Matiye 8 - Bible en langue guiziga

Yesu miɗiya mbur misi kukula

¹ Ti Yesu mapo sar baɗ ti muwã na, zigiduw haɗi ara sipakaŋ.

² Joˀ mbur misi kukula a girdoˀo ng'avaŋ, a ɓaŋ: «Buy, da ki ngum le na, ki ɗiyiy gu.»

³ Yesu a tila haŋ, a wusaŋ, a ɓaŋ: «Yi ngum le, ɗiyi!» Angi nah vuna si na, kukula a muɗ mi ava, a ɗiyi.

⁴ Dar Yesu a ɓaŋ: «Cin, ko ki ɓa ɓi nah da mbur ta. Amma ara biga vu ɗik da masay, yo ɓa ki vula gwat ngi gi mikuli a mbuŋ Buymisemuŋ ka Moyis miɓa, ɓa a sinaka ki ɗiy le.»

Yesu miɗiya gawla ngi madiɗa ngi soje ngi romahay

⁵ Ti Yesu maci ng'ar walahay Kapernahum na, madiɗa ngi sojehey a kiroho ng'avaŋ, a tumbuloŋ,

⁶ a ɓaŋ: «Buy, gawla ɗu ada, a huluɓ le hilaɓ hilaɓ ɓaˀ a hay, ara si bonoy haɗi teˀe.»

⁷ Yesu a ɓaŋ: «I sara ɗiyaŋ.»

⁸ Amma madiɗa ngi sojehey a mbiɗaŋ di: «Buy, yi ndila ter ɓa ki ci nga viŋ ɗu ta. Ɓi ɗaˀ purla tewle si na, gawla ɗu a sa ɗiyi si.

⁹ Asi ya vuna kwana, miwi ɗu ada, sojehey ya miwa taŋ kwana, ada ya. Yi ɓa numuŋ le: ‹A ru› na, a ru. Yi ɓa mekeleme le: ‹Sawa› na, a sawa. Yi ɓa beke ɗu le: ‹Ga gwat ani› na, a gaŋ.»

¹⁰ Yesu micina kanah na, a hĩyãŋ teˀe, a ɓa mizli misipi naŋhaya: «Gisiŋ, yi ɓukum na: angi hirwuy Israyel gar na, yi lum mbur misi tiɓi kahana ɗaˀ ta.

¹¹ Yi ɓukum ma na: mizli haɗi a sa soko tisi pas ngi miprik waɗ tisi pas ngi pastaˀa, a sa cifam ngi zuma ɗaf ngi muguzlum ati Abraham, Izak waɗ Zakop ar Zumabuy ngi muŋ.

¹² Amma mizli masa zumam buy naŋ zleˀe na, a sa hizigaka taŋ ng'ar luvuŋ avra, a sa tuwam, a sa ngirɗam sliŋ a diga.»

¹³ A dirba nah, Yesu a ɓa madiɗa ngi sojehey tuwa: «Mi ngi hay, anja a gi kaɓa ka mitiɓi vuna si.» Gawla naŋ kwana, a ɗiyi hirak ti nah vuna si.

Yesu mumbul misi jijihey haɗi

¹⁴ Ti Yesu mici ngi hay Simoŋ Piyer na, a luuma milar ngi Piyere naŋ guta, a ro tup, vu culok ava.

¹⁵ Dar Yesu a wusaŋ avu haŋ, vu a tislaŋ, a slikiɗ, a gaŋ gwat ngi zum.

¹⁶ Ngi pastaˀ naŋ na, a sakaŋ ti mizli haɗi misi setenehey a hirnga. Yesu a ɓula seteneheye ti mingiɓi ɗaˀ purla si, a mbulo misi jijiheye cek.

¹⁷ A gi kahana, ɓa ɓi mijiviɗ Ezayi miɓa zleˀe na, a gi muduba, asi a ɓi zleˀe: «I naŋ mitiɓa hĩhĩy ndraˀahaya, i naŋ muɗupa jiji ndraˀahaya nga hirnga naŋ.»

Mizli mawuɗam ru asi Yesu

¹⁸ Ti Yesu mupura zigiduw haɗi gun hirnga naŋ na, a ɓi ɓa a tuwuɗam ti dubazaw vay diga.

¹⁹ Buy ngi ɓimujuwa a kiroho ng'avaŋ, a ɓaŋ: «Kumani, ar li ka masa ru gar na, yi sa ru asi ka.»

²⁰ Yesu a mbiɗaŋ di: «Bigaɗaya, taŋ ti vigiɗ taŋhay, ɗiyuw ngi ɓuhoy kwana, taŋ ti hay taŋhay, amma ya Mangal ngi mburo, ko li ki hirnga kwana, anta.»

²¹ Mbur mekelem purla a wuzla mizli ngi seˀehey a ɓaŋ: «Buy, inga puliy, i ra dika baha ɗagay.»

²² Amma Yesu a ɓaŋ: «Sipiy, pula mumucahay a dikaka mumuca taŋhaya.»

Yesu ɓi micica burkataŋ

²³ Yesu a ci palalam, mizli ngi seˀehey kwana, a cam aseˀe ya.

²⁴ Pura ɗi, burkataŋ gambara a zla gi angi yama. Yam a juruf hã a wuɗ a nda palalama wãˀ, amma Yesu a ro hinje gwaɗ naŋ.

²⁵ Mizli ngi seˀehey a kirohoko ng'ava, a puɗukakaŋ, dar a ɓakaŋ: «Aw Buy, laha ndra, ani i ra zizam!»

²⁶ Yesu a ɓa taŋ: «Ki zluwunam vur mike? Kum mizli misi tiɓi keɗeccehey.» Dar a slikiɗ deŋ, a buca burkataŋ ati yama, li a cici kiŋ.

²⁷ A dirba nah na, mizli a cifam siriw, a ɓam: «I mbur wana hana ma ska? Ɓa ko burkataŋ ati yam a cinakaŋ mi na!»

Yesu miɗiya mizli cuw misi setenehey a hirnga

²⁸ Ti Yesu mindil a dubazaw angi hirwuy ngi Gadarenehey na, mizli cuw misi setenehey a hirnga a boko tir zivihey, a so jam di hirnga. Taŋ himaˀ teˀe, ko mbur macuh gu tir jiviɗ nah anta.

²⁹ Joˀ a zlaka a wudam: «Ki wuɗ mi avu ndra ka, Mangal ngi Buymisemuŋ? Ki so aka ngi ga ndra bonoy daf manja hin naŋ a ndilo si kwa?»

³⁰ Zar neˀ na, fedemey ada haɗi taˀ gezleŋ, ara zumam.

³¹ Setenehey tuwa a tumbuloko Yesu, a ɓakaŋ: «Da ki ra ɓula ndra na, slina ndra nga hirnga fedem mitaˀ gezleŋ ngi diga na.»

³² Yesu a ɓa taŋ: «A ram so!» Setenehey a bam, ara cam a hirnga fedemey tuwa. A haŋhaŋ si na, fedem mitaˀ gezleŋ tuwa cek a ndilam ti ay didike ng'ar yam, a micam araŋ.

³³ Mijigina fedemey a kilam ti labara nah ng'ar walahay, a slufaka ɓi nah gar waɗ ɓi ngi mizli misi setenehey a hirnga tuwa.

³⁴ Dar mizli ngir walahay gar a boko, ara zliram ti Yesu. Ti taŋ mupuraka si na, a tumbulokoŋ, ɓa a cuh, a pula hirwuy taŋ.