Ɓimezle ngi Yesu Kristu LUK mitil di mi 2 - Bible en langue guiziga

Ɓi ngi yi Yesu

¹ Ti di nah na, buy mimadiɗa Oguste a ɗuf ɓi, a ɓi ɓa a tohoko mizli ngi si hirwuyo keɗeɗe gar.

² Toho vu mudumbuŋ nah a gi na, naɓa Kiriniyus i buy miwi li ngi Siri.

³ Mizli gar a ram nga toho slimiɗe, mbur gar angi hirwuy naŋ, angi hirwuy naŋ.

⁴ Zozefe kwana, a pula Nazaret, hirwuy Galile, aru ng'ar walahay ngi Davit mazilaka Beteleyem, angi hirwuy Yude. Asi Zozef i muy ngi Davit, yo i dideˀ naŋ.

⁵ Aru ɓa ara tohoko slimiɗ taŋ a diga ati ngwas naŋ Mariya misi ti huro.

⁶ Ti taŋ misi a diga na, hin ngi Mariya ɓa a yi a ndila le.

⁷ A ya mangal naŋ modogomo, a mbiza ti zana, a hina ar li ngi vula gwat ngi zum da ginewey. Asi li ngi hin da taŋ anta ar hay ngi mulakaya ta.

Modro ngi Buymisemuŋ mibiga vu da mijiginey

⁸ Angi hirwuy nah vuna, mijiginey ada, a hinam ti duvuɗ a ɓuh avu ginew taŋhay.

⁹ Modro ngi Bumbulvuŋ a biga taŋ vu deŋ a mbuŋ taŋ, yo dudok ngi Bumbulvuŋ a pusluɗ kpah ng'ar taŋ. Zluwun a ga taŋ haɗa teˀe.

¹⁰ Dar modro a ɓa taŋ: «Ki zluwunam ta, ani yi so ngi tulukum mi ti ɓimezle. Mizli gar a sa mumulom di haɗi.

¹¹ Puraka, a yukum Milahavu le ngadana, angi walahay ngi Daviti. I Buy Kristu.

¹² Yo gwat masa bugukum di anihĩ: kisa ra lumam zuŋ gaza mimbiza le ti zana, mihina le ar li vula gwat ngi zum da ginewey.»

¹³ Gurjik ar nah vuna si na, modrohoy heɓe heɓe, migi vurum ngi muŋhoy jom ati modro mudumbuŋ tuwa, a zlam dimis ngi hunuma Buymisemuŋ, a ɓam:

¹⁴ «Dudok da Buymisemuŋ misi sesẽŋ a dadala muŋ! Zuy a ruwuy, da mizli naŋ mawuɗ taŋ haɗi!»

Mijiginey miram nga Beteleyem

¹⁵ Akẽh na, modro ngi Buymisemuŋhoy mupulaka taŋ, mimam nga muŋ na, mijiginey a ɓam ar wala taŋ: «Gwat migi, Bumbulvuŋ minjika ndra di na, akum ngbasl a Beteleyeme, i ra puraka.»

¹⁶ Dar a wusam vu kutum, ara lumaka Mariya ati Zozef waɗ zuŋ gaza tuwa tup ar li ngi vula gwat ngi zum da gineweye.

¹⁷ A dirba taŋ mupuraka na, a slufaka ɓi modro miɓa taŋ di vur mangal tuwa.

¹⁸ Mizli micin naŋhay gar na, mingiɓi ngi mijiginey a zuma taŋ hirnga le.

¹⁹ Mariya kwana, a ja ɓi tayna gar a hirnga, a wulka taŋ a mevele.

²⁰ Dar mijiginey a mam bal ti zli dimis waɗ ti ga dudok da Buymisemuŋ, a hunumakaŋ asi ɓi taŋ micinaka ati gwat taŋ mupuraka gar na, a gi le kasl kasl kaɓa modro miɓa taŋ di.

Micaka slimiɗ da Yesu

²¹ Hin dangafaɗ a dirba nah na, hin ngi ca mangal a mizaw a ndila le. A cakaŋ slimiɗe Yesu, kaɓa modro mibiga taŋ di zle dumbuŋ angi gi hur naŋ na.

Musoko bigaka Yesu ar hay ngi Bumbulvuŋ

²² Yo hin a ndila le, ɓa a gaka mezegwel ngi bi ti hiryi avra, kaɓa ɓimujuwa ngi Moyis miɓa ɗaˀ le zleˀe tuwa. Dar a ram ti mangala nga Zeruzaleme, ɓa a bigaka da Bumbulvuŋ.

²³ Naŋ kine, ɓimujuwa ngi Bumbulvuŋ a ɓi na: «Mangal modogom gar na, a sa vulaka da Bumbulvuŋ.»

²⁴ Ti Mariya ati Zozefe, a vulam gwat ngi gi mikuli a mbuŋ Buymisemuŋ kaɓa ɓimujuwa miɓa, gonokoy zlaɓ cuw, mizile ati mongoso, malla ziri ɗiyuw dirgwaɗay cuw.»

²⁵ Ar hin nah, mbur ada a Zeruzaleme, a zilaka Simeyoŋ. I mbur mijeŋŋe masipa jiviɗ ngi Bumbulvuŋ. A ra kutuko mbur masa laha Israyele, yo ˀUf Mipala, naŋ da angi naŋ.

²⁶ ˀUf Mipal a njikaŋ di le zleˀe, naŋ anta sa muc ta, sey da a pura Mesi ngi Bumbulvuŋ na le ɗagay.

