Matiye 12 - Bible en langue guiziga

Yesu i buy ngi Sabat

¹ Ti di numuŋ ada, tapas sabat na, Yesu ara cuh ti wuzla guva ngi alkamari. May ara ja mizli ngi seˀeheye, a zlaka a ngurom daw tuwa, a humbuɗaka.

² Farisahay mupuraka na, a ɓaka Yesu: «Pura ayɗi, gwat mitika le ngi gi tapas sabat ma na, mizli ngi si kahay a gaka mbri mbri maka?»

³ Yesu a mbiɗa taŋ di: «Davit ati mizli misi ati naŋhaya, gwat naŋ miga ti may mija taŋ na, ki slufaka ɓi nah ɗaˀ ta kwa mbrike?

⁴ A ci ng'ar hay ngi Bumbulvuŋ, a zumaka ɗaf muvula le da Buymisemuŋ ar hay naŋ. I gwat mitika le zleˀe, ɓa naŋ malla mizli misi ati naŋhay a zumaka ta, sey masayay mazumaka tewle ngbaŋ.

⁵ Yo ar ɓimujuwa, masayay a gam slra tapas sabat ar hay ngi Bumbulvuŋ, manja a jaka ɓi ngi sabata, ko a zluɓam di i ɓi ta na, ki slufaka ɓi nah ɗaˀ takwa?

⁶ Na, yi ɓukum na: mufuna hay ngi Bumbulvuŋ vuna ada aka.

⁷ Bumbulvuŋ miɓi: ‹Yi wuɗ di i pura ircece ati wuɗavu, mbak gi mikuli a mbuŋ Buymisemuŋ ti gineweye le› na, da ki cinaka mbiɗeˀvra nah le na, mizli muzluɓam ɓi ta tayna, anja ki gaka taŋ kiita ta.

⁸ Asi Mangal ngi mburo, i buy ngi sabat.»

Mbur misi haŋ mumuca

⁹ Dar Yesu a cuh baɗ tir li nah, ara ci ar hay ngi dira dibiɗ taŋ.

¹⁰ Mbur ada akẽh, haŋ i mumuca. Mizli a wuɗam ɓa a kupaka ɓi da Yesu. Vurˀe, a cufuɗakaŋ: «Jiviɗ ada ngi mbulo mbur tapas sabata kwa?»

¹¹ Amma Yesu a mbiɗa taŋ di: «Da mbur a wuzla kumo naŋ da ti tumuŋ pal, da tumuŋ naŋ nah a diɗ le ng'ar vigiɗ tapas sabat na, ara zuɓo di, a bo di ta kwa?

¹² Na, mbur titra a funa tumuŋ le haɗa wãˀ! Da kine na, jiviɗ ada ngi gimezle tapas sabata.»

¹³ Dar Yesu a ɓa mbur tuwa: «Murɗo haŋ.» Mbur a murɗo haŋ, a ɗiyi le kuy kuy kaɓa vay numuŋ ma.

¹⁴ Farisahay mubam na, a kusom ngi ngila wuy ar Yesu ɓa ngi luuma wer ngi kiɗ naŋ vagay.

Yesu i gawla miteŋteŋ ngi Buymisemuŋ muwunaŋ

¹⁵ Ti Yesu micina ɓi nah na, a cuh baɗ ti kẽh. Mizli haɗi a sipakaŋ, a mbulo taŋ cek.

¹⁶ Amma Yesu a kuta taŋ haɗi ɓa a njikakaŋ ta,

¹⁷ ɓa ɓi ngi mijiviɗ Ezayi miɓa zleˀe na, a gi muduba, a ɓi na:

¹⁸ «Gawla ɗu ya muwuna, n'anihĩ, i gawla ɗu miteŋteŋ ya hĩhĩy ɓa i wunaŋ. Yisa slino ˀUf ɗu ar naŋ. Ɓimujuwa mitaˀ gara, a sa til di mi da sukwi ngi mizli gar.

