Ɓimezle ngi Yesu Kristu LUK mitil di mi 15 - Bible en langue guiziga

Ɓi ngi tumuŋ miziza, misa lumaka a muŋ

¹ Micikila buutuhoy ati mizli migi mungrahay gar a kirohoko ng'avu Yesu, ɓa a cinam mingiɓi ava.

² Joˀ Farisahay ati buy ngi ɓimujuwahay a dirɗakaŋ: «Mbur hana a tiɓa mizli migi mungraˀahaya kuy kuy, a zumam gwat bumoˀ.»

³ Dar Yesu a wa taŋ ɓi ani:

⁴ «Da mbur a wuzla kumo, naŋ da ti tumuŋ skat, purla a wuzla taŋ a zizi le na, a pula mizli ngir ngoltir nga ngoltir na mbak a pala, ɓa ara supo mipal mizizi na, sey da naŋ mulumo di le takwa?

⁵ Da naŋ mulumo di le na, a mumul, a zuɓo di lap a gagalaˀay.

⁶ Yo naŋ mumo le a haya na, a kuso ngama naŋhay ati midigwi naŋhaya, a ɓa taŋ: «Mumulukum bummoˀ, asi tumuŋ ɗu mizizi zleˀe tuwa, yi luuma le!»

⁷ Naŋ kine ya, i ɓukum na: Da mbur migi mungra purla mimbiɗi le ng'avu Buymisemuŋ na, mumul a sa gi haɗi a muŋ vurˀe, fineˀ mizli mizli ngir ngoltir nga ngoltir mezlehey misi ti may ngi mbiɗi mevel ti mbiɗi ta na.

Ɓi ngi suloy miziza, misa lumaka a muŋ

⁸ Malla ta ma na, da ngwasa, naŋ ti suloy kuruˀu, amma a zizi le pal asi taŋ na, a ji vu avu lampe, a fuca viŋ, a pura kuy kuy, sey da naŋ muluma le takwa?

⁹ Yo da naŋ muluma le na, a cikilo ngama naŋhay ati midigwi naŋhaya, a ɓa taŋ: ‹Mumulukum bummoˀ, asi suloy ɗu mizizi zleˀe tuwa, yi luuma le a muŋ!›

¹⁰ Naŋ kine ya, yi ɓukum na: Da mbur migi mungra purla mimbiɗi le ng'avu Buymisemuŋ na, modro ngi Buymisemuŋhoy a mumulom haɗa.»

Ɓi ngi mangal miziza, misa lumaka a muŋ

¹¹ Yo Yesu a ɓi ma: «Mbur ada, naŋ ti ziri cuw.

¹² Hiri meciɗek a ɓa cine naŋ na: ‹Baha, zlili ka masa pula ndra di na, vuliy mi nga ya.› Joˀ cine a wunka taŋ zlili naŋ.

¹³ Hin neˀ a dirba nah na, mangal hiri meciɗek tuwa, a cikila zlili naŋ gar, aru suyom nga hirwuy mikileŋ. Joˀ ara gi sulome a diga, a hirya zlili naŋ lambaˀ.

¹⁴ Ti naŋ mihirya zlili naŋ tuwa gar na, may a gi haɗi angi hirwuy nah tuwa, hã a tiri misi murga wãˀ.

¹⁵ Aru nga ci slra avu mbur ngir walahay ngi hirwuy nah vuna, mbur a slinaŋ nga jigina fedemey a duba gala.

¹⁶ A wuɗ zleˀe ɓa a mbi ti zigwi, fedemey mahumbuɗaka na, amma ko mbur mavulaŋ anta.

¹⁷ Lesl a saŋ keŋ, a zla a ɓi ti kwacay naŋ: ‹Gawla ngi baha ɗuwoy gar, gwat ngi zum a ndir avu taŋ lambaˀ. Ani ya, may ara kiɗiy aka!

¹⁸ I sa mi ng'avi baha, i sa ɓaŋ: Baha, yi gi mungra le avu Buymisemuŋ waɗ avu ka.

¹⁹ Yi ndila ter ɓa ki ziliy mangal ɗike mata. Gi ti ya ka yi mbur ngi wuzla gawla ɗikey si.›

²⁰ A ra ru ng'avi cine tuwa. Ti naŋ mikileŋ aruŋ na, cine a pura bǝzǝw, a puraŋ ˀircece. Dar a kil ng'avaŋ, a jaŋ kuɓuy.

²¹ Joˀ mangal a ɓaŋ: ‹Baha, yi gi mungra le avu Buymisemuŋ waɗ avu ka, yi ndila ter ɓa ki ziliy mangal ɗike mata.›

²² Amma cine a ɓa gawla naŋhaya: ‹Wusam vu, zuɓoko zana hirnga, kakaŋ di, cakaŋ dangwa avu muzuŋ haŋ, yo cakaŋ tarak a sara.

²³ Joko zuŋ sla muzlumbra, slakaŋ, gukum muguzlum.

²⁴ Asi mangal ɗu hana, a muc le zleˀe, ani a mo le ti siifa. A zizi le zleˀe, amma yi luuma le a muŋ.› Dar a zlaka muguzlumo so.

²⁵ Ti nah na, mangal modogom a ro zleˀe ar guva. Ti naŋ mamawa, a ndilo gweˀ avu hay na, a cin hurum ngi badak, ara ɓurgam.

²⁶ A zil mbur pal a wuzla gawlahaya, a cufuɗaŋ: ‹I mi migi ka?›

²⁷ Gawla a mbiɗaŋ di: ‹Sukum ɗik a ndilo le, bunuk a kiɗ zuŋ sla muzlumbra, asi a pura a ndilo le ti vu naŋ zuy zuy.›

²⁸ Dar mangal naŋ modogom tuwa a ji mevel, a ngum ci ngi haya mata. Cine a bawa, a tumbuloŋ ɓa a ci ngi haya.

²⁹ Amma a mbiɗa da cine: ‹Pura, a gi le wurenna vi mbeˀ mbeˀ, i ra guw slra, ɓi ka miɓiy di le gar, ɓa yi ga ta na anta. Amma ko zuŋ ˀaw tekeɗe, ki vuliy ɗaˀ ɓa i humbuɗaka ati ngama ɗuwoyo ta wãˀ.

³⁰ Amma mangal ɗik hana, mihirya zlili ɗik gar ati ngwasay, naŋ mindilo na, ki kiɗaŋ zuŋ sla muzlumbra ɓula.›

³¹ Cine a ɓaŋ: ‹Mangal ɗu, ka, ka ndrehhe avu ya, yo gwat nga yahay gar na, i ngi ɗikey takwa?

³² Na sukum ɗik hana, a muc le zleˀe, amma n'ani ti siifa, a zizi le zleˀe, yi sa luuma le a muŋ. A zlir le ɓa i gam muguzlum, i mumulom takwa?›»