Ɓimezle ngi Yesu Kristu LUK mitil di mi 21 - Bible en langue guiziga

Ngwas wudiga misi murga muvula gwat naŋ

¹ Yesu a zuɓa hiri na, a pura misi zlilihey mapaka dala ng'ar sikiɗ ngi cikila dala ar hay ngi Bumbulvuŋ.

² A pura ngwas wudiga misi murga, a pi sisi cuw ng'ara ya.

³ Joˀ Yesu a ɓi: «Gisiŋ, yi ɓukum na: Wudiga misi murga hana, a pi fineˀ mizli mekelemey gar.

⁴ Asi mizli tayna gar na, a vulam di i mineˀ ngir zlili taŋ, taŋ mawuɗam mata. Amma ngwas hana, ko ti viya naŋ kwana, a zuɓa si haŋ naŋ, naŋ mangir di gar, a paŋ.»

Yesu miɓa ɓi masa mbizlaka hay ngi Bumbulvuŋ

⁵ Mizli mekelemey ara ɓaka ɓi ngi hay ngi Bumbulvuŋ, a ɓam: «A gakaŋ wuya kuy haɗi ti ɗugur mezlehey ati gwatay muvulaka taŋ da Buymisemuŋ.» Joˀ Yesu a ɓi:

⁶ «Gwat kum mapuraka hana gar na, hin a sa ndilawa, ko ɗugur masa ndir jirngasl a hirnga cala anta, a sa mbizlaka gar avra.»

Bonoy ati sipi vu nder nder masa gi dumbuŋ angi duniya masa kiɗ mi

⁷ Dar a cufuɗaka Yesu: «Kumani, gwat nah vuna, a sa gi ti vuna ka? Yo gwat tayna masa gam gweˀ vuna, i sa sinaka avu mike?»

⁸ Yesu a mbiɗa taŋ di: «Jam lesl, ki pulaka vu kumo ɓa a mbuɗukum gilaw ta. Asi mizli haɗi a sa soko ti slimiɗ ɗu, a sa ɓam: ‹I ya Mesi›, yo ‹Hin a ndilo le!› Amma anja ki sipaka taŋ ta.

⁹ Ti kum masa cinam labara ngi vurum, yo mizli ara slikiɗam ɓi na, anja ki zluwunam ta. Mbak gwat tayna a gam ɗagay. Amma i duniya masa kiɗ mi kutum kine t'aruŋ.»

¹⁰ Dar Yesu a ɓa taŋ ma: «Sukwi ngi mizli a sa kiɗam vu ati sukwi mekelem. Buy mekelem a sa slikiɗ, a kiɗam vu ati buy mekelem.

¹¹ Hirwuy a sa wus haɗi kuy ta wãˀ, may a sa gi, yo jiji mozorbono a sa gi angi li wal wal haɗi. Gwat ngi zluwuna vuhoy a sa goko paɗ a muŋ, kisa sinaka hin ɗu a ndilo le gweˀ na, avu gwat madiɗa tayna.

¹² Amma dumbuŋ angi gwat tayna na, a sa jukum, a sa supukum nder nder, a sa vulukum ɓa a gukum kiita ar hay ngi dira dibiɗey, a sa cukum angi dangay. A sa ram ti kum a mbuŋ buy madiɗahay, yo a mbuŋ madiɗa ngi ruwuyoy, asi slimiɗ ɗu.

¹³ Hana a sa gi avu kumo, i jiviɗ ngi gi sedewo ɗu.

¹⁴ Anja ki wulkam angi mingiɓi kum masa ɓaka ngi laha hirnga kumo ta. Jaka ɓi nah kaw a mevel kumo.

¹⁵ Asi ya, i sa vulukum mingiɓi ati sinmijileŋ, ɓa ko mesene kum pal masa ngilukum mi malla masa mbuɗukum mi gu anta.

¹⁶ Ko miyi kumoy ati sukum kumoy, muy kumoy ati ngama kumoy kwana, a sa vulukum ɓa a jukum, a sa gam kiita ngi muc da mizli mekelemey haɗi a wuzla kumo.

¹⁷ Mizli gar a sa gam mesene ti kum asi slimiɗ ɗu.

¹⁸ Amma ko himac ngi hirnga kum purla masa zizi anta.

