Ɓimezle ngi Yesu Kristu LUK mitil di mi 22 - Bible en langue guiziga

Mizli migam gidiɓi ar Yesu

¹ Muguzlum mazumam di ɗaf manja is ara mazilaka muguzlum Pak na, naŋ gweˀe.

² Masay madiɗahay ati buy ngi ɓimujuwahay a puram jiviɗ ɓa a zizaka Yesu, amma ara zluwunam ti mizli.

Yudas muwuɗ vula Yesu da masay madiɗahay ɓa a jakaŋ

³ Dar Satan a ci a hur Yudas mazilaka Iskariyoto, naŋ i mbur ngi wuzla mizli ngi si Yesu mukuruˀ nga cuwoy na.

⁴ Joˀ ara luuma masay madiɗahay ati buy ngi mijigina hay ngi Bumbulvuŋhoyo, ɓa a ngilam wuy ar wer ngi vula taŋ Yesu, ɓa a jakaŋ.

⁵ Taŋ a mumulom haɗi teˀe, a ɓakaŋ ɓa a sa vulakaŋ dala.

⁶ Yudas a ngum le, a pur jiviɗ mutuwaˀ ta, ɓa ngi vula taŋ Yesu manja mizli a sinakaŋ.

Yesu miɓi ɓa a ɗiyam gwatay ngi zuma ɗaf ngi muguzlum Pak

⁷ Hin mazumam di ɗaf manja is a ndilo le, ɓa a kiɗaka tumuŋ ngi muguzlum Paka.

⁸ Joˀ Yesu a slina Piyer ati Zaŋ, a ɓa taŋ: «A ra ɗiyam ndra gwat ngi muguzlum Paka, ɓa i sa zumakaŋ.»

⁹ A cufuɗakaŋ: «Ki wuɗ ɓa i ra ɗiyaka a maka?»

¹⁰ A mbiɗa taŋ di: «Ti kum masa cam ng'ar walahay na, kisa zliram ti mbur maru ti yam ti kukulum. Sipaka sesẽŋ angi hay naŋ masa ci anga na.

¹¹ Ki sa ɓaka buy ngi haya na: ‹Kumani a ɓi na: Viŋ, ya masa zuma ɗaf ngi muguzlum Pak anga ati mizli ngi si yahay na, naŋ a maka?›

¹² Naŋ a sa bugukum hay mijirngasl a hirnga cala mikiɓiŋ kiɓiŋ, miɗiya le kuy kuy. Ki sa ɗiyaka gwatay a diga so.»

¹³ Taŋ a ram, a lumaka gwataya gar kaɓa Yesu miɓa taŋ di, a ɗiyaka gwat ngi zuma ɗaf ngi muguzlum Paka.

Ɗaf ngi Buy Yesu muvula

¹⁴ Yo ti pas ngi zuma gwat migi na, Yesu ati mislin naŋhay a cifam le jojoˀ ɓa a zumam gwat.

¹⁵ Dar a ɓa taŋ: «Yi wuɗ zuma ɗaf ngi muguzlum Pak hana le haɗi teˀ ati kumo dumbuŋ angi ya masa si bonoyo.

¹⁶ Yi ɓukum di gisiŋ: y'anta sa zum mata wãˀ, hã tapas Buymisemuŋ masa vula angi Zumabuy naŋ.»

¹⁷ Dar a zuɓa sikiɗ misi ti mbaazla, a ga sise da Buymisemuŋ, a dirba nah, a ɓi: «Ani, tiɓaka, saka gar kumo.

¹⁸ Asi yi ɓukum na: Zle dana, y'anta sa si yam ngi yi ngi gudubuno mata, hã Zumabuy ngi Buymisemuŋ misa so le.»

¹⁹ Joˀ a zuɓa ɗaf, a ga sise da Bumbulvuŋ, a dirba nah, a ngilaŋ, a vula taŋ di, a ɓi: «Hana i dumvu ɗu muvula vur kum. Gaka kahana ti wuluk ar ya.»

²⁰ A dirba ɗafa, a zuɓa sikiɗ misi ti mbaazla araŋ, a vula taŋ di kanah ma, a ɓi: «Mbaazla hana, i jumoˀay nawaya ar pumbus ɗu mipi vur kum.

²¹ Amma puraka, mbur masa vuliy da mizli ɓa a jikiy na, ara zum ɗaf ati ya aka!

²² Mangal ngi mburo, a sa cuh kaɓa muɗuvaka ɓi naŋ zleˀe ɓula, amma mbur mavulaŋ ɓa a jakaŋ na, kay, naŋ ar bonoy!»

²³ Dar misliney a cufuɗam vu ar wala taŋ: «Mbur masa ga gwat kahana asi ndra, i waka?»

Madiɗa mifineˀ mizli mekelemey i waka?

²⁴ Yo mizli ngi si Yesuhoy ara tiram ar wala taŋ, zliv madiɗa mifineˀ taŋ, i waka?

²⁵ Dar Yesu a ɓa taŋ: «Sukwi ngi mizli gar, buy madiɗa taŋhay ara waka taŋ, yo mizli madiɗa taŋhay a wuɗam anja a zilaka taŋ mizli mezlehey.