²⁷ Dar ˀUf Mipal tuwa a hizigiɗo di, a so ng'ar hay ngi Bumbulvuŋ so. Miyi ngi Yesuhoyo, ti taŋ miram ti Yesu nga gi mezegwel kaɓa ɓimujuwa miɓa vurˀe na,

²⁸ Simeyoŋ tuwa a zuɓa Yesu gumbuˀ a haŋ, a hunuma Buymisemuŋ, a ɓi:

²⁹ «Bumbulvuŋ, wurenna pula gawla ɗik a muc ti zuy muduba, kaɓa ka miɓa zleˀe.

³⁰ Asi hiri ɗu a pura lahavu, ka mislino di na le,

³¹ lahavu ka miɗiya ɓi nah, vur sukwi ngi mizli gar.

³² I li minjahha masa buguw njah avu mizli ngi duniyahay keɗeɗe, yo maga dudok da Israyel, mizli ɗikey.»

Simeyoŋ minjika ɓi ngi Buymisemuŋ

³³ Ɓi mizli maɓaka vur mangala, a zuma hirnga le da cine ati mumuŋ.

³⁴ Simeyoŋ a ɗuwula taŋ mi, a ɓa Mariya, mumuŋ ngi Yesu: «Mangal hana, Buymisemuŋ a winaŋ le ngi hizigiɗa malla ngi slikiɗa Israyeley haɗa, yo ɓa a sa puraka Buymisemuŋ ava, amma mekelemey anta sa tiɓakaŋ ta.

³⁵ Ka vuna, bonoy a sa zliguw mevele njoŋ ka gordo. Wuluk ngi mizli haɗi mawulkam a mevel taŋ na, a sa njiki.»

Ana, ngwas mijiviɗi

³⁶ Ngwas mijiviɗ ada akẽh ma, a zilaka Ana, i zuŋ ngi Fanuyel, angi sukwi ngi Aser. Angi diili naŋ na, a ɗuvam vu vi tarnaˀ tewle ati zil naŋ. A gi gal le haɗi.

³⁷ A cifi wudiga joˀ pal naŋ, hã vi ngi yi naŋ a ndila kukur dangafaɗ nga mufaɗa. N'anta pula hay ngi Bumbulvuŋ ta, ara huruk huruk a mbuŋ Buymisemuŋ duvuɗ ti papas gar ti gi dalyam ati dira dibiɗi.

³⁸ A ndilawa kasl ti nah vuna, a zla a ga sise da Buymisemuŋ, a ɓa ɓi ngi mangala da mizli makutukom Bumbulvuŋ masa laha Zeruzaleme.

Mi nga Nazaret

³⁹ A dirba taŋ mikiɗaka mi ngi gi mezegwel gar kaɓa ɓimujuwa ngi Buymisemuŋ na, a mam nga Nazaret, hirwuy Galile a muŋ.

⁴⁰ Mangala kwana, ara gil, ara lum gidaŋ, a nih le kɗaf kɗaf ti sinmijileŋ. Gi mezle ngi Buymisemuŋ naŋ da angi naŋ.

Yesu ar hay ngi Bumbulvuŋ a Zeruzalem

⁴¹ Vur vi gar na, miyi ngi Yesuhoy a ram ndol le a Zeruzaleme nga gi muguzlum Pak.

⁴² Yesu mindila vi kuruˀ nga cuw na, a ram nga diga kaɓa sirik magaka ngi muguzlumo.

⁴³ Muguzlum mikiɗ mi na, a dirba nah, ara mam le, amma mangal taŋ Yesu, a ndir le a Zeruzaleme na, miyi naŋhay a si na ka ta

⁴⁴ A waka na, naŋ da a wuzla mizli taŋ maram bumoˀ na. A vam hiipas ar li ru, a sa zlaka pur naŋ a wuzla muy naŋhay ati cil naŋhaya.

⁴⁵ Taŋ mulumaka ta na, a mam nga Zeruzalem a muŋ bal ti pur naŋ.

⁴⁶ A sa lumaka ar hin mimakir naŋ, ar hay ngi Bumbulvuŋ, a wuzla Yude, buy ngi ɓimujuwahay. A ra cine ɓi taŋ, yo ara cufuɗa taŋ ma.

⁴⁷ Mizli macinam mingiɓi naŋ gar na, a ga taŋ ngirkik, asi lesl naŋ ati mingiɓi naŋ mambiɗa taŋ di na.

⁴⁸ Taŋ mupuraka kanah na, a zuma taŋ hirnga teˀe, joˀ mumuŋ a ɓaŋ: «Mangal ɗu, ki ga ndra di kahana vur mike? Pura, ndra ati bunuko, i ra supukuw, didak a muɗa ndra le haɗa.»

⁴⁹ Yesu a ɓa taŋ: «Ki sipikiy zleˀe ngi mike? Sey yi ndir a hay Baha na, ki sinaka zleˀe ta kwa?»

⁵⁰ Amma ko taŋ a slaka wala ngi ɓi naŋ maɓa taŋ di vuna ta.

⁵¹ Dar Yesu a moko bumoˀ ati taŋ nga Nazarete, ara cine taŋ mi. Mumuŋ a ja ɓi ngi gwat tayna gar a hirnga.

⁵² Yesu ara gil, ara lum sinmijileŋ, yo naŋ mezle avu Buymisemuŋ waɗ avu mizli ma.