋ jom ti slimiɗ naŋ.

⁸ Mbur misi ti wuluk ngi sinmijileŋ, ɓi miɓa ɗaˀ le na, a tiɓaŋ, amma mbur maɓi ɓi ngi gilaway na, aru nga zizi.

⁹ Mbur maru ar jiviɗ mikaslsla na, aru setetete, amma mbur masipi jiviɗ muslurkoɗ slurkoɗ na, a sa kutakaŋ ti bonoy.

¹⁰ Mbur makuɓuc hiri da mizli na, a so taŋ ti bonoy, yo mbur matiɗi kalaf angi ɓi ta na, aru nga zizi.

¹¹ Mi ngi balam mbur mijeŋŋe, i miviɗiviɗi ngi siifa, amma mi ngi balam mbur misi moˀore, a ɗumo gi moˀore naŋ na ɗum.

¹² Gi mesene a slikiɗ tiri, amma wuɗa vu a ɗumo malambaˀahaya gar.

¹³ A lumam sinmijileŋ angi mingiɓi ngi mbur misi lesle, amma mbur gilaw a, a kiɗaka ti ganday a duba.

¹⁴ Mbur misi sinmijileŋ a wi vu ti sine ɗum, amma mingiɓi ngi gilawa, nga mbuŋ a sa ziza mburo.

¹⁵ Walahay muguno ti moholo, i zlili ngi mbur mugopo, amma murga ngi mizli mizleweye, i ngi zizi taŋ.

¹⁶ Migir ngi mbur mijeŋŋe, aru ti mburo ng'ar siifa, amma lum ngi misi moˀore, aru di ng'ar mungra.

¹⁷ Mbur maja ɓi ngi kuti a hirnga na, aru ng'ar siifa, amma mbur mapura mbiɗi hirnga ka ɓi ngi sefel na, a zizi.

¹⁸ Mbur maɗumo gi mesene naŋ na, i mbur miɓi mi cuw cuw, amma da a gilaka ɓi le da mburo, mbur maya ɓi nah cak cak na, i gilaw.

¹⁹ Mingiɓi mukoloŋ koloŋ na, mungra anta kic ara ta, amma mbur maji lejeŋ avu mingiɓi naŋ na, i misi wer.

²⁰ Irne ngi mbur mijeŋŋe, i ɓiri bara mipal naŋ kine, wuluk ngi mizli misi moˀoreheye, i wuluk ngi pula gir wãˀ ta.

²¹ Mingiɓi ngi mbur mijeŋŋe, a jini mizli haɗa, amma gilawaya, a sa micam ti murga wuluku.

²² Maga zlili da mburo, i ɗuwula mi ngi Bumbulvuŋ, ko bonoy anta gi gwat neˀ le nga meˀe ta.

²³ Gi malambaˀa, i dungur avu mbur gilawa, naŋ kine, sinmijileŋ avu mbur masla wala ngi ɓi kwana, naŋ kanah ya.

²⁴ Mazluwuna mbur misi moˀore, i gwat mandilawa ava, gwat mizli mijeŋŋehey mawuɗama, a sa vulaka taŋ di.

²⁵ Musuwre mucuh le kiyuw na, mbur misi moˀore naŋ anta mata! Amma mbur mijeŋŋe, a ndir deŋ ngi sete.

²⁶ Yam ngadaw a ngirizl sliŋ, yo cunju a ngis hiri, masafaya kwana, naŋ kanah avu mbur muvulaŋ slra le ya.

²⁷ Zluwun ti Bumbulvuŋ na, a ja hutuŋ subur da mburo, amma vi ngi misi moˀoreheye, a sa maka taŋ di duguleˀe.

²⁸ Njaha hiri ngi mbur mijeŋŋe, i mumul, amma njaha hiri ngi misi moˀoreheye, a sa zizi.

²⁹ Jiviɗ ngi Bumbulvuŋ i li ɗum ngi mbur mikaslsla, amma a ziza migi gwat malambaˀahaya.

³⁰ Mbur mijeŋŋe anta jijik ta ndiɗaˀa, amma misi moˀoreheye, t'anta sa paka hay taŋ a ruwuyo ta.

³¹ Mi ngi balam mbur mijeŋŋe, a yi sinmijileŋ, amma irne maɓi ɓi sloh sloh na, a sa bukokoŋ.

³² Mingiɓi ngi mbur mijeŋŋe, a gi mezleŋ, amma irne ngi misi moˀoreheye, i mingiɓi musloh sloh lambaˀ.