²⁶ Amma a wuzla kumo, kanah ta. Mbur madiɗa a wuzla kumo, sey a tiri kaɓa meciɗek kum. Yo mbur mawi mizli kwana, anja a tiri ka gawla ngi mbur.

²⁷ Naŋ kine, mbur mujoˀ mazum gwat waɗ mbur masaŋ di na, madiɗa asi taŋ, i waka? I mbur mujoˀ mazum ti zum na takwa? Amma ya a wuzla kumo kaɓa gawla ngi mbur.

²⁸ Kumo, ki cicam le zlak ati ya ar bonoy ɗuwoyo.

²⁹ Yo ya i ra ɗiya li Zumabuy vur kumo kaɓa Baha miɗiyiy di da ya na ya.

³⁰ Naŋ kine, kisa zumam gwat, kisa sam gwat ar Zumabuy ɗu, yo kisa cifam ar janga ngi buyoy ɓa ngi ga kiita da sukwi ngi Israyeley mitaˀ taˀ kuruˀ nga cuw na.»

Yesu miɓa ɓi ngi Piyer masa ɓi, a sinaŋ ta

³¹ Buy Yesu a ɓi: «Simoŋ, Simoŋ! Satan a cufuɗ le ɓa a kufukum kaɓa makufam daw.

³² Amma ya, yi dir dibiɗ le vur ka ɓa tiɓi ɗik, a susuyum ta. Amma ka, ti ka misa mo le ng'avi ya na, vula gidaŋ da sukum ɗikeye.»

³³ Piyer a ɓaŋ: «Buy, ko ar dangay, ko ar muc kwana, yi juw vu le ɓa i ram cuwa.»

³⁴ Yesu a ɓaŋ: «Piyer, i ɓuw na, ɓa hã kucukur a sa ji ˀay na, naɓa ki ɓi le, ki siniy ta, ki siniy ta, ˀis makir si.»

Birtete, gabal waɗ maslalam

³⁵ Yo Yesu a ɓa taŋ: «Ti ya mislinukum manja birtete, manja gabal, yo manja tarak a sar na, gwat a kicukum le kwa?» A mbiɗakaŋ di: «Ko gwat mikica ndr'anta.»

³⁶ Dar a ɓa taŋ: «Amma wurenna so na, mbur misi ti birtete, anja aru di a haŋ, mbur misi ti gabal ngi jiɗeˀ kwana, kanah ya. Yo mbur manja maslalam na, anja a hiɗika godo naŋ avra ɓa a hiɗik pal.

³⁷ Asi yi ɓukum na: Ɓimutoho miɓi: ‹A slufakaŋ le a wuzla mizli mufuyovuhoy› na, anja a gi wãˀ ar ya. Naŋ kine, ɓi mutohoko vur ya na, a sa gi muduba.»

³⁸ Mizli ngi seˀehey a mbiɗakaŋ di: «Buy, maslalamay ani cuw.» A mbiɗa taŋ di: «Muk so.»

Yesu midir dibiɗ a muwã Tutumbur

³⁹ Dar Yesu a bi, aru nga muwã Tutumbur kaɓa naŋ maga hõyyõ. Mizli ngi seˀehey kwana, a sipakaŋ.

⁴⁰ Ti taŋ mindilam ar li nah na, a ɓa taŋ: «Diram dibiɗ ɓa ki ndilam ar tikin ta.»

⁴¹ Dar a kirih baˀ neˀ avu taŋ, zliv a gi ɗugur fuk gu. A huruk huruk a ruwuy, a dir dibiɗ.

⁴² A ɓi: «Baha, da ki ngum na, kiraha sikiɗ ngi bonoy hana kileŋ avu ya. Amma anja a gi ka ya muwuɗ ta ɓula, sey kaɓa ka mawuɗo.»

⁴³ Dar modro ngi Buymisemuŋ a so paɗ a muŋ ɓa a vulaŋ gidaŋ.

⁴⁴ Didak a muɗaŋ haɗi, a dir dibiɗ ti gidaŋ fineˀ misi zleˀe. Lihriɓ naŋ a tiri kaɓa pumbus miji le, magic nga ruwuy.

⁴⁵ A dirba naŋ midir dibiɗe, a slikiɗi, a mo ng'avi mizli ngi seˀehey tuwa ma. A luuma taŋ, a hinjam le, asi ara likam haɗa.

⁴⁶ A ɓa taŋ: «Ki hinjam mike? Slikiɗam, diram dibiɗ, ɓa ki ndilam ar tikin ta.»

Mijaka Yesu

⁴⁷ Ti Yesu mira ɓi aruŋ na, zigiduw a ndilawa. I Yudas, mbur ngi wuzla mizli ngi seˀe mukuruˀ nga cuwoy vuna tehhe muko taŋ mbuŋ. A kiroho ng'avu Yesu, ɓa a jaŋ kuɓuy.

