Matiye 11 - Bible en langue guiziga

¹ Ti Yesu mikiɗa mi ngi ɓa ɓi hana da mizli ngi seˀe mukuruˀ nga cuwoyo na, a cuh ti kẽh nga dubuna gwat da mizli waɗ nga tila taŋ mi ti Ɓimezle ar walahay taŋhay.

Zaŋ mislin ng'avi Yesu

² Ti Zaŋ misi ar dangay na, a cine ɓi ngi gwat Kristu maga taŋ na le. Dar a slina mizli ngi seˀeheye, ɓa ara cufuɗakaŋ:

³ «Ka ki ‹mbur masa sawa› na kwa, malla sey i kutukom mbur mekelem kwa mbrike?»

⁴ Yesu a mbiɗa taŋ di: «Ɓi kum micinaka ati gwat kum mupuraka na, ara ɓaka da Zaŋ:

⁵ Dangaray ara puram, jegwerey ara ram, misi kukulahay a ɗiyam le, midigizlahay ara cinam, mumucahay ara slikiɗam, yo ara tilam mi ti Ɓimezle da misi murgahaya.

⁶ Mbur masipiy manja sar a baŋ na, naŋ ar mumul!»

⁷ Hirak ti mizli ngi si Zaŋhay macohom le na, Yesu a zla a ɓa ɓi ngi Zaŋ da zigiduw: «Ki ram nga pura mi a wuzlaɓuh ka? Lavaɗ himiɗ mawusa na kwa?

⁸ Na, ki ram nga pura mi ska? Mbur miki zana hirngahay kwa? Amma miki zana hirngahaya, taŋ a hay buy madiɗahay.

⁹ Na, ki ram nga pura mi ska? Mijiviɗ kwa? Kanah gisiŋ, yi ɓukum na, a funa mijiviɗe le ma jaka.

¹⁰ Zaŋ vuna i mbur ɓimutohoko miɓi vurˀe: «Ani i ra slina mislin ɗu a mbuŋ ɗike, a sa ɗiya jiviɗ a mbuŋ ɗike.»

¹¹ Gisiŋ, yi ɓukum na: a wuzla mizli titrahay gar na, Zaŋ mici mizli ar yama, mufunaŋ anta. Amma mbur ngi dirba wãˀ ar Zumabuy ngi muŋ, a funaŋ le.

¹² Zle avu Zaŋ mici mizli ar yam mitil mi ti Ɓimezle, hã a ndilo wurenna na, mizli ara kiɗam vu ti gidaŋ ati Zumabuy ngi muŋ, yo i mizli misi gidaŋhay matiɓakaŋ.

¹³ Mijiviɗey gar ati Ɓimujuwa a tilam mi le ti ɓi ngi Zumabuyo, hã a ndilo avu Zaŋ.

¹⁴ Da ki wuɗam sla wala ngi ɓi nah le na, Eli masa mawa na, i Zaŋ vuna.

¹⁵ Mbur misi ti slimiɗ na, anja a cin!

¹⁶ Mizli migwenehey na, yi sa wa taŋ ti waka? A bam vu ati ziri mujoˀar li ngi luuma matilam mi da ziri mekelemey:

¹⁷ ‹I fukum bozloro ngi ɓuruk, ki ɓurgam ta! I zlukum dimis ngi vagay, na ki tuwam ta ma!›

¹⁸ Zaŋ a sawa, anta zum gwat ta, anta si gwat ta. Joˀ mizli a ɓam: ‹Setene ada a hirnga!›

¹⁹ A dirba nah, Mangal ngi mbur a sawa, ara zum, ara si. Joˀ mizli a ɓam: ‹Puraka ayɗi! mbur misenna a zum haɗa, a wi ti mbaazla haɗa! Ingama ngi micikila buutuhoy, ngi migi gwat malambaˀhay ma!› Amma mizli a sinaka sinmijileŋ ngi Buymisemuŋ naŋ jeŋŋe na, avu slra naŋhay.»

Walahayay mungumam tiɓa Yesu ta

²⁰ Mizli ngir walahay madiɗahay, Yesu miga vendeke ngi cekenehey anga anga na, a mbiɗaka mevel taŋ ta. Yesu a buca taŋ aseˀeŋ, a ɓa taŋ:

²¹ «Kum Koraziney, kay, kum ar bonoy! Kum Betsaydahay, kay, kum ar bonoy! Asi cekenehey ya miga taŋ a hay kum na, da yi ga taŋ zleˀe a Tir ati Sidoŋ na, anja mizli ngi raˀahay a kam zana ngi vagay le, a putukulom le ar fucu, ɓa a bigaka a mbiɗaka mevel taŋ le.

²² Amma yi ɓukum na: tapas gi kiita na, a sa gukum di da kumo fineˀ ngi mizli ngi ruwuy Tir ati Sidoŋ.

²³ Na, kum Kapernahumoy, ki waka na, kisa gilam sesẽŋ a dadala muŋ kwa mbrike? Ki sa mam nga ruwuy, sesẽŋ ar li ngi mizli mumucahay jaka! Asi cekenehey ya miga taŋ a hay kum na, da yi ga taŋ zleˀe a Sodom na, anja walahay nah naŋ da hã dana aruŋ!

²⁴ Amma yi ɓukum na: tapas gi kiita na, a sa gukum di da kumo fineˀ ngi mizli ngi Sodomoyo.»

Soko ng'avi ya ɓa ki muskam vu

²⁵ Ti di nah na, Yesu a zla a ɓi: «Aw Baha, Buy ngi muŋ ati hirwuy! I ra hunumuw, asi ɓi ka muɗumo avu mizli misi sinmijileŋhey ati misi lesley na, ki njika le da mizli mizleweye.

²⁶ Haˀaw Baha, ki hĩyã le ɓa a gi kahana.

²⁷ Baha a vuliy gwataya le gar. Mbur masina Mangal anta, sey Cine. Mbur masina Cine kwana anta, sey Mangal ati mbur naŋ muwuɗ le ɓa a bigaŋ di.

²⁸ «Kum gar migiram le wãˀ ti jijir mududok dudokoy, soko ng'avi ya, yi sa vulukum muska vu.

²⁹ Juwaka galalaŋ ɗu avu ˀay, dubunam gwat avu ya, vur yi mbur miteˀteˀ, mihina hirnga a mevele, kisa muskam vu gisiŋ.

³⁰ Asi galalaŋ ɗu a jijir tuwaˀ ta, gwat ɗu ngi jijire kwana, naŋ kefeke.»