MIKUCUWULOY 1 - Bible en langue guiziga

¹ Mikicuwuloy, Salomoŋ mangal ngi Davit, buy Israyel miɓa taŋ.

Ɓi mutohoko ɗerewol hana hĩˀĩ vurˀe

² Ɗerewol mikicuwul misenna, naŋ hĩˀĩ ngi biga sinmijileŋ da mburu, ngi sirkaŋ, yo ngi sli wala ngi si na cifi ngi mbur,

³ ngi sirka cifi ti lesl, ɓa mbur a ndir ti gi gwat mijeŋŋe, mizlir le, yo mikaslsla,

⁴ ngi vula wer mezle da mizli manja si na ɓihey, yo ngi vula sin ati wuluk ngi sli wala ngi ɓi da ziri ziri aruŋ.

⁵ Ko mizli misi sinmijileŋhey, masa slufaka kwana, sin taŋ mijileŋ a sa ru nga mbuŋ, yo mizli misi lesleye, a sa sinaka jigina mizli.

⁶ Mizli a sa sinaka pulaˀvra ngi mikucucwl mekelemey, ɓi mumbuza ati ɓi muguno ngi mizli madubunaka sinmijileŋ da mizli na.

⁷ Zluwun ti Bumbulvuŋ na, i zli virzi ngi sinmijileŋ. Sinmijileŋ ati sirika vu na, sey mapuraka hiris le i gilaway.

Ji lesl avu ziri gawla malambaˀhay

⁸ Mangal ɗu, bunuk matukuw ˀay ngi gi gwat na, ja a hirnga, yo munuk madubunuw gwat na, ki pura ka sefel ta.

⁹ Asi naŋ kaɓa i loppol mezle mutuwaɗ tuwaɗ a hirnga ɗike, yo i virzle muluwa le denjek asi ˀay ɗike.

¹⁰ Mangal ɗu, da ziri gawla malambaˀhay ara wuɗam a sirkukuw ngi gi gwat malambaˀ na, ki ngum ta.

¹¹ A sa ɓukuw: «Sawa ati ndra, i ra pam hiri, ɓa i kiɗam mizli vagay vagay, mbur migi gwat ta kwana, i zlaka gurjik i kiɗaka lambaˀsi,

¹² i ndakaŋ suɗuk titiri, surloŋ kine, kaɓa mizli mapam sar ng'ar li ngi mizli mumucahay,

¹³ i sa lumam zlili mupuɗaw ti sukwi wal wal haɗa, i sa nahaka hay ndraˀahaya ti gwat mitiɓa ngir vurum,

¹⁴ Ki sa lum mi ngi ɗike anga ya, asi i sa paka zlili ndra jom gar ndra arleˀe.»

¹⁵ Mangal ɗu, mizli misi ka tayna, ki ram digi bummoˀ ta, kirih kileŋ avu jiviɗ taŋ masipaka.

¹⁶ Asi sar taŋ a zuɓ vulaŋ vulaŋ nga gi malambaˀa, a wusam vu kutum nga kiɗa hirnga.

¹⁷ Haˀaw, da ɗiyuwoy a puraka mbur mutuvulo le na, a tiɓaŋ ɓa a pa mazaɓ a mihiri taŋ mata.

¹⁸ Amma taŋ, taŋ mapam mazaɓ na, i ngi ji taŋ tehhe a muŋ, a gunom na, ngi ji hirnga taŋ tehhe a muŋ.

¹⁹ Naŋ kine, mbur mahul gar na, a sa gi ava kanah ya, i hul masa hulo siifa ngi mbur muhulo.

Sinmijileŋ mazil vu, yo maki mumuyuŋ ngi zay sla a slimiɗe

²⁰ Sinmijileŋ ara widi a jiviɗ madiɗahay, ara gi mi zlazlaɓ zlazlaɓ ar li ngi luumahay.

²¹ A ra zil vu ˀay kaˀ a wuzla mi muwuwwo ar mazlaka jiviɗey, ara til mi ar mizlingre ngi walahaya,,

²² a ɓi: «Gilaway, kisa ndiram ti gi gilaw kum na, hã ti vunaka? Kum misingir ar yahay na, kisa ndiram ti singir kum ar ya na, hã ti vunaka? Yo kum manja lesley, kisa ndiram ar li burɗa sine hã ti vunaka?

²³ Cinaka ya maɓukum ɗaˀ ɗaˀ le na. Ani i wuɗo pa ˀUf ɗu ng'ar kum, i bugukum mingiɓi ɗu.

²⁴ Asi i ra zilukum, amma ki ngumam ta ndiɗaˀ, i ra tulukum haŋ, amma ko mbur miki slimiɗ anta.

²⁵ Asi mi ngi kuti ɗu vur kum gar na, ki hizigaka fuk avra, yo mi ɗu ya maɓukum di ɗaˀ ɗaˀ le na, ki tiɓaka ta.

²⁶ Vurˀe, ti kum masa sam bonoy na, ya kwana, i sa singir ar kum, yo ti zluwun masa gukum na, i sa hizigukum mi ngi wuya.

²⁷ Pas mekeleme, zluwun madiɗa a sa diɗo vu kpis ar kum kaɓa burkataŋ, bonoy a sa ɗuvo dibiɗ taˀ ng'ar kum kaɓa musuure, muɗa didak ati bonoy a sa sirtukum…

²⁸ Dar kisa zilikiy, amma y'anta sa zilukum mi ta, kisa sipikiy hirdam hirdam, amma kum anta sa lumikiy ta.

²⁹ Naŋ masa gi kanah na, asi ki puraka sine hiris le, yo ki wunam di i zluwun ti Bumbulvuŋ ta.

³⁰ Asi ya mukutukum na, ki tiɓaka ta, yo mingiɓi ɗu gar na, ki puraka hiris le.

³¹ Da kine na, kisa lumaka migire ngi gwat ngi gi kumo, yo gwat mimbizeˀ ngir mevel kumo, a sa ɓulukum mi na.

³² Asi maziza misi hirnga midigizlahaya, i taŋ mangumam tiɓa sinmijileŋ ta na, yo maziza gilawaya, i taŋ mawulkam neˀ ta na.

³³ Amma mbur maciniy mi na, a ndir setette, zuy zuy, naŋ anta zluwun ti hiryi ta.»