¹⁹ Cicam zlak kuy kuy, ɓa ki lahaka hirnga kumo.

Yesu miɓa ɓi masa wahaka Zeruzalem

²⁰ Da ki puraka le, sojehey a gunoko Zeruzaleme le gun na, sinaka sin le, naɓa pas ngi wuh naŋ a ndilo le.

²¹ Tapasa, mizli misi asi ruwuy Yude, anja a kilam nga muwãhay, mizli misi a hur walahaya, anja a bam avra, mizli misi a ɓuhoyo, anja a cam ng'ar walahaya mata.

²² Asi hin nah na, a sa gi i hin ngi pula cuwal, ɓa ɓi mutohoko gar a gi muduba.

²³ Tapasa, ngwas misi ti huroy ati ngwas misi ziri a dubahay na, kay, taŋ ar bonoy! Asi bonoy madidiɗa a sa gi asi ruwuyo, yo himaˀ ngi Buymisemuŋ a sa pi a hirnga mizli tayna.

²⁴ Maslalam a sa zuma taŋ, a sa jaka taŋ ng'ar beke, a sa jaka taŋ nga wuzla sukwi ngi mizli ngi ruwuyoy gar. Sukwi mekelemey a sa kirpaka Zeruzaleme asi sar, hã da hin taŋ mikiɗ mi le.

So ngi Mangal ngi mbur

²⁵ Gwatay a sa gam angi pas, angi kiya, waɗ angi wurzlaŋhay, kisa sinaka hin ɗu a ndilo le gweˀ na, avu taŋ. Mubuliy ati diɓel ngi yam masa hurmom na, a sa muɗa didak da sukwi ngi mizli ngi si ruwuyo, a sa ga taŋ welele teˀe.

²⁶ Mizli a sa micam ti zluwun, ti wulka ɓi ngi bonoy masa ndilo ar duniya na, asi gwat madiɗa ngi muŋhoy a sa jijikam.

²⁷ Ar nah so na, a sa puraka Mangal ngi mbur ara sawa, gazlavay gun hirnga naŋ, naŋ ti gidaŋ waɗ dudok haɗi wãˀ.

²⁸ Ti gwat tayna mizlaka le, ara gam na, cicam kuy kuy, hirnga paɗ a muŋ, asi hin ngi lih kumo, naŋ gweˀe.»

Yesu miwa ɓi ti ˀurufu

²⁹ Joˀ Yesu a wa taŋ ɓi ani: «Puraka ˀuruf ati widis mekelemey gar.

³⁰ Da ki puraka taŋ le, ara ɗiɗam na, naɓa ki sinaka le, viya, naŋ gweˀe.

³¹ Naŋ kine, kumo kwana, da ki puraka gwat tayna le, ara gam na, sinaka sin le, Zumabuy ngi Buymisemuŋ naŋ gweˀe.

³² Gisiŋ, yi ɓukum na: mizli migwenehey anta sa micam ta, sey da gwat tayna gar a gam le dumbuŋ.

³³ Muŋ ati hirwuy a sa susuymom, amma mingiɓi ɗu anta sa susuyum ta ndiɗaˀ.

Jam lesl, ki hinjam ta

³⁴ Jam lesl, anja wi ti mbaazla, zuma gwat mifineˀ gidaŋ ati wuluk ar cifi ngi duniya misenna, ki pulaka a hirya mevel kumo ta, ɓa hin nah na a sa lumukum gurjik ta.

³⁵ Asi hin nah na, a sa luuma mizli ngi si ruwuy kurzluˀ gara gurjik kaɓa zuva.

³⁶ Amma ki hinjam ta, diram dibiɗ ndrehhe, ɓa ki lumam gidaŋ ngi lih tir gwat masa ndilo gar, yo ɓa kisa cicam deŋ gu a mbuŋ Mangal ngi mburo.»

³⁷ Yesu a vi hiipas ar li dubuna gwat da mizli ar hay ngi Bumbulvuŋ. Amma ti hiikuɗo, a bi, ara hin a muwã mazilaka muwã Tutumbur.

³⁸ Yo prik prik na, mizli gar a bam ng'ava ar hay ngi Bumbulvuŋ ɓa a cinam mingiɓi naŋ.