⁴⁸ Amma Yesu a ɓaŋ: «Ki ja Mangal ngi mburo kuɓuy ɓa ki vulaŋ da mizli, ɓa a jakaŋ sukwa Yudas?»

⁴⁹ Mizli misi ati Yesuhoy, mugun hirnga naŋ, mupuraka gwat mawuɗ a gi kanah na, a ɓakaŋ: «Buy, i ngumaka taŋ ti maslalam kwa?»

⁵⁰ Mbur pal asi taŋ a nguma gawla ngi masay madiɗa migi mikuli a mbuŋ Buymisemuŋ, a bukoŋ slimiɗ vay hazumo krac avra.

⁵¹ Amma Yesu a ɓa taŋ: «Pulaka, muk si.» Joˀ a wusa slimiɗ ngi mbur tuwa, a kufaŋ di ngbaˀ ar li naŋ a muŋ.

⁵² Mizli musoko nga ji naŋ tapasa na, i masay madiɗahay ati madiɗa ngi mijigina hay ngi Bumbulvuŋhoy waɗ mizli micawwahay. Yesu a ɓa taŋ: «Ki soko nga ji ɗu ti maslalamay ati gandayay kaw kaw a haŋ ka yi mufuyovu mbrike?

⁵³ Vur hin gar na, y'ada ati kum ar hay ngi Bumbulvuŋ a Zeruzaleme, ko ki jikiy ta. Amma wurenna, pas kum a gi le, i gidaŋ ngir luvuŋ muduba.»

Piyer miɓi a si na Yesu ta

⁵⁴ Dar a jaka Yesu, a ram di ngi hay masay madiɗa. Piyer ara sipa kileŋ neˀ.

⁵⁵ Mizli a bulam vu le a wazlaraya, ara naˀakaŋ. Piyer a cifi le a wuzla taŋ ya.

⁵⁶ Zuŋ diili migi slra ngi hay a pura Piyer muaciki vu tuwa cum cum, dar a ɓi: «Mbur hana, naŋ zleˀe ati Yesu vuna ya!»

⁵⁷ Amma Piyer a ji mi, a ɓi: «Ngwasa, yi si na mbur nah ta.»

⁵⁸ Neˀ a dirba nah ma na, mbur mekelem a puraŋ, a ɓaŋ: «Ka kwana, ki ngi wuzla taŋ aya!» Amma Piyer a mbiɗaŋ di: «Ĩˀĩ, y'anta a wuzla taŋ ta.»

⁵⁹ Gwat ngi ler pal a dirba nah ma na, mbur mekelem a hurdum di, a ɓi: «Ko mbri na, mbur hana, naŋ zleˀe ati naŋ, asi i mbur Galile.»

⁶⁰ Amma Piyer a mbiɗaŋ di: «Way ɗu, da ki wuɗ ki ɓi mbrike na, yi si na ta.» Hirak ti naŋ mira ɓi aruŋ vuna si na, kucukur a ji ˀay.

⁶¹ Buy Yesu a mbuɗo hiri, a pura Piyer tuwa cum cum. Piyer a wuluk keŋ ar ɓi ngi Buy Yesu miɓaŋ di zleˀe tuwa: «Ɓa hã kucukur a sa ji ˀay dana tikeˀe na, naɓa ki ɓi le, ki siniy ta, ki siniy ta, is makir si.»

⁶² Dar Piyer a bi ng'avra, a tuwuy ˀirslik ˀirslik.

A zaka Yesu, a kiɗakaŋ

⁶³ Mizli majiginaka Yesu, a zlaka a singiram anga, a kiɗakaŋ, haŋ turɓus turɓus.

⁶⁴ A sirtakaŋ gwat a hiri, a ɓakaŋ: «Mikiɗuw na, i waka? Sina so, ka mijiviɗi!»

⁶⁵ Joˀ a zakaŋ ti ɓi mekelemey wal wal haɗa.

Miram ti Yesu nga mbuŋ kus ngi ngilawuy madiɗa

⁶⁶ Li a wun le, mizli micawwa ngi Yudehey, masay madiɗahay ati buy ngi ɓimujuwahay a kusom. Dar a soko ti Yesu nga mbuŋ kus taŋ ngi ngilawuy madiɗa,

⁶⁷ a ɓakaŋ: «Da ki Mesi na, inga ɓa ndra di.» Yesu a mbiɗa taŋ di: «Da ko yi ɓukum di le vuna kwana, kum anta kisa tiɓaka ta si.

⁶⁸ Yo da i ra cufuɗ na, kum anta sa mbiɗikiy di ta.

⁶⁹ Amma zle wurenna, Mangal ngi mbur a sa cifi joˀ tir vay hazum ngi Buymisemuŋ, Misi gidaŋ wãˀ.»

⁷⁰ Dar taŋ gar a ɓakaŋ: «Ani, ki Mangal ngi Buymisemuŋ sukwa?» A mbiɗa taŋ di: «Kum vuna, ki ɓam yi nah.»

⁷¹ Dar a ɓam: «I wuɗam sedewo aruŋ makwa? Asi ndra vuna, i cinaka mingiɓi ngi balam naŋ le si!»