¹⁹ N'anta sa wuɗ mi ta, naŋ anta sa widi lambaˀ ta. Anta sa cinam ay naŋ a jiviɗ madiɗahay ta.

²⁰ Nguf mawuɗo ngil na, naŋ anta sa ngila wãˀ ta. Lampe mumbuˀ mbuˀ kwana, naŋ anta sa muca wãˀ ta, hã ɓimujuwa mitaˀ gara, a cifi ti bugawla a hirnga zigiduw gar.

²¹ Sukwi ngi mizli gar a sa ɗuvaka wuluk taŋ taˀ angaŋ.»

Yesu muɓula setenehey

²² A dirba nah na, a soko ti mbur misi setene ng'avi Yesu, i dangar, yo a ɓi gu ta ma. Dar Yesu a ɗiya mbur tuwa hã a ɓi, a pur.

²³ Ɓi nah a zuma hirnga le da zigiduw gar, a ɓam: «Hana i Mangal ngi Davit takwa?»

²⁴ Amma Farisahay micinaka ɓi nah na, a ɓam: «Mbur hana a ɓula seteneheye ti gidaŋ ngi Beˀelzebul, buy ngi setenehey tewle.»

²⁵ Yesu a si na wuluk taŋ le, a ɓa taŋ: «Buy mazumaka a ruwuy gar, da mizli naŋhay a wunkamˀay le tehhe ar wala taŋ a muŋ na, naɓa a sa hiryi. Ko walahay, ko hay ngi mbur, da mizli ngi raˀahay, a wunkamˀay le tehhe ar wala taŋ a muŋ na, naɓa anta sa cici ta.

²⁶ Yo da Satan a ɓul Satan na, naɓa a wunuk'ay le tehhe ati vu naŋ a muŋ. Na, Zumabuy naŋ a sa cici mbri mbri maka?

²⁷ Ki waka kaɓa yi ɓula seteneheye ti gidaŋ ngi Beˀelzebul. Yo na mizli ngi si kumoy a ɓulaka taŋ ti gidaŋ ngi wa ma ska? I mizli ngi si kumoy tehhe a muŋ masa bugukum di, ki zluɓaka le.

²⁸ Amma da ya maɓula seteneheye ti ˀUf ngi Buymisemuŋ na, kite Zumabuy ngi muŋ a ndilo kum le si.

²⁹ Yo ma na, mbur migidaŋ na, mbur a ci ngi haya, a hulo zlili naŋ gu ta, sey da a juwaŋ le dumbuŋ far. Dar a sa huloŋ gwatay a haya gar.

³⁰ Mbur misi naŋ anta ti ya ta na, naɓa ɓi naŋ ada ati ya. Mbur majiniy ngi kuso hirnga ngi gwatay ta na, naɓa ara zliɗa hirnga taŋ lambaˀ.

³¹ «Vurˀe, yi ɓukum na: mungra wanaka gar mizli magaka, taŋ mazaka Buymisemuŋ gar na, a sa puya taŋ ɓi nah avra. Amma mbur maza ˀUf Mipal na, anta sa puyakaŋ ɓi nah avra ta wãˀ.

³² Da mbur ara ɓi ɓi malambaˀ ar Mangal ngi mburo na, a sa puyakaŋ ɓi nah avra. Amma da ara ɓi ɓi malambaˀ a hirnga ˀUf Mipal na, ko a ruwuy aka, ko a muŋ kwana, anta sa puyakaŋ ɓi nah avra ta.

Widis ati yi naŋ

³³ «Da widise naŋ kuy kuy na, naɓa yi naŋ i mezle ya. Da widise naŋ uy kuy ta na, naɓa yi naŋ kwana, i malambaˀ aya. A sinaka widis avu yi naŋ.

³⁴ Kum sukwi ngi kwecesley, kum mizli malambaˀhay ma na, ki ɓam ɓi mezle gu mbri mbrike? Asi mingiɓi a bo tir wuluk minaha mevele le.

³⁵ Mbur mezle a bo ti gwat mezle tir mevele mezle, mbur malambaˀ kwana, a bo ti gwat malambaˀ tir mevele malambaˀ aya.

³⁶ Yi ɓukum na: tapas gi kiita na, ɓi malambaˀ mizli miɓaka le gar zleˀe na, a sa slufakaŋ.

³⁷ Naŋ kine, a sa gukuw kiita weˀe avu mingiɓi ɗik: da kiita a sa juw ta na, avu mingiɓi ɗik, yo da kiita a sa juw le kwana, avu mingiɓi ɗik aya.»

Mizli a cufuɗam Cekene

³⁸ Akẽh na, mizli mekelemey a wuzla buy ngi ɓimujuwahay ati Farisahay a ɓaka Yesu: «Kumani, i wuɗam anja ki ga ndra cekene ɓa i puraka ta kwa?»

³⁹ Yesu a mbiɗa taŋ di: «Mizli malambaˀ migwenehey, migi madamahay! Ki wuɗam ɓa yi gukum cekene, amma ko cekene mekelem kum masa lumam anta, sey ngi mijiviɗ Zonas na si.

⁴⁰ Asi Zonasa, a vi hiipas hiipas makir ati duvuɗ duvuɗ makir a kwacay kilif madiɗa. Mangal ngi mburo kwana, a sa vi hiipas hiipas makir ati duvuɗ duvuɗ makir a hur hirwuy aya.

⁴¹ Tapas gi kiita na, mizli Ninivey a sa slikiɗam ati mizli migweneheye, a sa jaka taŋ ti kiita. Asi ti taŋ micinaka ɓi mijiviɗ Zonas mitil di mi na, a mbiɗaka mevele le. Na, ɓi madiɗa mifineˀ ngi Zonas ada aka!

⁴² Tapas gi kiita na, ngwas mazum buy angi hirwuy Saba a sa slikiɗ ati mizli migweneheye, a sa ja taŋ ti kiita. Vur a so ti ngi hirwuy mikileŋ, ɓa a cine mingiɓi Salomoŋ maɓa ti sinmijileŋ. Na, ɓi madiɗa mifineˀ ngi Salomoŋ vuna ada aka!

Setene mahiryi vu mibi le masa mawa a muŋ

⁴³ «Da setene mahiryi mbur a bi le ti vu mburo na, aru ti liˀi ar li mikirɗak kirɗak, ɓa a lum li muska vu. Da a lum ta na,

⁴⁴ a sa zla a ɓi: I sa mi ng'ar hay ɗu ya mupulo di na a muŋ. Naŋ mimi le na, ara luuma njoŋ kine, i mufuca le, i miɗiya le kuy kuy.

⁴⁵ Joˀ a ru, ara zilo setene mekelemey tarnaˀ mufunakaŋ ti malambaˀ ma, a soko, a cam a hur mbur tuwa, a cifam. Yo kpak ngi mbur nah na, a tiri malambaˀ le fineˀ joˀ naŋ misi zleˀe. A sa gi ti mizli malambaˀ migweneheye kanah ya.»

Sukum ngi Yesuhoy ati mumuŋ naŋ

⁴⁶ Ti Yesu mira ɓa ɓi da zigiduw aruŋ na, mumuŋ naŋ ati sukum naŋhay a ndiloko, taŋ dedeŋ avra, a wuɗam ɓa a ɓakaŋ.

⁴⁷ Mbur mekelem a ɓa Yesu: «Ti munuk ati sukum ɗikeye, t'ani dedeŋ avra, a wuɗam ɓa a ɓukuw.»

⁴⁸ Yesu a mbiɗa da mbur miɓaŋ tuwa: «Maha i waka? Sukum ɗuwoy i waniy ka?»

⁴⁹ Joˀ a ska haŋ ng'avi mizli ngi seˀehey, a ɓi: «Puraka, maha ati sukum ɗuwoyo, t'ani.

⁵⁰ Asi ko wa gar magi gwat Baha misi a muŋ mawuɗ na, naŋ i sukum ɗu mizile ati mongoso, yo i maha ma gar.»